28
Zabbu̱li̱ gya Dau̱di̱.
1 Ai̱ Mukama, weewe ginkunga,
lubbaali lwange nzengwa!
Waketeekeera,
nkubba nka bab̯wo bagwi̱ri̱ mu b̯u̱hya.
2 Weegwa, nkukusaba na mbabazi̱,
nkukweta onjune,
mbyokeerye mikono myange
mu Kiikaru kyamu ki̱syanu̱.
3 Otancwera musangu hamwei̱ na babiibi,
na nkori̱ za bibii,
babaza kurungi na bataahi̱ baab̯u
bei̱tu̱ mu mitima myab̯u nibabatekerezaho b̯ubiibi.
4 Bahe mpeera gya bikorwa byab̯u,
obahe na mpeera gya bibii byab̯u,
obahe bya mikono myab̯u mi̱koori̱
obasasule bi̱basemereeri̱.
5 Hab̯wakubba tibatamwo ki̱ti̱i̱ni̱sa milimo mya Mukama
na bya mikono myamwe mi̱koori̱, akwi̱za kubaswaswana,
kandi abamalireho ki̱mwei̱.
6 Mukama ahaariizwe,
kubba yeegwa kusaba kwange kwa mbabazi̱.
7 Mukama googo maani na ngab̯u gyange,
mutima gwange gwesiga yooyo, kandi anju̱ni̱ri̱,
mutima gwange gu̱semereerwe,
nkwi̱za ku̱mu̱si̱i̱ma kandi mu̱hi̱i̱mi̱re kyembu.
8 Mukama yooyo maani ga bantu baamwe,
b̯wi̱ru̱ki̱ro b̯wa kujuna mutongoole waamwe.
9 Ai̱ Mukama, juna bantu baamu kandi obahe mu̱gi̱sa,
bba mu̱li̱i̱sya waab̯u obawoneere biro byensei̱.