Kuwonekerwa kwa
Yohaana
Kwanjuura
Kitabbu kya Kuwonekerwa kwa Yohaana kyokyo kitabbu kya kumaliira mu Ndagaanu Gihyaka. Kyokyo de kinyakusembayo kuhandiikwa mu bitabbu byensei̱ bya Ndagaanu Gihyaka. Kitabbu kiki kyahandi̱i̱ki̱i̱rwe mukwenda Yohaana harabi̱ri̱ho myaka nka kyenda (90) Ku̱ri̱si̱to amaari̱ kubyalwa. Yohaana yogwo yooyo de ateekerezeb̯wa kubba yaahandi̱i̱ki̱ri̱ Makuru Garungi nka ku̱gaahandi̱i̱ki̱i̱rwe Yohaana hamwenya na bbaruha isatu za Yohaana: 1 Yohaana, 2 Yohaana, 3 Yohaana. Yaahandi̱i̱ki̱ri̱ kitabbu kiki naali mu ki̱zi̱nga kya Pati̱mo cali baalingi bamu̱bboheeri̱ hab̯wa ku̱tebyanga Makuru Garungi ga Yesu̱ Ku̱ri̱si̱to 1:9. Yaaki̱handi̱i̱ki̱i̱ri̱ beikiriza benseenya na maani maani bab̯wo ba bitebe musanju bya beikiriza (2—3).
Kigyendeerwa ki̱handu̱ kinyakuha Yohaana kuhandiika kitabbu kiki kyali kya kwekambi̱sya beikiriza banyakubba nibakuraba mu ku̱ru̱mbwa aleke basobore kwicala nibali beesigwa hali Mukama Yesu̱ Ku̱ri̱si̱to, hab̯wakubba kasu̱mi̱ ka Ku̱ri̱si̱to kwi̱ra kaalingi nikali heehi̱ kudwa (1:3; 22:7). Mu kitabbu kiki Yohaana akoba beikiriza ba Ku̱ri̱si̱to bakuteekwa kwicalanga beeteekani̱i̱ze ku̱kwa hab̯wa kuha Ku̱ri̱si̱to ki̱ti̱i̱ni̱sa. Yohaana atwala b̯ukwenda b̯wa mu kitabbu kyamwe kubba nib̯uli b̯wa kuragura (1:3) kandi akoresya bi̱si̱sani̱ binene kusoboora bintu bi̱yaaweeni̱. Bi̱mwei̱ ha bi̱si̱sani̱ bi̱byo biisana bya mu Ndagaanu Gikadei na maani maani Zaakali̱ya 6:1-8. Ngwara musanju na b̯ucuba musanju b̯wa ki̱ni̱ga kya Ruhanga b̯uli nka nseeri̱ musanju za bi̱i̱zo za Ruhanga zi̱yaasi̱ndi̱ki̱i̱ri̱ Banyami̱si̱ri̱.
Bicweka bisatu bi̱handu̱, bya b̯ukwenda b̯uli mu kiki kitabbu byobyo bibi:
1. Mu nsi mumu, heicalamwo maani ga Sitaani na bintu bindi bi̱lwani̱sya Ruhanga. Gagwo maani gakora bintu bibiibi; kandi nigasobora ku̱wonawonesya, rundi kwi̱ta beikiriza ba Yesu̱ Ku̱ri̱si̱to;
2. Yesu̱ eicala Mukama; kandi de akwi̱za ku̱si̱ngu̱ra bintu byenseenya.
3. Ruhanga yaabi̱i̱ki̱i̱ri̱ bantu bamwei̱ beesigwa, mi̱gi̱sa minyamaani; na kukira maani bab̯wo, bakwa nibakumukoora.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Bigambu bikubanza 1:1-20
(ii) Bbaruha hali bitebe musanju bya beikiriza ba Yesu̱ 2:1—3:22
(iii) Bintu bya Yohaana bi̱yaaweeni̱ mwiguru 4:1—5:14
(iv) Bilengeru musanju binyakubba ha kintu ki̱zi̱nge nka lupapurwa 6:1—8:1
(v) Ngwara musanju 8:1—11:19
(vi) Kihiri na Yesu̱ Mwana gwa Ntaama 12:1—15:8
B̯ucuba musanju 16:1-21
(vii) Ku̱gwa kwa Rub̯uga lwa Bbabbu̱looni̱; Ku̱si̱ngu̱rwa kwa kisolo, kwa Mu̱ragu̱ri̱ wa b̯u̱gobya na kwa Sitaani Mwohya 17:1—20:10
(viii) Kusala misangu ku̱kwi̱za kubbayo mu b̯u̱su̱mi̱ b̯wa kumaliira; Iguru lihyaka; Nsi gihyaka na Yeru̱salemu̱ Gihyaka 20:11—22:5
(ix) Bigambu bikuheregera 22:6-21
