1 Hiva va kamo ni tinasuna e Setani sari na tinoni Izireli, ke poni nia binalabala sa se Devita pude nae i sari na tie pa Izireli. 2 Ke zama ia Devita se Zoabi meke sari na koimata koari na tie varipera, “Mi la nae i sari na tie Izireli, podalae pa Biasiba kamo pa Dani, meke pule mae tozi nau pude boka gilania rau ka visa sinokudi sari na tie.”

3 Olaṉa se Zoabi, “Mani va sokui e Zihova sari na tinoni Izireli, keke gogoto totoso hola nia sapu korapa koa kamahire! Qua baṉara, vegua na lopu na mua nabulu tu sari doduru? Na vegua ke hiva tavetia agoi sa ginugua hie? Vegua, ke hiva va kamo ni sinea agoi sari na tie Izireli?”*Sa tinarae te Tamasa pa Ekisidasi 30:12 si tozia sapu be ta nae sari na tie Izireli si ta hivae pude tabara poata pude holu hobe ni sari na dia tinoa. 4 Ba sa zinama tanisa baṉara si turu hola ke taluarae se Zoabi meke vura la nae i sa sari na tie Izireli pa doduruna sa popoa Izireli meke kekere pule mae si asa pa Zerusalema. 5 La tozia Zoabi koe Devita sa doduruna sa ninaedi rina tie sapu garo pude somana koasa qeto minate: keke vuro keke gogoto tina tie pa Izireli, somanadi koasa ninae asa si ka made gogoto zuapa ṉavulu tina tie pa butubutu Ziuda. 6 Ba lopu vagi sa sari na ninaedi ri na butubutu te Benisimane meke Livae sina sea la koe Zoabi sa ginarunu tanisa baṉara.

7 Lopu qetu nia sa Tamasa sapu gua ele ta tavete, ke va kilasia Sa sa butubutu Izireli. 8 Meke zama la se Devita koasa Tamasa, “Ele tavetia rau si keke sinea nomana hola! Mamu taleoso nau, na dinuviduvili si tavetia rau.”

9 Ke zama se Zihova koe Qadi, sa poropita te Devita, 10 “La mamu tozi nia se Devita, sapu ka ṉeta ginugua si poni nia Arau koasa, meke pude vizatia sa si keke. Asa sapu vizatia sa si kaqu tavetia Arau.”

11 La tozi nia Qadi se Devita, “Zama guahe sa Tamasa, ‘Vizatia sapu hiva nia goi: 12 Ka ṉeta vuaheni soṉe, babe ka ṉeta sidara ta hadu luli koari na mua kana meke ta raza pilipule koari na dia tie varipera, babe ka ṉeta rane koasa vedara te Zihova sapu na oza. Kote garunu atu nia Sa pa popoa Izireli turaṉae sa Nana mateana sapu kaqu vata evaṉia sa minate pa doduruna sa popoa Izireli.’ Ego, mamu vizatia sa sa inolaṉa kaqu paleke pule la nia rau koe Zihova.”

13 Olaṉa se Devita koe Qadi, “Tasuna hola si arau koasa ginugua hie! Ba lopu hiva tava kilasa pa keke tie si rau. Mani telena e Zihova va kilasa au, sina noma hola tugo sa Nana tataru.”

14 Ke garunu la nia e Zihova sa oza pa Izireli, meke ka zuapa ṉavulu puta tina tie Izireli si mate. 15 Sipu podalae hiva va matei sa mateana te Zihova si pa Zerusalema, si hobea e Zihova sa nana binalabala koasa vina kilasadi rina tie, meke zama ia Sa sa mateana sapu va matedi ri, “Beto! Pada mo!” Turu kapae nana sa mateana koasa vasina te Aruna sa tie Zebusaiti vasina tana vari paqaha kiko huiti koari na qaqalotodi.

