33
1 Mu̱hi̱i̱mi̱re Mukama mu̱semererwe, nywe bamananu!
Bantu barungi basemereeri̱ kumuhaariiza.
2 Mu̱si̱i̱me Mukama na ndi̱ngi̱di̱,
mu̱mu̱hi̱i̱mi̱re byembu na ki̱dongo kya mahu̱u̱zi̱ i̱ku̱mi̱!
3 Mu̱mu̱hi̱i̱mi̱re kyembu kihyaka,
ku̱u̱te ki̱dongo nab̯wegyendereza, ki̱hu̱lu̱kye iraka likooto.
4 Kubba kigambu kya Mukama kiicala kyamananu,
kandi na milimo myamwe myensei̱ mikorwa mu b̯wesigwa.
5 Yeegomba mananu na b̯winganiza,
nsi gi̱i̱zwi̱ri̱ ngonzi za Mukama zinene.
6 Iguru yaali̱hangi̱ri̱ na kigambu kyamwe,
rwoya lwamwe lwahanga byenseenya bilimwo
7 Yooyo acooka meezi̱ ga mwitaka nka mutuumo,
ga mu ndi̱ha nagabikira mu bideeru.
8 Nsi gyensei̱ gi̱ti̱i̱nenge Mukama,
bantu bensei̱ ba mu nsi bamutemwo ki̱ti̱i̱ni̱sa.
9 Kubba yaabazi̱ri̱, kandi kwokwo kyabba,
yaaragi̱i̱ri̱ kyemeera kiterekereeri̱.
10 Mukama amalaho rukwe lwa mahanga,
alemesya bigyendeerwa bya bantu.
11 Bei̱tu̱ ntegeka za Mukama zemeeraho biro byensei̱,
bigyendeerwa bya mutima gwamwe nibidwereera mi̱hi̱hi̱ myensei̱.
12 Lili na mu̱gi̱sa ihanga lya Mukama Ruhanga afuga,
na bantu bayaakomi̱ri̱ nka b̯ugwetwa b̯wamwe.
13 Mukama eicala mwiguru naawona hansi,
alingiira bantu bensei̱,
14 ei̱cali̱i̱ri̱ ha kitebe kya b̯u̱lemi̱ b̯wamwe,
awona bensei̱ beicala ha nsi,
15 yogwo ahanga mitima mya bensei̱,
kandi ali̱ngani̱a byensei̱ bibakora.
16 Tihaloho mukama ajunwa b̯unene wei̱he lyamwe,
na mu̱lwani̱ akusobora kukena hab̯wa maani gaamwe.
17 Mbaraasi gya b̯ulemu tigisobora kuleeta ku̱ni̱hi̱ra kwa b̯u̱si̱ngu̱zi̱,
kandi de tigikusobora kujuna hab̯wa maani gaagyo gadi̱ ganene.
18 Bei̱tu̱ mei̱so ga Mukama geicala hali bab̯wo bamu̱ti̱i̱na,
hali bab̯wo bani̱hi̱ra mu ngonzi zaamwe zinene,
19 kwokwo asobore kubacungura mu lu̱ku̱u̱,
na kubalinda mu nzala.
20 Tuli na ku̱ni̱hi̱ra mu Mukama,
Mu̱ju̱ni̱ weetu̱ kandi ngab̯u gyei̱tu̱.
21 Mitima myetu̱ misemererwa mu yooyo,
kubba twesiga ibara lyamwe li̱ti̱i̱nwa.
22 Ai̱ Mukama, leka ngonzi zaamu zinene zitwicaleho,
tulimwo ku̱ni̱hi̱ra muli weewe.