1 Totoso kamo sa baṉara, se Rehoboami, pa Zerusalema, si tioko varigara ni sa sari ka keke gogoto vesu ṉavulu puta tina tie varipera bokabokadi pa butubutu te Benisimane meke Ziuda. Hiva la varipera si asa koa ri pa binaṉara Izireli pude vagi pule lani koasa binaṉara te Rehoboami. 2 Ba zama koe poropita Semaea sa Tamasa 3 pude va kamo la nia sa inavoso koe Rehoboami, sa baṉara, meke koari na butubutu te Ziuda meke Benisimane: 4 “Mi lopu la raza i sari na turaṉamia. Mi pule la pa mia popoa, gamu doduru. Gua sapu ta evaṉa si na pa Qua hiniva.” Ke va tabea rini sa zinama te Zihova, meke lopu la raza ia rini se Zeroboami.

5 Koa pa Zerusalema se Rehoboami meke kuri va ṉiṉirai sa sari na vasileana pa Ziuda meke Benisimane: 6 Betilihema, Etama, Tekoa 7 Betizuru, Soko, Adulamu 8 Qati, Maresa, Zipi 9 Adoraemi, Lakisi, Azeka 10 Zora, Aizaloni, meke Heboroni. 11 Va nabu va leani sa sari gobagobadi meke vekoni hopeke koimata sa, meke va hia ponini ginani, na oela olive, meke vaeni sa, 12 meke na hopere na lave tugo. Gua asa meke boka koa pa nana kinopu sari pa Ziuda meke Benisimane.

13 Sari na hiama meke sari na tie Livaeti pa doduruna sa popoa Izireli si mae koa beto pa popoa Ziuda. 14 Luara pani ri na tie Livaeti sari na dia pepeso sapu koai na duduli tana dia sipi na bulumakao meke sari na dia vasileana meke rizu la pa Ziuda meke Zerusalema, sina lopu hivani sa baṉara Zeroboami, pa Izireli, meke sari na tuna, pude na hiama meke nabulu nia se Zihova. 15 Vizata nana hiama telena se Zeroboami pude tavetavete koari na hope pa toqere meke pude vahesi pa kenudia rina beku qoti na tuna bulumakao pu taveti sa.*1 Baṉ 12:31 16 Ari doduru butubutu pa Izireli pu okoro nia pude vahesia se Zihova, sa Tamasa pa Izireli, si luli rini sari na tie Livaeti meke la pa Zerusalema, pude boka va vukivukihi la koe Zihova, sa Tamasa tadi na tiatamadia. 17 Va ṉiṉira ia rini sa binaṉara pa Ziuda, meke pa korapana ṉeta vuaheni si zuka ia rini se Rehoboami sa tuna Solomone, meke koa aqorae si arini koasa nana kinopu gugua pa totoso tadi Devita meke Solomone.

18 Haba ia e Rehoboami se Mahalata, sa tamana sa si e Zerimoti, tuna Devita, sa tinana sa si e Abihaili, na tuna vineki e Eliabi, sa tuna koreo e Zese. 19 Ka ṉeta tudia koreo; Zeusi, Semaria meke Zahama. 20 Mumudi si haba ia pule sa se Ma'aka, na tuna vineki e Abusalamu, meke podoi ri si ka made koreo: Abaeza, Atai, Ziza, meke Selomiti. 21 Doduruna sa tatamana te Rehoboami, si ka manege vesu sari nana barikaleqe, ka onomo ṉavulu puta barikaleqe pinausu, meke ari ka hiokona vesu tuna koreo, meke onomo ṉavulu puta tuna vineki. Koari na nana barikaleqe meke sari na barikaleqe pinausu, si e Ma'aka si tataru hola nia sa. 22-23 Meke vizatia e Rehoboami se Abaeza d, sa tuna koreo e Ma'aka, pude nana ṉati koreo tavia, holani sari doduru nana koburu; meke asa si hiva va baṉaria sa. Tavete va gotogoto si asa meke poni tinavete sa sari na tuna koreo; vekoi sa koari na vasileana lavata ta gobadi pa Ziuda meke Benisimane. Poni valeani sa meke vagi va soku poni barikaleqe tugo sa.