Bbaruha gya Pau̱lo hali
Ti̱to
Kwanjuura
Bbaruha gigi gya Ti̱to gyahandi̱i̱ki̱i̱rwe Pau̱lo, mukwenda wa Yesu̱ Ku̱ri̱si̱to, naagihandiikira mwikiriza Ti̱to. Gili gi̱mwei̱ ha bbaruha za Pau̱lo zi̱yaahandi̱i̱ki̱i̱ri̱ muntu b̯untu, kitali kitebe kya beikiriza. Bbaruha zindi zoozo: 1 Ti̱mi̱teo, 2 Ti̱mi̱teo, na Fi̱ri̱mooni̱. Ti̱to yaalingi omwei̱ ha Bayonaani banyakubanza kwikiririza mu Yesu̱ Ku̱ri̱si̱to kuraba mu b̯uheereza b̯wa Pau̱lo. Ti̱to amaari̱ kwikiririza mu Ku̱ri̱si̱to, Pau̱lo yaamu̱komi̱ri̱ karei, yaabba akumugwera. Pau̱lo amaari̱ kuruga Rooma mu nkomo, b̯uyaali naakugyenda mu lugyendu lwamwe lwakanei, lwa ku̱tebya Makuru Garungi ga Ku̱ri̱si̱to, yaatwalageeni̱ Ti̱to; baadwa baatandi̱ki̱sya kitebe kya beikiriza mu ki̱zi̱nga kya Ku̱leeti̱. Pau̱lo b̯uyaalingi naacaali mu lugyendu lwamwe lu̱lwo, yaaweereeri̱ Ti̱to asigale Ku̱leeti̱, alingiire kitebe kya beikiriza kyayoona.
Mu bbaruha gigi, Pau̱lo yei̱zu̱ki̱i̱rye Ti̱to nka kukili ki̱handu̱ beebemberi̱ ba bitebe bya beikiriza hamwenya na beikiriza ba bitebe bi̱byo nka kubakusemeera kubba mbura kakuu, na maani maani mu Ku̱leeti̱ hab̯wi̱re b̯u̱b̯wo gi̱nyaku̱bba gyegebeerwe hab̯wa b̯wenzi̱. Beikiriza ba Ku̱ri̱si̱to bakusemeera kwicala nibagyendera ha nzegesya gya mananu, makuru gaakyo nti, nibali na ngesu zirungi, nibakwetamwo ki̱ti̱i̱ni̱sa kandi batendekeerwe hab̯wa mbabazi̱ za Ruhanga kwicala nibali na b̯urungi. Muntu ali na b̯u̱kei̱so b̯wa ngesu zirungi mu mei̱so ga Ruhanga na bantu, abba na b̯u̱kei̱so b̯unyamaani kukira muntu akubaza-b̯u̱bazi̱ bigambu binene.
