109
Hali mu̱handu̱ wa bahi̱i̱mi̱, Zabbu̱li̱ gya Dau̱di̱.
1 Ai̱ Ruhanga gimpaariiza, oteti̱keera,
2 hab̯wakubba babiibi na bagobya bagadwi̱ri̱ mi̱nwa,
bakumbazaho bigambu bya b̯u̱gobya.
3 Banyeelogoleerye na bigambu bya nnobi̱.
Baku̱ndwani̱sya ntali na ki̱mbakoori̱.
4 B̯u̱mbolokya ngonzi, bo bamparana b̯u̱harani̱,
gya mbasabira b̯u̱sabi̱ri̱.
5 Bansasula bibiibi hab̯wa b̯urungi b̯umbakoora,
nnobi̱ gyogyo bansasula hab̯wa ngonzi zi̱mboolokya.
6 Muteereho muntu mubiibi amugaane,
kandi oragire munyanzigwa waamwe, amunyegeere.
7 Musangu gwamu̱si̱nganga b̯ubalimunyegeera.
Leka kusaba kwamwe kubalwe nka kibii.
8 109:8 Bikorwa 1:20Leka biro byamwe bikeehe,
mulimo gwamwe gutwalwe muntu wondi.
9 Aleke baana baamwe zibbe nfu̱u̱zi̱,
na mu̱kali̱ waamwe akabbe mu̱kaamu̱kwere!
10 Baana baamwe bandaarenge ni̱basabi̱ri̱i̱rya,
babingwe na mu makandi gaab̯u.
11 Leka bakumutonga bamunyage b̯uli kyalinakyo,
banyamahanga batwale b̯uli bi̱yakakoori̱.
12 Hatabbaho noomwei̱ aku̱mwolekya mbabazi̱,
rundi kufaho nfu̱u̱zi̱ zaamwe!
13 Beizukulu baamwe bensei̱ bazi̱ke,
aleke ibara lyamwe li̱tali̱i̱zu̱kwa hali mu̱hi̱hi̱ gu̱kwi̱raho.
14 Leka Mukama ei̱zu̱ke kuhenera kwa bahaahaawe,
kandi na kibii kya mmaawe kitaganyirwa.
15 Leka Mukama ei̱calenge naabi̱zu̱ka b̯uli kiro,
mwomwo abasusure haha ku nsi.
16 Kubba yogwo muntu atakei̱zu̱ke kubba na mbabazi̱,
bei̱tu̱ yaalwani̱si̱i̱rye banaku na bali mu b̯wetaagu,
na bali na nganye mu mitima, yaabei̱ta.
17 Yaakyenengi̱ bandi, leka nayo bi̱mwi̱ri̱re,
Ataakendeeryenge bandi mi̱gi̱sa, leka nayo bimubbeere.
18 Ti̱yeebeera kukyena nka mulwala ngoye,
gu̱kamwi̱ngi̱re mu mubiri gwamwe nka meezi̱,
nka maku̱ta mu maku̱ha gaamwe!
19 Leka mikyenu mi̱mweli̱ngi̱ze nka ngoye,
kandi nka musupi gu̱yebbohesya b̯uli kiro!
20 Leka kibbe kifubiro kya banyanzigwa bange kuruga hali Mukama,
hali bakumbazaho kubii
21 Bei̱tu̱ we Mukama Ruhanga wange,
ndwaniira hab̯wa ibara lyamu,
hab̯wa b̯urungi b̯wa ngonzi zaamu zinene, oncungure.
22 Hab̯wakubba ndi munaku kandi museege,
nkwegwa mutima gwange gu̱hu̱u̱teeri̱.
23 Nsyereeri̱ho nka mu̱tu̱ntu̱lu̱ gwa joojolo,
banzahya b̯wahya nka nzi̱ge.
24 Malu̱ gange gaaceki̱ri̱ hab̯wa kusaba na kusiiba,
mbaju zi̱nyeregi̱ri̱.
25 Nzi̱ri̱ri̱ kyakusekwa hali banyanzigwa bange,
b̯ubambonaho ni̱bazi̱ngi̱i̱zya mi̱twe.109:25 Matayo 27:39; Mari̱ko 15:29
26 Ai̱ Mukama Ruhanga wange, onjune.
Oncungure ku̱si̱gi̱ki̱ra ha ngonzi zaamu zinene.
27 Ai̱ Mukama leka beege nti gugu guli mukono gwamu,
gwogwo gu̱ki̱koori̱.
28 Leka bankyene,
bei̱tu̱ olimpa mu̱gi̱sa!
B̯u̱bali̱ndu̱mba balisigala na muswaru,
bei̱tu̱ gya muheereza waamu nsigale nsemereerwe!
29 Leka banyanzigwa bange bakwatwe nsoni̱,
babbu̱mbwe nsoni̱ nka ngoye zi̱balweri̱.
30 Mu̱nwa gwange gu̱kwi̱za ku̱si̱i̱ma Mukama, na maani ganene,
ndimuhaariiza mu lugologombo lwa bantu,
31 kubba atongoneera munaku,
naamujuna hali bakumucwera gwa ku̱kwa.