1
Bigambu bya Mu̱handi̱i̱ki̱ Bi̱yaatandi̱ki̱si̱i̱rye
Kitabbu kiki, kibaza ha bintu bya Ruhanga bi̱yaamu̱lu̱ki̱i̱ri̱ Yesu̱ Ku̱ri̱si̱to, Mutongoole waamwe. Bi̱byo bintu, Ruhanga yaabi̱mu̱lu̱ki̱i̱ri̱ Yesu̱ Ku̱ri̱si̱to, aleke Ku̱ri̱si̱to abyolokye baheereza baamwe, beege bintu bikugyenda kubbaho, mu b̯u̱su̱mi̱ b̯wa heehi̱ hoi̱. Ku̱ri̱si̱to, yaatu̱mi̱ri̱ malayika waamwe, ei̱ze bi̱byo bintu abimmulukire, gya Yohaana muheereza waamwe. Gya Yohaana, b̯u̱nyaabi̱tu̱ngi̱ri̱, byenseenya nyaabihandiika nimbisobooraho, nka ku̱nyaabi̱weeni̱ mu kuwonekerwa kwange ku̱kwo. Bi̱byo bigambu bya mananu, bi̱nyaatoori̱ hali Ruhanga, ku̱si̱gi̱ki̱ra Yesu̱ Ku̱ri̱si̱to nka ku̱yaabi̱mmu̱lu̱ki̱i̱ri̱, byo mbibi: Ruhanga akwi̱za kuha mu̱gi̱sa, yogwo yenseenya alisoma b̯ub̯u b̯ukwenda b̯unyakuruga hali Ruhanga; kandi de, aliha mu̱gi̱sa, bab̯wo benseenya bab̯wetegeerya kandi nibahondera kib̯ukuragira! Hab̯wakubba, b̯wi̱re b̯wa Ruhanga b̯u̱yaateekani̱i̱ze bibi bintu byenseenya bili mu b̯ub̯u b̯ukwenda bi̱dwereere, b̯uli heehi̱ kudwa.
Yohaana Naaramu̱kya Bitebe Musanju bya Beikiriza ba Yesu̱
Bbaruha gigi gi̱ru̱gi̱ri̱ hali gya Yohaana, kandi, ngi̱handi̱i̱ki̱i̱ri̱ bitebe musanju bya beikiriza ba Yesu̱, biicala mwisaza lyʼAsi̱ya.
Nkubasabira, Ruhanga Bbaa weetu̱, yogwo munyakubbaho, aloho, kandi de alibbaho, abagiire mbabazi̱, kandi abahe b̯u̱si̱nge. Kandi de nkubasabira, na Mwozo waamwe, yogwo agira b̯u̱sobozi̱ b̯wenseenya* 1:4 Bbai̱bbu̱li̱ zindi zi̱koresya: Myozo musanju b̯wa Ruhanga kandi eicala mu mei̱so ga kitebe kya b̯ukama b̯wa Ruhanga, nayo abagiire mbabazi̱ kandi abahe b̯u̱si̱nge. Kandi de nkubasabira, na Yesu̱ Ku̱ri̱si̱to, Mutongoole wa Ruhanga, yogwo mu̱kei̱so mwesigwa ha bintu bikukwatagana na mananu ga Ruhanga, nayo abagiire mbabazi̱ kandi abahe b̯u̱si̱nge. Yogwo Yesu̱ Ku̱ri̱si̱to, yooyo munyakubanza kuhimbooka kuruga mu baku̱u̱, kandi de yooyo alema bakama ba mu nsi.
Yogwo Yesu̱ atwendya mbe. B̯u̱yeeheeri̱yo ku̱kwa hab̯wa bibii byetu̱, ku̱kwa kwamwe kwabba kyonzira kya kutujuna bi̱byo bibii. Ku̱kwa kwa Yesu̱ ku̱yaatu̱kwereeri̱, kwatu̱foori̱ ihanga lya balaami̱ ba Ruhanga, kandi, kwatuha kubba baheereza ba yogwo Ruhanga Bbaawe. Nahab̯waki̱kyo, ki̱ti̱i̱ni̱sa na b̯u̱sobozi̱, bibbe hali Yesu̱ Ku̱ri̱si̱to biro na biro. Amiina.
Wona, Ku̱ri̱si̱to ali̱i̱zi̱ra mu bikaka, nei̱za kusalira musangu nkori̱ za bibii. Bantu benseenya, balimuwona. Na bab̯wo banyaku̱mu̱tu̱u̱ta baamwi̱ta, nabo balimuwona. Bantu babiibi ba nganda zenseenya za mu nsi, balilira na b̯u̱ti̱i̱ni̱ b̯unene hab̯wa kifubiro kyalibba naakugyenda kubaha. Amiina!
Mukama Ruhanga yaabazi̱ri̱ naakoba, “Ndi Mukama Ruhanga wa b̯u̱sobozi̱ b̯wenseenya, yogwo munyakubbaho, kandi aloho kandi akwi̱za kubbaho; gyagya Alufa nʼOmega.”
