9
Devita meke Mepiboseti
Keke rane si nanasa se Devita, “Vegua koa nana keke tie sapu koa hola pa tatamana te Saula? Be guana koa nana, si hiva vata dogoro nia rau sa tataru vatukana koa sa, pa pozana e Zonatani.”* 1 Samuela 20:15-17
Koa nana si keke nabulu pa tatamana te Saula, pozana Ziba. Ke ta garunu si asa pude la koe Devita. Nanasa sa baṉara, “Vegua agoi se Ziba?” “Uve, arau tugo sa mua nabulu,” gua si asa. Nanasia sa baṉara si asa. “Vegua koa nana keke tie sapu koa hola pa tatamana te Saula, pude maqu va gorevura ia sa qua zinama vina tatara sapu vekoa rau koasa qua tataru va tukana, gua sapu ele va tatara nia rau koe Tamasa?” Olaṉa se Ziba, “Koa nana si keke rina tuna koreo e Zonatani. Ba na mate beto nenena.”* 2 Samuela 4:4
“Avei si asa?” nanasa gua sa baṉara. “Koanana pa vetu te Makiri tuna e Amieli pa Lodeba,” olaṉa gua se Ziba. Ke tiokia sa baṉara Devita si asa.
Sipu mae kamo se Mepiboseti, sa tuna e Zonatani sa tuna sa tuna Saula, si todoṉo si asa pa kenuna Devita pa pinamaṉa. Zama se Devita, “Mepiboseti?” Meke olaṉa si asa, “Arau sa mua nabulu, baṉara.”
“Mi lopu matagutu,” gua se Devita. “Pa pozana sa tamamu se Zonatani, si kaqu tataru nigo rau si goi. Kaqu va pule atui rau koa goi sari doduru pepeso tanisa sa tamana sa tamamu se Saula, meke agoi si kaqu hena na napo pa qua tevolo.”
Todoṉo pule se Mepiboseti meke zama, “Baṉara, arau si lopu leana hola nia si keke siki matena.” “Na vegua ke tataru hola nau tu goi si rau?”
Meke tiokia sa baṉara se Ziba, sa nabulu te Saula meke zama ia sa, “Vala pulei rau koe Mepiboseti, sa tuna sa mua palabatu sari doduru tiṉitoṉa saripu te Saula meke tadi na nana tatamana. 10 Agoi, meke sari na tumu koreo, meke sari na mua nabulu si kaqu letea sa pepeso tanisa mua palabatu pude poni ginani si arini. Ba se Mepiboseti mo si kaqu hena na napo pa qua tevolo doduru totoso” Se Ziba hie si ka manege lima tuna koreo meke ka hiokona puta nana nabulu.
11 Olaṉa se Ziba, “Doduru tiṉitoṉa saripu gua garununi sa qua baṉara si kaqu taveti rau.” Ke hena na napo pa tevolo tanisa baṉara se Mepiboseti, gua puta tugo mo keke ri na tuna koreo sa baṉara. 12 Keke tuna koreo vaqura se Mepiboseti pozana si e Maika. Ego sari doduru tie koasa tatamana te Ziba si ta evaṉae na nabulu mo te Mepiboseti. 13 Ke se Mepiboseti sapu mate beto karua nenena, si koa mo pa Zerusalema, henahena doduru totoso pa tevolo tanisa baṉara.

*9:1 1 Samuela 20:15-17

*9:3 2 Samuela 4:4