1 Meke zama se Samuela koari na tinoni Izireli, “Ele tavetia rau gua sapu tepa ia gamu koa rau pude tavetia. Ele ponini gamu rau si keke baṉara pude totolini gamu. 2 Meke kamahire si koa nana koa gamu si asa pude turaṉa gamu. Ba sapu arau, si ele barogoso na keo, meke sari na tuqu koreo si koa somanae mo koa gamu sara. Arau si koa koa gamu podalae tu sipu korekoreoqu osolae kamoa kamahire. 3 Ke hie si arau. Be guana tavete va sea ia rau si keketoṉa, si mi zutu au mo pa kenuna e Zihova meke sa baṉara sapu ele vizata ia sa. Vegua ele vagia rau si keke bulumakao tana keke tie babe na doṉ'ki tana keke tie? Vegua ele hiko vagia rau si keketoṉa babe ṉoṉovalia rau si keke tie? Vegua hoke okoro nia rau pude ade vagi golomi sari na poata koa keke tie? Be guana ele evaṉia rau si keke koari na tiṉitoṉa hire si maqu lipu pulei saripu gua pu ele vagi rau.”

4 Olaṉa sari na tinoni, “Lokari, lopu hite hiko vagia goi keketoṉa babe ṉoṉovala gami goi si gami; lopu hite vagia goi si keketoṉa koa keke tie.”

5 Meke olaṉa se Samuela, “E Zihova meke sa baṉara sapu ele vizatia Sa si va sosodea pa rane hie sapu loke sinea si ele dogoro vura nia gamu koa rau.”

“Uve, e Zihova si na mami tie va sosode,” gua si arini.

6 Meke zama se Samuela, “E Zihova tu vizatia se Mosese meke se Eroni sapu turaṉa vura ni sari na tiatamamia pa Izipi.*Ekd 6:26 7 Ke kamahire mamu turu vasina pu korapa koa ia gamu, maqu zutu gamu pa kenuna e Zihova pa vina balabala pule di rina tiṉitoṉa arilaedi pu taveti e Zihova pude harupu gamu si gamu meke sari na tiatamamia. 8 Sipu gore la pa Izipi se Zekopi meke sa nana puku tatamana, meke ṉoṉovali ri na tie Izipi, si varavara tepa tinokae la koe Zihova sari na tiatamamia, ke garuni Sa sari Mosese e Eroni, meke turaṉa vura ni pa popoa Izipi meke va koa i koasa popoa hie.*Ekd 2:23 9 Ba muliṉi nia rini se Zihova sa dia Tamasa, ke va malumi Sa sari na tie Pilisitia meke sa baṉara pa Moabi meke e Sisera, sa koimata koasa qeto minate tanisa vasileana nomana pa Hazo, pude razai sari tiatamamia meke va kilasi, gua.*Zaz 3:12, 4:2, 13:1 10 Meke varavara la koe Zihova si arini na tepa tinokae meke zama, ‘Ele sea si gami, sina kekere va seu koa Goi, Zihova, meke vahesi sari na beku te Beolo meke Asitoreti. Mu harupu puleni gami koari na mami kana, meke kaqu vahesigo gami.’*Zaz 10:10-15 11 Meke garunia Tamasa se Qitione, meke e Beraki, meke e Zepata, meke mumudi si arau. Hopeke gami si ele harupu gamu si gamu koari na mia kana, meke koa valeana si gamu.*1 Samuela 3:20; Zaz 4:6, 7:1, 11:29 12 Ba sipu dogoria gamu se Nahasi sa baṉara pa butubutu Amoni sapu va namanama pude rapatani gamu, si kilua tu gamu se Zihova sa mia Baṉara, meke zama tu koa rau, ‘Hiva nia gami si keke mami baṉara pude kopuni gami,’ gua.*1 Samuela 8:19

13 Ego, hie sa baṉara sapu vizatia gamu, sapu tepa ia gamu, meke ele vatu nia Zihova koa gamu. 14 Kote leana mo si gamu doduru be va lavatia gamu se Zihova sa mia Tamasa, pude nabulu nia, va avosia, meke va tabei sari Nana tinarae, meke be gamu meke sa mia baṉara si lulia si Asa. 15 Ba be lopu avosia gamu se Zihova ba sekei tu sari Nana tinarae, si kaqu etulu pani gamu Sa si gamu meke sa mia baṉara tugo. 16 Ke, mamu turu mo vasina pu koa gamu, meke kaqu dogori gamu sari na tiṉitoṉa arileadi pu kaqu taveti e Zihova. 17 Na totoso dada si asa, taga? Ba kaqu varavara si rau meke kaqu garunu mae nia Zihova sa paka maṉauru na ruku. Pana ta evaṉa saripu gua hire, si kaqu gilania gamu sapu ele tavete la nia gamu si keke sinea lavata koe Zihova totoso tepa ia gamu si keke baṉara koa Sa.”

18 Ke varavara se Samuela, meke koasa rane tugo asa si va mae ia Zihova sa ruku na paka. Ke matagutu nia ri doduru tinoni se Zihova meke se Samuela tugo, 19 meke zama koe Samuela si arini, “Mu tataruni gami, mu varavara lani gami koe Zihova sa mua Tamasa, pude lopu mate si gami. Tiqe gilania gami kamahire sapu, tomo lania pule gami koari doduru mami sinea, sa sinea sapu tepaia gami si keke baṉara.”

20 “Mi lopu matagutu,” gua se Samuela. “Hinokara sapu ele tavetia tugo gamu si keke tiṉitoṉa kaleana, ba mi lopu taluarae koe Zihova, ba mi nabulu nia mo si Asa pa doduru bulomia. 21 Mi lopu luli sari na tamasa kokohadi, lopu kaqu hite boka tokani gamu rini babe harupu gamu rini, ura lopu hinokaradi si arini. 22 Ele tavetia Zihova si keke vina tatara nabuna, meke lopu kaqu veko pani gamu Sa, sina ele balabala ia Sa pude vata evaṉaeni gamu na Nana tie soti Sa si gamu. 23 Ba koa rau, si lopu kote tavetia rau sa sinea sapu pude makudo varavara tokani gamu rau si gamu la koe Zihova. Ba guahe, kaqu va tumatumaeni gamu rau gua sapu leana meke toṉoto koa gamu pude tavetia. 24 Mi va tabea se Zihova, mamu nabulu valeana nia si Asa pa doduru bulomia. Balabala i sari na tiṉitoṉa arilaedi pu tavete ponini gamu Sa. 25 Ba be tavete va sea la mo si gamu, si kaqu tava kilasa si gamu meke sa mia baṉara tugo.”