Bbaruha gya Pau̱lo hali
Fi̱ri̱mooni̱
Kwanjuura
Bbaruha gi̱i̱hi̱ gigi, Pau̱lo yaahandi̱i̱ki̱ri̱ Fi̱ri̱mooni̱ munyakubba yeegebeerwe hoi̱ nka mwikiriza wa Ku̱ri̱si̱to mu rub̯uga lwa Kolosaayi (1:1). Yaagi̱handi̱i̱ki̱i̱ri̱ naali Rooma cali yaalingi naali munyankomo, harabi̱ri̱ho myaka 60 Yesu̱ Ku̱ri̱si̱to amaari̱ kubyalwa.
Fi̱ri̱mooni̱ yaalingi na mwiru gi̱beetengi̱ Onesi̱mo. Hei̱nyu̱ma gya kasu̱mi̱, Onesi̱mo yei̱ru̱ki̱ri̱, yaaruga hali mukama waamwe, Fi̱ri̱mooni̱. Mu kwi̱ru̱ka kwamwe, asobora kubba yei̱bi̱ri̱ bintu bindi kuruga hali Fi̱ri̱mooni̱, aleke bimusagike mu lugyendu lwamwe lu̱lwo. Onesi̱mo b̯u̱yei̱ru̱ki̱ri̱, yaagyendi̱ri̱ mu rub̯uga lwa Rooma. Ku̱kwo hooho, yaagi̱i̱rye Pau̱lo mu nkomo, hab̯wa ku̱tebya Makuru Garungi gakukwatagana na Yesu̱ Ku̱ri̱si̱to, Mutongoole wa Ruhanga, yaamuweera bigambu bya Yesu̱ Ku̱ri̱si̱to. Kinyakurugamwo, Onesi̱mo yeikiririize mu Yesu̱ Ku̱ri̱si̱to kubba mu̱ju̱ni̱ kandi Mukama waamwe.
Pau̱lo yaahandi̱i̱ki̱i̱ri̱ Fi̱ri̱mooni̱ naamusaba atafubira mwiru waamwe Onesi̱mo munyakubba amwi̱ru̱ki̱ri̱ho. Mu biragiro bya Baru̱u̱mi̱, Fi̱ri̱mooni̱ yaali nab̯ugabe b̯wa kwi̱ta Onesi̱mo hab̯wa musangu guyaali agu̱mi̱ri̱, gwaku̱mwi̱ru̱kaho. Pau̱lo b̯uyaali naakuhandiika bbaruha gigi, yaakoreseerye bigambu bikusikiriza naasaba Fi̱ri̱mooni̱ atangiire Onesi̱mo kurungi, aleke kutangiira ku̱kwo, kubbe nka kukoora yo Pau̱lo makune.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Pau̱lo naaramu̱kya Fi̱ri̱mooni̱ 1:1-3
(ii) Pau̱lo naasaba Fi̱ri̱mooni̱ atangiire Onesi̱mo nka mwikiriza wa Yesu̱ Ku̱ri̱si̱to mwi̱ra waamwe 1:4-21
(iii) Pau̱lo naamaliira bbaruha gyamwe na bi̱ramu̱kyo kandi ni̱yoolokya nka kwategeki̱ri̱ kub̯ungira Fi̱ri̱mooni̱ 1:22-25
1
1-2 Bbaruha gigi, gi̱ru̱gi̱ri̱ hali gya Pau̱lo, munyakubbohwa mu nkomo, hab̯wa ku̱tebya Makuru Garungi gakukwatagana na Yesu̱, Mutongoole wa Ruhanga.*1:1 Bbai̱bbu̱li̱ zindi zoolokya Ku̱ri̱si̱to, yooyo Yesu̱. Ngi̱handi̱i̱ki̱i̱ri̱ we, Fi̱ri̱mooni̱ munywani weetu̱, kandi mu̱kori̱ mwi̱ra weetu̱. Bandi bangi̱handi̱i̱ki̱i̱ri̱, boobo baba: Kitebe kya beikiriza ba Yesu̱, bab̯wo barombera mu nnyu̱mba gyamu, Afi̱ya, mwikiriza wa Yesu̱ mwi̱ra weetu̱; hamwenya nʼAraki̱i̱po, yogwo atalibana hoi̱ nka twe mu mulimo gwa kuheereza Ku̱ri̱si̱to. Mwikiriza wa Yesu̱ mwi̱ra wange, gibeeta Ti̱mi̱teo, kwokwo tu̱kwatani̱i̱ze, mu kubatumira bbaruha gigi.
3 Nkubasabira, Ruhanga Bbaa weetu̱ hamwei̱ na Mukama weetu̱ Yesu̱ Ku̱ri̱si̱to, Mutongoole wa Ruhanga, babagiire mbabazi̱ kandi babahe b̯u̱si̱nge.
