16
1 Muntu ategeka kyakukora,
bei̱tu̱ Mukama yooyo acwamwo kukyabba.
2 Bantu basobora kuteekereza bibakukora birungi,
kyonkei bigyendeerwa byaho bi̱pi̱mwa Mukama.
3 B̯uli kyokukora ki̱kwatyenge Mukama,
mwomwo byotegeki̱ri̱ bidwereere.
4 B̯uli Mukama kyakora abba na nsonga,
na mubiibi amu̱tegekeeri̱ kiro kya ku̱zi̱ka.
5 Mukama anoba beehaariiza,
mu mananu tibalilemwa kufubirwa.
6 Yensei̱ akwendya Mukama kandi akamwesiga, amuganyira bibii byamwe,
na ku̱ti̱i̱na Mukama kwokwo kutoola muntu mu kibii.
7 Akora bi̱ku̱si̱i̱imwa Mukama,
na banyanzigwa baamwe bei̱ra nibamunywana.
8 Hakiri otunga bi̱dooli̱ mu b̯urungi,
kukira binene bya ngu̱zi̱.
9 Muntu ategeka ha kugyenda,
bei̱tu̱ Mukama yooyo amuhab̯ura muhanda.
10 Ruhanga aterekereerya mutima gwa mukama,
akusemeera kubbanga wab̯winganiza.
11 Mukama yendya ki̱pi̱myo na ndengu zi̱doori̱,
byab̯u̱gu̱li̱ byensei̱ biruga hali yo.
12 Bakama banoba nkori̱ za bibii,
kubba b̯u̱lemi̱ b̯urungi b̯uleetwa b̯winganiza.
13 Mukama anyu̱mi̱rwa kwegwa akubaza mananu,
asi̱i̱ma abaza bi̱doori̱.
14 Hali mukama azi̱ngali̱i̱ri̱ asobora nakwi̱ta
bei̱tu̱ mu̱gezi̱, amu̱holya b̯u̱holya.
15 Kamwenyu ka mukama kaleeta b̯womi,
kandi mbabazi̱ zaamwe zisana ndagali̱ gya kibbaga.
16 Kubba na magezi̱ na kwetegereza,
kikukira kubba na feeza na zaabbu.
17 Murungi yeehala kukora kubiibi,
kandi akora niyegyendereza, alinda b̯womi b̯wamwe.
18 Kwetembya kuleeta kuhwerekeera,
kandi myehaariizo mirugamwo ku̱gwa.
19 Hakiri oicala munaku ali na mbabazi̱,
kukira kwehemba na mugab̯u gwa b̯u̱nyagi̱.
20 Akuta mutima gwamwe ha kwegeseb̯wa ali̱si̱ngu̱ra,
naakwesiga Mukama aliheeb̯wa mu̱gi̱sa.
21 Ali na magezi̱ bamweta mwetegerezi̱,
abaza na mbabazi̱, asikiriza bantu.
22 Magezi̱ hali ali na kwetegereza, musu gwa b̯womi,
bei̱tu̱ kwegesya mudoma ogadira b̯usa.
23 Ali na magezi̱ abaza bya magezi̱,
bigambu byamwe bisikiriza bantu ku̱byegwa.
24 Bigambu bya mbabazi̱ bi̱nwereerya nka b̯uhooki,
bisemeera mwozo kandi bi̱tati̱i̱rya mubiri.
25 Haloho muhanda gu̱zooka gurungi mu mei̱so ga muntu,
bei̱tu̱ gumaliira nigutwala mu lu̱ku̱u̱.
26 Ali na kyakwetaaga akikoleerambe,
nzala gyegesya kukora.
27 Mubiibi atoolya bayatab̯ura,
bigambu byamwe bibba nka mworo.
28 Mucwamakuru aleeta izongobo,
na muhesa bantu yaahu̱kani̱a banywani.
29 Mu̱habi̱ ahabya bei̱ra,
naabatwala mu ku̱zi̱ka.
30 Ami̱gami̱gi̱ri̱i̱rya mei̱so abba naakutegeka b̯ubii,
amyola mu̱nwa abba na kibiibi kyakukora.
31 Mbwi̱ zibba nka kondo gya ki̱ti̱i̱ni̱sa,
giheeb̯wa bantu bananu.
32 Ali na kugumisiriza abba muzira kukira waamaani,
afuga mutima gwamwe akira ahamba rub̯uga lwensei̱.
33 Bantu basobora ku̱cu̱hya nsoro kuwona kyarugamwo,
bei̱tu̱ Mukama yooyo acwamwo.