138
Zabbu̱li̱ gya Dau̱di̱.
1 Ai̱ Mukama, nku̱ku̱si̱i̱ma na mutima gwange gwensei̱,
ninkukuhaariiza mu mei̱so ga mbandwa.
2 Hab̯wa ngonzi zaamu zinene na hab̯wa b̯wesigwa b̯wamu,
ni̱nku̱ramya mu Yeekaru gyamu gi̱syanu̱,
ni̱nku̱si̱i̱ma hab̯wa ibara lyamu,
kubba otu̱mbi̱i̱rye ibara lyamu na bigambu byamu
kukira bintu byensei̱.
3 B̯u̱nyaku̱ku̱ngi̱ri̱ wanzi̱ri̱ri̱mwo,
wampa maani wantati̱i̱rya mutima.
4 Ai̱ Mukama, bakama ba mu nsi bensei̱ baakuhaariizanga,
kubba beegwi̱ri̱ bigambu byamu.
5 Baku̱hi̱i̱mi̱ranga hab̯wa bikorwa bya Mukama,
hab̯wakubba ki̱ti̱i̱ni̱sa kya Mukama kinene.
6 Mukama nab̯uyaabba nali mwiguru, awooneera bab̯u̱ndaaru̱,
bei̱tu̱ banyamyehembu abeega nibali hadei.
7 Nab̯unyaabba ngoteerwe b̯ujune kunu na kunu,
weewe olinda b̯womi b̯wange,
gorora mukono gwamu, okwate ki̱ni̱ga kya banyanzigwa bange,
mukono gwamu gwab̯udyo gunjune.
8 Mukama ali̱doosereerya ki̱kyo ki̱yantegekeeri̱,
ngonzi zaamu zinene, ai̱ Mukama, za biro na biro.
Otaligumirisana mulimo gwa ngalu zaamu.