Fi̱ri̱mooni̱ Ku̱yendya Bantu kandi Neikiririza muli Ku̱ri̱si̱to
4 Fi̱ri̱mooni̱ mwikiriza wa Yesu̱ mwi̱ra wange, b̯uli b̯unkusabira, nsi̱i̱ma Ruhanga wange hab̯wa nziicala gyamu, 5 hab̯wakubba bambwera nka kwokugyenda mu mei̱so nakwikiririza mu Mukama weetu̱ Yesu̱, kandi de, nakwendya bantu ba Ruhanga bensei̱. 6 Kandi mu kusaba kwange, nsaba ni̱nyendya mu̱li̱ngo gututeerana nawe nka beikiriza ba Yesu̱, ku̱ku̱kengeseerye ki̱mwei̱ mi̱gi̱sa myenseenya mya Ruhanga myatuha hab̯wa kwikiririza mu Ku̱ri̱si̱to. 7 Mwikiriza wa Yesu̱ mwi̱ra wange, kintu kyamu, kya we kwendya bantu ba Ruhanga, ki̱mpeeri̱ kusemererwa hoi̱, kandi de ki̱ntati̱i̱rye, hab̯wakubba oleteeri̱ bantu ba Ruhanga benseenya kusemererwa. 8 Ku̱si̱gi̱ki̱ra nka ku̱wendya hoi̱ bantu ba Ruhanga, gya nka mwikiriza wa Ku̱ri̱si̱to mwi̱ra waamu, nyaakasobora kukuragira kintu kyakukora. 9 Bei̱tu̱ hab̯wakubba nkwendya mbe, kanku̱sabe-b̯u̱sabi̱. Nab̯unyaabba nindi Pau̱lo mukwenda wa Yesu̱, kandi de nab̯unyaabba mu kasu̱mi̱ kaka, nindi munyankomo hab̯wa Yesu̱, Mutongoole wa Ruhanga, 10 nku̱kwesengereerya hab̯wa mwiru waamu, Onesi̱mo, hataati̱ ginkutwala kubba nka mwana wange mu Ku̱ri̱si̱to, hab̯wakubba nindi mwomu mu nkomo, nyamu̱tebeerye bigambu bya Ruhanga, yeikiriza Ku̱ri̱si̱to. 11 Kwei̱nyu̱maho, yaali atakukugasira, bei̱tu̱ hataati̱ ali wa mugasu hali gya na hali we.
12 Onesi̱mo, gi̱nyendya na mutima gwange gwenseenya, mmu̱ku̱si̱ndi̱ki̱i̱ri̱, ei̱re hali we. 13 Nyakwendeerye twicale nayo, aleke ankoore mu kiikaru kyamu, nindi haha mu nkomo hab̯wa Makuru Garungi gakukwatagana na Ku̱ri̱si̱to. 14 Bei̱tu̱ kandi, nkwendya kwahi kukuhambiriza ondekere Onesi̱mo ankoore. Mu kiikaru kya ku̱ku̱hambi̱ri̱za-b̯u̱hambi̱ri̱zi̱, nkwendya omumpe, nooli we wankeenya, oki̱cwi̱ri̱mwona kurugira ki̱mwei̱ ha mutima gwamu. Nahab̯waki̱kyo, gya nkwi̱za kwahi kukora kintu kyenseenya kyotei̱ki̱ri̱i̱ze.
15 Ruhanga asobora kubba yaaleki̱ri̱ Onesi̱mo akwi̱ru̱keho hab̯wa kasu̱mi̱ kadooli̱, aleke b̯wali̱i̱ra, oicale nayo biro na biro, 16 atali mwiru b̯wiru, bei̱tu̱ naakukiraho, naali mwikiriza wa Ku̱ri̱si̱to mwi̱ra waamu. Gya mmwendya hoi̱, bei̱tu̱ we, okusemeera ku̱mwendya kukiraho gya, hab̯wakubba, hataati̱ ali mwiru waamu, kandi de, ali mwikiriza wa Ku̱ri̱si̱to mwi̱ra waamu.
17 Nahab̯waki̱kyo, waakabba ontwala kubba mu̱kori̱ wa Ku̱ri̱si̱to mwi̱ra waamu, omutangiire nka kuwaakantangiira, mbenge nindi gyagya nzi̱ri̱. 18 Yaakabba yaaku̱sobereerye, rundi naali neibanza lyamu lyensei̱, olintonge. 19 Gya Pau̱lo, kiki nkukihandiika na mukono gwange nti, “Ibanza li̱lyo, nkwi̱za kulisasula,” b̯u̱b̯wo nu, ti̱nkwendya ku̱kwi̱zu̱kya nka kwondinaho ibanza, kandi ibanza li̱lyo, weewe woonyi̱ni̱, hab̯wakubba gyagya munyeikuha kwikiririza mu Ku̱ri̱si̱to. 20 Kale mwi̱ra wange, nkukusaba onkoore maku̱ne gaga, hab̯wa Mukama. Mmpu̱mu̱u̱lya mutima, nka mwikiriza wa Ku̱ri̱si̱to mwi̱ra wange.
21 Mu ku̱ku̱si̱ndi̱ki̱ra bbaruha gigi, ndi mu̱nanu̱ku̱ nti, okwi̱za kunkoora ki̱kyo ki̱nku̱sabi̱ri̱, kandi okore na kikukiraho ki̱kyo ki̱nku̱sabi̱ri̱. 22 Kandi kindi, onteekanirize b̯ulaalu, hab̯wakubba nkyegi̱ri̱ nti Ruhanga akwi̱za kwegwa kusaba kwenyu̱ nywenseenya, anzi̱rye ku̱kwo hali nywe.
Bantu bandi Ni̱baramu̱kya Fi̱ri̱mooni̱
23 Mwi̱ra wange gibeeta Epafu̱ra, yogwo ali mu nkomo nagya, hab̯wa ku̱tebya Makuru Garungi gakukwatagana na Yesu̱, Mutongoole wa Ruhanga, aku̱ramu̱ki̱i̱rye. 24 Bakori̱ bei̱ra bange, Mari̱ko, Ari̱si̱taako, Deema na Lu̱u̱ka, naboodede baku̱ramu̱ki̱i̱rye. 25 Nimaliira bbaruha gigi, nkubasabira, Mukama Yesu̱ Ku̱ri̱si̱to, nywenseenya abagiire mbabazi̱.