6
Hali mu̱handu̱ wa bahi̱i̱mi̱. Bikukwata ha kyembu kilimwo ki̱dongo kya mahu̱u̱zi̱ munaanei. Zabbu̱li̱ gya Dau̱di̱.
1 Ai̱ Mukama, otampab̯uranga na ki̱ni̱ga,
habbe kunfubira na b̯usungu.
2 Nsaasira ai̱ Mukama, kubba ndimuceke,
mmponia ai̱ Mukama, kubba maku̱ha gange gakunseenya.
3 Na kindi ntu̱ntwi̱ri̱ hoi̱.
Bei̱tu̱ ai̱ Mukama, oli̱doosya di̱i̱?
4 Ai̱ Mukama, ncungura,
onjune hab̯wa ngonzi zaamu zinene.
5 Hab̯wakubba tihaloho akwi̱zu̱ka mu nsi gya baku̱u̱,
naani yaakuhaariiza kuzumu?
6 Njwahi̱ri̱ kulira,
mali̱ga ga b̯uli kiro galu̱bi̱i̱rye kitabbu kyange,
musagu gwange gu̱tobi̱ri̱ na mali̱ga.
7 Mei̱so gange tigacahweza hab̯wa b̯ujune,
gakwi̱ri̱ hab̯wa banyanzigwa bange.
8 Mu̱ndu̱gehoona, nywe nkori̱ za bibii,
hab̯wakubba Mukama yeegwi̱ri̱ kizabiro kyange.
9 Mukama yeegwi̱ri̱ kwesengereerya kwange,
Mukama ei̱ki̱ri̱i̱ze kusaba kwange.
10 Banyanzigwa bange bensei̱ baakwatwanga nsoni̱, nibakankanira ki̱mwei̱,
mu kuswaraswara baajumbutukanga ni̱bei̱ru̱ka.