75
Hali mu̱handu̱ wa bahi̱i̱mi̱: bikukwata ha Otahwerekereerya. Zabbu̱li̱ gyʼAsafi̱. Kyembu.
1 Ai̱ Ruhanga tu̱ku̱ku̱si̱i̱ma,
tu̱ku̱ku̱si̱i̱ma hab̯wakubba oli heehi̱ natwe,
mu mu̱li̱ngo bantu baku̱tebya byamahanu byamu.
2 Ruhanga akukoba yati, “Ha kasu̱mi̱ koonyi̱ni̱ ka ndibba nteeri̱ho,
mwomwo ndicwa musangu mu b̯winganiza.
3 Nsi b̯u̱gi̱zi̱ngi̱zi̱ka na byensei̱ bilimwo,
gyagya ntati̱i̱rya mpagi̱ zaagyo.
4 Banyamyehembo mbaweera yati, ‘Mu̱leke kwehaariiza,’
na babiibi nimbaweera yati, ‘Mu̱leke kwetembya yatyo,
5 mu̱leke kwetembya kyakalasanu̱,
kandi mu̱leke kubaza na myehaariizo yatyo.’ ”
6 Hab̯wakubba b̯u̱si̱ngu̱zi̱, tib̯uruga b̯uhulukalyoba rundi b̯ugwalyoba,
kandi tib̯uruga mwirungu,
7 bei̱tu̱ Ruhanga yooyo acwamwo,
abyokya omwei̱ hakyendi̱, wondi naamwi̱rya hansi.
8 Mu ngalu zaamwe Mukama, akweti̱ ki̱kopo,
kilimwo maaci gakwihukira, gahyangye kurungi,
akwi̱za ku̱tu̱li̱kaho nkuta agihe babiibi bensei̱ ba mu nsi,
baalinywera ki̱mwei̱ nibamalaho na bikanja.
9 Bei̱tu̱ gya nyatebyanga bya Ruhanga akoori̱,
nyahi̱i̱manga, nimpaariiza Ruhanga wa Yakobbo.
10 Myehembo mya babiibi alimitemaho,
bei̱tu̱ maani ga barungi aligabyokya hakyendi̱.