Bicweka Bi̱handu̱ bya mu Bbaruha gigi nka Ku̱bi̱honderegeeni̱
(i) Pau̱lo niyeeranga 1:1-4
(ii) Pau̱lo naaragira Ti̱to akome badulu bakwegwa Ruhanga 1:5-16
(iii) Pau̱lo naaragira Ti̱to yeegesye bantu kwegwanga Ruhanga 2:1—3:11
(iv) Pau̱lo naamaliira bbaruha gyamwe nakwolokya ntegeka gyamwe kandi na bi̱ramu̱kyo 3:12-15
1
Pau̱lo Naaramu̱kya Ti̱to
1 Bbaruha gigi gi̱ru̱gi̱ri̱ hali gya Pau̱lo, wa Ruhanga gi̱yaakomi̱ri̱ kubba muheereza waamwe, kandi mukwenda wa Yesu̱ Ku̱ri̱si̱to, Mutongoole wa Ruhanga. Ruhanga yankomi̱ri̱, aleke nyeebembere bantu baamwe bayaakomi̱ri̱ kumwikiriza, basobore kumwikiririzamwo kurungi; kandi de, yankomi̱ri̱, aleke nyeegesye bantu baamwe, mananu gakukwatagana nayo, gabahe kubba na ngesu, yo zaaku̱si̱i̱ma. 2 Ruhanga yankomi̱ri̱, aleke kintu kya bantu kumwikiririzamwo kurungi, na ki̱kyo kya bantu kwega mananu gakukwatagana nayo, bisobore kubaha ku̱gu̱mya nti kwo, hali̱yo b̯womi b̯utamalikaho. B̯womi b̯u̱b̯wo b̯wob̯wo Ruhanga, yogwo abaza mananu b̯u̱yaaragani̱si̱i̱rye, atakabbeeri̱ na kuhanga nsi. 3 Mu b̯wi̱re b̯u̱yaateekani̱i̱ze, Ruhanga yaatu̱b̯u̱ku̱li̱i̱ri̱ Makuru Garungi, ga b̯womi b̯u̱b̯wo b̯utamalikaho, naaraba mu b̯ukwenda b̯u̱yaatu̱heeri̱ tu̱tebeerye bantu. B̯u̱b̯wo b̯ukwenda nku̱b̯u̱tebya, kubba yo Ruhanga mu̱ju̱ni̱ weetu̱, yooyo yandagi̱i̱ri̱ ku̱b̯u̱tebya.
4 Bbaruha gigi, Ngi̱handi̱i̱ki̱i̱ri̱ we, Ti̱to, oli nka mwana wange gi̱nyeebyali̱i̱ri̱; kubba, gyagya mu̱nyaku̱ku̱tebeerya bigambu bya Ruhanga, waadwa ha kubiikiriza, nka gya ku̱nyaabi̱i̱ki̱ri̱i̱ze.1:4 2 Bakoli̱nso 8:23; Bagalati̱ya 2:3; 2 Ti̱mi̱teo 4:10
Nkukusabira, Ruhanga Bbaa weetu̱ hamwei̱ na Yesu̱, Mutongoole wa Ruhanga mu̱ju̱ni̱ weetu̱, bakugiire mbabazi̱ kandi bakuhe b̯u̱si̱nge.
Mulimo gwa Ti̱to naali mu Ki̱zi̱nga kyetwa Ku̱leeti̱
5 Nyaaku̱ti̱gi̱ri̱ Ku̱leeti̱, aleke osobore ku̱terekereerya bintu byenseenya binyakubba ni̱bi̱cakeetaagi̱sya kukora, kandi de, okome bahandu̱ ba kitebe kya beikiriza, mu b̯uli rub̯uga lulimwo beikiriza ba Yesu̱. Nyaaku̱ragi̱i̱ri̱ ninkoba yati: 6 Muntu gyokukoma kubba mu̱handu̱ wa kitebe kya bantu bakwikiririza mu Yesu̱ Ku̱ri̱si̱to, akuteekwa kubba atali na kakuu. Akuteekwa kubba naali na mu̱kali̱ omwei̱, kandi naali mwesigwa ku mu̱kali̱ yogwo. Baana ba yogwo mu̱handu̱, bakuteekwa kubba nibakwikiririza mu Yesu̱ Ku̱ri̱si̱to, kandi, batali bahab̯u̱ rundi bajeemu̱. 7 Hab̯wakubba, yogwo mu̱handu̱ akulingiira, nka kwali muntu akwebembera mulimo gwa Ruhanga, akuteekwa kubba atali na kakuu. Akusemeera kwahi kubba muntu akukora bintu nka kwakaagi̱i̱rye, rundi akuranguha kukwatwa biniga, rundi mu̱tami̱i̱ru̱, rundi akuranguha kutab̯uka rundi wa lwozo lwa sente. 8 Mu kiikaru kya kubba na ngesu zibiibi nka zi̱zo, akuteekwa kubba muntu akukunira bagenyi̱, akwendya b̯irungi, mu̱teekanu̱, mu̱terekereru̱, wa mutima gu̱syanu̱, kandi wa ngesu. 9 Kandi de, yogwo mu̱handu̱, akuteekwa kubba naakwikiririza ki̱mwei̱ nzegesya gi̱teerekereru̱ gikukwatagana na Yesu̱ Ku̱ri̱si̱to, nka ku̱baagi̱mwegeseerye, kandi, naali mu̱si̱gi̱ku̱ mu nzegesya gi̱gyo. B̯u̱b̯wo mwomwo akusobora kwekambi̱sya beikiriza ba Yesu̱ bandi, naabegesya kurungi mananu ga bigambu bya Ruhanga. Kandi de, b̯u̱b̯wo mwomwo akusobora kuhab̯ura bab̯wo baku̱mu̱ku̱u̱ti̱sya mpaka zikukwatagana na nzegesya gya ki̱ku̱ri̱si̱taayo.
