30
Zabbu̱li̱ gya Dau̱di̱. Kyembu kya kuhemba Yeekaru.
1 Ai̱ Mukama, nkwi̱za kukuhaariiza
kubba wantoori̱ mu ki̱i̱na kilei,
otakeikirize banyanzigwa bange kunyeeb̯ugiraho.
2 Ai̱ Mukama Ruhanga wange, nyaaku̱li̱ri̱i̱ri̱ onjune
kandi wamponeerye.
3 Ai̱ Mukama, wantoori̱ kuzumu,
wanjuna ku̱gwa mu ki̱i̱na.
4 Mu̱hi̱i̱mi̱re Mukama nywe bantu ba Ruhanga,
mu̱si̱i̱me ibara lyamwe li̱syanu̱.
5 Kubba akwatwa ki̱ni̱ga hab̯wa b̯wi̱re b̯u̱dooli̱,
kisa kyamwe kiicalaho biro byensei̱,
kulira b̯u̱kwi̱za i̱jolo,
mwakya ni̱hei̱zaho kusemererwa.
6 B̯u̱nyeezegwi̱ri̱ nindi na b̯u̱li̱ndi̱, nyaakoba yati,
“Ti̱nkwi̱za kutengeeta.”
7 Ai̱ Mukama, hab̯wa kisa kyamu,
wantati̱i̱rye nka lusahu lunyamaani,
hei̱nyu̱ma weebi̱sa,
nyaatuntura.
8 Weewe Mukama, gi̱nyaali̱ri̱ri̱i̱ri̱,
kandi hali Mukama nyaasabi̱ri̱ kisa,
9 “Kyamugasu ki b̯u̱ndi̱kakwa
nkagyenda kuzumu?
Icuucu lyakusobora kukuhaariiza?
Lyakusobora kurangiira b̯wesigwa b̯wamu?
10 Ai̱ Mukama, weegwa kandi ongiire kisa!
Ai̱ Mukama, bbanga Mu̱ju̱ni̱ wange!”
11 Kizabiro kyange waaki̱fori̱ri̱ mbi̱nya,
wankusula bisensede, wandwalya kusemererwa,
12 aleke mutima gwange gukuhaariizenge, gu̱talyeti̱keera,
ai̱ Mukama Ruhanga wange, nyaku̱si̱i̱manga biro byensei̱.