16 Meke eṉa sage se Devita meke dogoria sa sa mateana korapa turu nana pa galegalearane pa vari korapana sa kasia popoa meke maṉauru, taṉinia nana sa vedara pude huhuara pa Zerusalema. Ke hoqa oporapaha la pa pepeso se Devita meke sari na koimata pa Izireli, poko ni rini sari na poko baika. 17 Meke varavara la koe Tamasa se Devita, “Kei Tamasa, arau mo si tavetia sa sinea. Arau mo tozi ni pude naei sari na tie varipera. Ba sari na tie hire si kekeṉoṉo gua rina sipi. Nasa sa sinea tadi na tie hire? Kei Zihova qua Tamasa, Mu va kilasau mo meke sari qua tatamana. Mamu va rizu pania sa vina kilasa hie koari na Mua tinoni.”

18 Meke tozi nia sa mateana te Tamasa se Qadi pude la tozi nia se Devita pude sage la meke kuria keke hope te Zihova koasa vasina te Aruna sa tie Zebusaiti vasina tana vari paqaha kiko huiti koari na qaqalotodi. 19 Va tabea Devita sa zinama te Tamasa meke sage la, gua sapu tozi nia Qadi koasa. 20 Sipu korapa varipaqahi ni Aruna sari na kiko huiti koari na qaqalotodi si taliri si asa meke dogoria sa sa mateana; sari ka made tuna koreo pu koa turaṉia si govete meke la tome dia. 21 Totoso dogoria Aruna se Devita sa baṉara korapa ene mae, si taluarae si asa koasa vasina tana vari paqaha kiko huiti koari na qaqalotodi, meke todoṉo gore pa kenuna e Devita, sa isumatana si tiqu la pa pepeso. 22 Zama la se Devita koasa, “Mu holuholu mae nia koa rau sa mua vasina tana vari paqaha kiko huiti koari na qaqalotodi, pude maqu kuria sa hope te Zihova, pude va nosoa sa oza sapu raza koari na tie. Kaqu vatu nia rau sa doduruna sa hinoluna sa.”

23 Olaṉa se Aruna, “Qua baṉara, mamu vagia, mamu tavetavete nia gua sapu hiva tavetia goi. Hire sari na bulumakao pude va vukivukihi va uququ ni koasa hope, meke hire sari labelabetena sa munamunalana pude sa hudana sa nika meke na huiti, pude tana vinariponi huiti. Poni beto atu ni rau koa goi sari doduru hire.”

24 Ba olaṉa sa baṉara Devita, “Lokari, na kaqu tabaria rau sa doduruna sa hinoluna. Lopu kaqu vagi moka ponia rau se Zihova koari na likakalae sapu tamugoi meke tavetia sa vinukivukihi.” 25 Ke tabaria Devita koe Aruna sa hinoluna sa vasina tana vari paqaha kiko huiti koari na qaqalotodi ka onomo gogoto poata qolo. 26 Meke tiqe kuria Devita sa hope te Zihova meke veko vala nia sa sa vinukivukihi vina uququ meke sa vinukivukihi binaere. Varavara si asa meke olaṉia Zihova ke garunu gore la nia Sa sa nika mae gua pa maṉauru pude sului sari na vinukivukihi koasa hope.

27 Meke tozi nia Zihova sa mateana pude vekoa pa nana vovoina sa nana vedara, ke va tabea sa mateana. 28 Dogoria Devita sapu olaṉia Zihova sa nana vinaravara, ke va vukivukihi si asa koasa hope pa vasina te Aruna, sa tie Zebusaiti. 29 Pa totoso asa si sa Ipi Hopena te Zihova sapu kuria e Mosese pa soloso qega, meke sa hope vasina hoke ta tavete sari na vina vukivukihi va uququ si korapa koa dia tu koasa vasina vahesihesiana pa Qibione. 30 Ba na lopu boka la se Devita vasina pude tepatepa koasa Tamasa, sina matagutu nia sa sa vedara tanisa mateana te Zihova.