1 Kaiqa tie pa Zipi si mae koe Saula pa Qibea, meke tozi nia rini sapu se Devita si korapa tome pa toqere pa Hakila, koasa hukihukirina sa soloso qega pa Ziuda, gua.*Sam 54 2 Ke topue la se Saula meke ari ka ṉeta tina nana tie varipera bokabokadi pa Izireli la gua koasa soloso qega pa Zipi pude hata ia se Devita. 3 Ke la koa paki pa kapana sa siraṉa pa toqere Hakila si arini. Korapa koa nana pa soloso qega se Devita, meke avoso nia sapu mae se Saula pude hata ia gua, 4 ke garunu lani sa sari kaiqa tie piko, pude gilania sapu hinokara koa nana tugo se Saula vasina. 5 Taluarae la si asa meke la dogoro valeania sa sa vasina pu koa ri Saula meke Abana sa tuna koreo e Nere, sa palabatu tanisa qeto minate te Saula. Puta pa kokorapana hokara se Saula meke koa vari likohae nia ri nana tie varipera si asa.

6 Ke nanasia Devita se Ahimeleki sa tie Hitaiti, meke se Abisai sa tasina e Zoabi (Sa tinadia ri si e Zeruia), “Esei koa gamu kara si kote luli koa rau pude la koasa vasina sapu koa se Saula?”

“Arau,” olaṉa gua se Abisai.

7 Ke koasa boṉi sana si nuquria ari Devita meke Abisai sa vasina koa se Saula, meke dogoria ri kara sapu pa vari korapana hokara si puta se Saula; sa nana hopere si hodu va turu nia sa pa kapa batuna. Abana meke sari nana qeto minate si puta vari likohae koasa. 8 Zama la koe Devita se Abisai, “Koasa boṉi hie si veko vatu nia Tamasa pa mua ṉiniraṉira sa mua kana. Ego, maqu hodu nuquru nia gana koasa sa nana hopere telena, meke hodu turaṉae nia gana pa pepeso pa keke hinodu mo, lopu hite kaqu karua hinodu koa rau.”

9 Ba zama se Devita, “Lokari, lopu va matea! Kaqu va kilasia e Zihova sa tie sapu va mate ia sa Nana baṉara ta vizatana. 10 Koe Zihova pu toa holana, si gilania qua rau sapu e Zihova telena kote va matea se Saula, be mate pa barogoso si asa ba be pa vinaripera. 11 Lopu va malumau e Zihova pude podekia va matea rau sapu ele va baṉaria Sa! Mada vagia mo sa nana hopere, meke sa vovoina kolo, mada taloa.”*1 Samuela 24:6 12 Ke vagia Devita sa hopere meke sa vovoina kolo sapu koa kapae pa batuna e Saula, meke taluarae taloa si asa meke se Abisai. Loke tie dogoria na gilania sapu sa si ta evaṉa, babe hite vaṉunu na gua. Puta muliuṉu beto sari doduru, sina va puta muliuṉu i e Zihova si arini.

13 Meke tiqe karovia e Devita sa kali karovoana sa lolomo, meke la koasa batuna sa toqere, sapu seu pada koarini, 14 meke kukili pule la koasa qeto minate te Saula meke Abana, “Abana! Boka avosau goi?”

“Esei si korapa kukili variva nuli na va vaṉunia sa baṉara?” gua se Abana.

15 Olaṉa se Devita, “Abana, lopu agoi tu sa palabatu lavata pa popoa Izireli? Na vegua tu ke lopu kopu nia goi sa mua palabatu sa baṉara? Vaqurana hokahokara mo kaiqa tie si mae nuquru koasa vasina koa gamu si kaiqa tie pude va matea sa mua palabatu. 16 Lopu garo si goi koasa mua tinavete, Abana! Tokotokoro hinokara si rau koe Zihova toana sapu pada pude tava mate si gamu doduru, sina lopu kopu nia gamu sa mia palabatu sapu ele va baṉaria e Zihova. Dotu! Avei sa hopere tanisa baṉara, avei sa vovoina kolo sapu koa kapae pa batuna?”

17 Avoso gilania e Saula sa mamalaiṉina Devita meke nanasa, “Devita, agoi si isa, ta tuqu?”

“Uve, qua baṉara,” olaṉa gua se Devita. 18 Meke hoda la si asa, “Qua baṉara, venagua ke korapa hadu luli au tu goi si rau, na mua nabulu? Na sa si tavetia rau? Tinavete kaleana sa si evaṉia rau? 19 Qua baṉara, va avoso mae ia gua sapu kaqu zama nia rau. Be e Zihova tavete gunigo pude kana au si rau, maqu va vukivukihi la koa Sa pude hobea sa Nana binalabala; ba be na tie mo evaṉia, madi ta gorei nia sa tinalevei te Zihova. Sina hadu vura nau rini koasa pepeso te Zihova, la koasa popoa sapu boka vahesi hoboro nia votiki tamasa rau. 20 Lopu va mate au pa votiki pepeso vasina sapu seu koe Zihova. Na vegua ke mae hata ia sa baṉara pa Izireli pude va matea sa dodoa gugua arau? Na vegua ke hukue nau sa guana kurukuru pinomo?”

21 Olaṉa se Saula, “Tavete va sea si rau. Pule mae, ba tuqu, Devita! Lopu kaqu podeke pulea rau pude va mate igo kamahire, sina ele harupia goi sa qua tinoa koasa boṉi hie. Guana tie duviduviliqu si rau! Na hahanana kaleana si tavetia rau!”

22 Olaṉa se Devita, “Hie sa mua hopere, qua baṉara. Va karovo mae ia si keke mua tie, mani mae vagia. 23 Pia i e Zihova saripu koa va ṉoṉo na toṉoto. Pa rane hie si veko igo Sa pa qua ṉiniraṉira, ba lopu ṉoṉovaligo rau, sina ele va baṉarigo e Zihova. 24 Kekeṉoṉo gua tugo sapu harupia rau sa mua tinoa ṉinoroi he, mani tavete kekeṉoṉo gua tugo asa se Zihova koa rau pude vata rupahau koari doduru qua tinasuna.”

25 Zama la koe Devita se Saula, “Tuqu, mani mana nigo sa Tamasa! Kote gorevura sari doduru ginugua pu evaṉi goi.”

Ke ene taloa nana se Devita meke pule la pa nana popoa se Saula.