61
Hali mu̱handu̱ wa bahi̱i̱mi̱. Kyembu nikikuutwa na kikwatu kya mahu̱u̱zi̱. Zabbu̱li̱ gya Dau̱di̱.
1 Ai̱ Ruhanga, weegwa kukunga kwange,
weetegeerye kusaba kwange.
2 Kuruga ha mmaliiro gya nsi nyeeta weewe,
mutima gwange b̯ugubba gumaalikiirwemwona maani,
onyebembere hali mwandaara,
gukukirahoona b̯ule b̯wange.
3 Kubba weewe oi̱ceeri̱ lukomera lwange,
mu̱longooti̱ gwa maani hali banyanzigwa.
4 Leka ncalire mu heema gyamu biro byensei̱!
Leka nyebi̱si̱re mu bimpaha byamu.
5 Kubba weewe ai̱ Ruhanga, weegwi̱ri̱ kurahira kwange,
wampa b̯ugwetwa b̯wa bab̯wo bati̱i̱na ibara lyamu.
6 Wongere biro bya b̯womi b̯wa mukama,
leka myaka myamwe myeyongere ku̱doosya mi̱hi̱hi̱ minene.
7 Kwokwo eicarenge ha kitebe kyamwe mu mei̱so ga Ruhanga biro byensei̱,
aragire ngonzi zinene na b̯wesigwa bimulindenge.
8 Nahab̯waki̱kyo ndiicala ni̱nku̱hi̱mi̱ra kukuhariiza,
ni̱nku̱dooseereerya miragu myange biro byensei̱.