Ku̱ri̱si̱to Munyakuhimbooka Naawonekera Yohaana
Gya, Yohaana, mwikiriza wa Yesu̱ Ku̱ri̱si̱to mwi̱ra weenyu̱ akubagana nanywe mu Yesu̱: kuwonawona na kugumisiriza, hamwei̱ na b̯ukama b̯wa Ruhanga, bantweri̱ nka munyankomo ku ki̱zi̱nga kya Pati̱mo. Bantweri̱ hab̯wakubba nyaatebyengi̱ b̯ukwenda b̯wa Ruhanga, kandi, nimbwera bantu, bigambu bikukwatagana na Yesu̱. 10 Ha kiro kya beikiriza ba Yesu̱ ki̱baromberamwo ku̱ramya Mukama, Mwozo wa Ruhanga yanzi̱zi̱ri̱ho, nyeegwa i̱nyu̱ma lyange ni̱hali̱yo iraka likooto, likubaza nka lya lugwara. 11 Iraka li̱lyo lyambwereeri̱ yati: “Bi̱byo bintu byokuwona, bihandiike mu kitabbu, obi̱si̱ndi̱ke, babitwalire bitebe musanju bya beikiriza ba Yesu̱. Bitebe hooku̱bi̱si̱ndi̱ka, bili bya beikiriza ba Yesu̱, bab̯wo beicala mu mbuga zizi musanju: Rub̯uga lwʼEfeeso, Su̱mi̱ru̱na, Peru̱gamo, Ti̱yati̱i̱ra, Saadi̱, Filadelufiya, na lwa Lawu̱di̱keeya.”
12 Mu kuwonekerwa ku̱kwo, b̯u̱nyaahi̱ndu̱ki̱ri̱ kuwona muntu munyakubba naakubaza nagya, nyaaweeni̱ bikondo musanju bi̱badengeetyaho taara, binyakubba bi̱koleerwe kuruga mu zaabbu. 13 Mu bi̱byo bikondo, haalingimwo munyakunsisaniranga nka Mwana wa muntu. Yaali alweri̱ kanzu gilei, ginyakubba nigikumudwa hansi mu magulu. Kandi de, mu salaka gyamwe, yaali alweri̱ muheeku gunyakubba gu̱koleerwe kuruga mu zaabbu. 14 Ntumbu zaamwe zaalingi zi̱syanu̱ tei̱, nka matei rundi nka byoza bya nyangi̱. 1:14 Bbai̱bbu̱li̱ zindi zi̱koresya: nka byoza bya ntaama gi̱syanu̱ rundi nka bi̱ri̱ka. Mei̱so gaamwe gaakengi̱ nka ndimi za mworo. 15 Magulu gaamwe, gaalingi gengu̱ nka kyoma kyokye mu mworo. Kandi b̯u̱yaabazi̱ri̱, iraka lyamwe lyei̱sanengi̱ nka lya meezi̱ ganene gakwekuuta kuruga hakyendi̱ hoi̱. 16 Mukono gwamwe gwa b̯udyo, gwali gu̱kweti̱ nzota musanju. Mu mu̱nwa gwamwe, haaru̱gi̱ri̱mwo mpirima. B̯u̱syo b̯wamwe, b̯wamu̱lu̱kengi̱ nka lyoba ku̱lyaka b̯wi̱re b̯weihangwe.
17 B̯u̱nyaamu̱weeni̱, nyaagwi̱ri̱ hansi mu magulu gaamwe nka mu̱ku̱u̱. Mwomwo yaadambula mukono gwamwe gwa b̯udyo, yankwataho nambwera, “Leka ku̱ti̱i̱na, gyagya Ntandiko kandi Mmaliiro gya bintu byenseenya. 18 Ndi mwomi! nab̯unyakabba nyaakwi̱ri̱, hataati̱ ndi mwomi; kandi, nkwi̱za kwomeera biro na biro. Ncala na b̯u̱sobozi̱ b̯wa kuhimboola baku̱u̱ na b̯wa kubaahula baruge kuzumu. 19 Nahab̯waki̱kyo, handiika bi̱byo bintu byoweeni̱. Handiika bi̱byo bilohoona hataati̱, kandi ohandiike na bi̱byo, bi̱kwi̱za kubbaho mu mei̱so. 20 Makuru gagwo, +gaakali +gakwebi̱si̱ri̱i̱ri̱, ga nzota musanju +zi̱waaweeni̱ mu mukono gwange gwa b̯udyo, googo gaga: Nzota musanju +zaakali mu mukono gwange, +zaakali ku̱manyi̱sya beeku̱lemberi̱ nka bamalayika, balingiira bitebe musanju bya bantu beikiririza mu gya Yesu̱. Kandi, makuru gagwo ga bikondo musanju byaku̱dengeetyaho taara, binyakubba bi̱koleerwe mu zaabbu, googo gaga: Bi̱byo bikondo, byobyo bitebe musanju bya bantu beikiririza mu gya Yesu̱.”

*1:4 1:4 Bbai̱bbu̱li̱ zindi zi̱koresya: Myozo musanju

1:14 1:14 Bbai̱bbu̱li̱ zindi zi̱koresya: nka byoza bya ntaama gi̱syanu̱ rundi nka bi̱ri̱ka.