10 Hab̯wakubba hataati̱, halohoona bantu banene bakusuula nzegesya gi̱doori̱, na kukira maani bab̯wo banyakubanza kwikiririza mu nzikiriza gya Kiyudaaya, kasi hei̱nyu̱ma beikiririza mu Yesu̱ Ku̱ri̱si̱to. Bab̯wo bantu baakusuulanga bigambu bya Ruhanga, ni̱bagoogobya bantu bandi, na bigambu byab̯u bitali na magezi̱. 11 Hati̱ nu, we na bahandu̱ bookukoma, mukusemeera kubagaana baleke kwegesya bi̱byo bigambu bi̱bakwegesya, hab̯wakubba bakutab̯uratab̯ura maka, na kwegesya bantu bintu bibatakusemeera kwegesya. Kandi b̯u̱b̯wo, kwega kili kya muswaru, bakwegesya bi̱byo bigambu, hab̯wa kwendya kutungamwo sente. 12-13 Omwei̱ mu baragu̱ri̱ baab̯u, munyakubba yoodede Mu̱ku̱leeti̱, yaabazi̱ri̱ mananu, b̯u̱yaakobi̱ri̱ yati, “Bakuleete, beicala bagobya, bazib̯u, kandi baamu̱tali̱bei̱ne kukoragana nabo,*1:12-13 Bbai̱bbu̱li̱ zindi zi̱koresya: bisolo bibiibi bya mwirungu beicala bagarei, kandi beicala na lwozo lwa bidyo.” Nahab̯waki̱kyo bab̯wo beikiriza ba Yesu̱ ba Ku̱leeti̱, bakuhondera nzegesya gi̱ku̱habi̱sya, osemereeri̱ kubacoomera. Kintu kya kubacoomera, ki̱kwi̱za kubaha kwikiririza ki̱mwei̱ nzegesya gya mananu.
14 Kandi, ki̱kwi̱za kubaha de kulekaho kwebboheera bihanuuro bya Bayudaaya bi̱beeteereri̱ho. Kandi de, ki̱kwi̱za kubaha kuleka kuhondera biragiro bya bantu baswi̱ri̱ mananu ga Ruhanga. 15 Bantu bahondera biragiro bya Ruhanga nibali na mitima mi̱syanu̱, beezi̱ri̱syazi̱ri̱sya kwahi, b̯uli kintu kibba kirungi hali bo. Bei̱tu̱ bantu babba na mitima mi̱i̱ragu̱ru̱, kandi batakwikiririza mu Ku̱ri̱si̱to, Mutongoole wa Ruhanga, bab̯wo bo, babba kwahi na kintu kyenseenya kibatwala kubba kirungi. Bo biteekerezu byab̯u bya kwahu̱kani̱a kibiibi na kirungi, bibba bi̱heneki̱ri̱. 16 Kandi, nab̯ubaabba beetwala kubba beegi̱ri̱ Ruhanga, bei̱tu̱ kandi bikorwa byab̯u bibiibi byolokya nti bamwegi̱ri̱ kwahi; hab̯wakubba bantu ba yatyo, Ruhanga abanu̱ga-b̯u̱nu̱gi̱, bamwegwa kwahi, kandi tibasobora kukora kintu kyenseenya kirungi.