144
Zabbu̱li̱ gya Dau̱di̱.
1 Ahaariizwe Mukama, lubbaali lwange,
antendeka mu byakulwana na mu byab̯ulemu,
2 anzolokeerya ngonzi zinene kandi lugo lwange,
b̯wi̱ru̱ki̱ro b̯wange kandi ancungura,
ngab̯u gyange, hali nzi̱ru̱ki̱ra,
afuga mahanga gali hansi gyange.
rundi kikuha kumuteekerezaho, kyokyo kyani?
4 Muntu eisana rwoya,
biro byamwe biisana mu̱tu̱ntu̱lu̱ guteicalaho.
5 Ai̱ Mukama, i̱namya iguru lyamu osi̱ri̱mu̱ke hansi,
kwata ku nsahu zi̱tu̱u̱ke mwi̱ca!
6 Osi̱ndi̱ke nkuba, orarangye banyanzigwa,
lasa mbasi gyamu gibabinge.
7 Weemeera mwiguru odambule mukono gwamu onsahule kandi njuna,
ontoole mu meezi̱ ganene ga mu ndi̱ha,
na mu ngalu za banyamahanga,
8 banyami̱nwa mikabaza b̯u̱gobya
kandi bakarahira bya b̯u̱gobya babyokeerye mikono myab̯u mya b̯udyo.
9 Ai̱ Ruhanga, nkwi̱za ku̱ku̱hi̱i̱mi̱ra kyembu kihyaka,
ninkukuutira ki̱dongo kya hu̱u̱zi̱ i̱ku̱mi̱,
10 weewe oha bakama ku̱si̱ngu̱ra,
ojuna Dau̱di̱ muheereza waamu mpirima gya ku̱mwi̱ta.
11 Nsahula kandi oncungure
kuruga mu ngalu za banyamahanga,
banyami̱nwa mikabaza b̯u̱gobya
na bakarahira b̯u̱gobya babyokeerye mikono myab̯u mya b̯udyo.
12 Batabani̱ beetu̱ mu b̯usigazi b̯wab̯u
kababbenge nka bimera bi̱handu̱,
bahara beetu̱ kababbenge nka mpagi̱ za ku nsonda
zi̱sali̱i̱rwe ku̱bi̱mba kikaali.
13 Bideeru byetu̱ byeizulanga
nibibooga bilimwa bya mi̱li̱ngo myensei̱,
ntaama zeetu̱ kazibyalenge byana nku̱mi̱
na b̯usiriira mu mali̱i̱si̱i̱ryo geetu̱.
14 Nte zeetu̱ zaabyalanga nnyana,
zaabyalanga zi̱taki̱ki̱ri̱ rundi kutorooga,
ngu̱u̱do zeetu̱ zaabbanga zitalimwo kizabiro.
15 Bali na mu̱gi̱sa baliheeb̯wa mi̱gi̱sa nka mi̱myo!
Bali na mu̱gi̱sa ba Ruhanga waab̯u ali Mukama!