1 Sari na tinida sapu tana pepeso hie, si kekeṉoṉo gua mo na ipi pu va koa paki gita pa pepeso. Gilania gita sapu be mate si gita, si kaqu poni gita Tamasa sari na tinida sapu tana Maṉauru, saripu kaqu koa hola ninae rane. Lopu na tini sapu kekeṉoṉo guana ipi sapu ta kuri pa lima tie, ba sa tini sapu ta kuri koe Tamasa. 2 Kamahire si siṉo maṉini pa tinalotaṉa si gita, ke hiva ture tagoi gita sari na tinida sapu tana Maṉauru. 3 Meke pana hopeke tagoi gita sari tinida tana Maṉauru, si lopu kaqu koa na maqomaqo mo si gita, sapu kekeṉoṉo gua na tie dododohona. 4 Totoso koa si gita koari na tinida hire, si siṉo maṉini pa tinalotaṉa, meke mamata sari na buloda. Lopu sapu na hiva veko pani gita sari na tinida hire, ba sari na tinida pa Maṉauru si hiva tagoi gita. Pude sari na tinida hire pu lopu kote koa hola, si kote ta evaṉae na tini toa holadi. 5 E Tamasa si va namani gita pude vagia sa hinobe hie. Ele ponini gita Sa sa Maqomaqona, pude na vina sosode sapu kaqu vagi gita doduru gua saripu ele va nama vekoi Sa pude tadigita.

6 Ke gua asa si ta sovutu va ṉiṉira si gita. Gilania gita sapu koasa totoso sapu toa si gita pa kasia popoa, si koa va seu si gita koa sa Baṉara pa Maṉauru. 7 Ura toa si gita pa rinaṉeraṉe, ba lopu pa dinogodogorae. 8 Ta sovutu va ṉiṉira si gita, ke okoro hola nia gita si pude luari sari na tinida tana kasia popoa, pude la koa somanae koasa Baṉara. 9 Ba sapu hiva hola nia gita koari doduru pule, si pude va qetua si Asa, be pa tinoa koari na tinida hire, babe pa tinoa panahoi. 10 Ura doduru gita si kaqu la vura ta dogoro pa kenuna Karisito, pude ta pitu koa Sa. Hopeke gita si kaqu vagia gua sapu garoda, koa gua mo koari doduru nada tinavete pa tinoa hie pa pepeso, be leadi babe kaleadi.*Rom 14:10

11 Gilania gami sa pinamaṉana sa Baṉara, gua asa ke podekia gami pude va hinokaria ri na tie sa Inavoso Leana. Ele gilana valeana gami Tamasa si gami. Meke rovea rau si gamu ba gilana valeanau tugo si rau pa bulomia. 12 Gami si lopu podekia pule pude va lavata puleni gami koa gamu, ba hiva va gilana ni gamu mo gami sari na ginugua, gua meke ta qetue koa gamu si gami, pude boka olaṉi gamu saripu hoke qetu nia mo sa tinoa vurana tana tie, ba lopu sa nana tinoa pa korapa bulona. 13 Ba be duvili si gami, sina pa ginuguana e Tamasa si doṉo guana duvili si gami koari na tie. Ba be gilae si gami, si na pa laemia gamu si doṉo guana gilae si gami. 14 Gami si ta turaṉa koa sa tataru te Karisito, meke va hinokaria gami sapu keke tie sapu e Karisito si ele mate hobei sari hopeke tie. Ke gita si na tie mateda koe Zisu Karisito. 15 Mate paeni Sa sari doduru, meke tava toa pule pa laedi rini, pude sa ṉatina sa dia tinoa, si pude lulia sa hiniva Tanisa pu mate poni, ba lopu sa dia hiniva soti.

16 Kamahire si lopu balabala gunia gita si keke tie pa hahanana kasia popoa. Ba sipu lopu ele va hinokara gita, si balabala gunia gita asa se Karisito. 17 Gua asa, ke be koa keke koe Karisito si keke tie, si na tie vaqurana si asa. Sa tinoa koana si ele hola taloa meke sa tinoa vaqura si ele kamo koa sa. 18 Doduru pu gua asa, si na tinavete te Tamasa mo. Meke gua asa ke garunu mae nia Sa se Karisito, sapu vata evaṉia sa vinaribulei pa vari korapada gita meke sa Tamasa. Meke poni gami Sa sa tinavete pude vata evaṉia sa vinari bulei pa vari korapadi ri kaiqa pule, meke Tamasa. 19 Ke tozia gami sapu pa korapana e Karisito si vata evaṉia Tamasa sa vinaribulei pa vari korapana sa Tamasa telena meke sari na tie pa kasia popoa. Lopu balabala vekoi Sa sari na dia sinea, ba poni gami Sa sa inavoso tanisa vinaribulei. 20 Gua ke ta garunu si gami koe Karisito pude tozia sa Nana inavoso. Meke korapa tioko gamu Tamasa si gamu koasa inavoso sapu tozia gami. Ke tepa gamu gami koasa tinioko te Karisito, mi koa varibulei koe Tamasa. 21 Loke Nana sinea se Karisito, ba pa laeda gita si va paleke ni Tamasa koa Sa sari na nada sinea, pude pa nada kineke koa Sa si kaqu somana tagoa gita sa tinoṉoto te Tamasa.