1 Koanana si keke tasina vineki leleana sapu lopu ele varihabana se Abusalamu, sa tuna koreo e Devita; pozana sa si e Tama. Amanoni sapu keke tuna koreo pule e Devita si hivahivana sa. 2 Hiva hola nia sa meke va kamo nia moho tu sa, sina tasuna hola pude vagia sa sa vineki vaqura, sapu ta kopue totoko. Ke loke tie boka tata ia. 3 Ba koa nana keke nana baere sekesekeina se Amanoni; pozana sa si e Zonadabi na tuna koreo e Simea, keke tasina koreo e Devita. 4 Zama la koe Amanoni se Zonadabi, “Na tuna koreo tu sa baṉara si goi, ba rane ka rane si dogorigo rau guana doṉo talotaṉa si goi?” gua si asa. Meke olaṉa si asa, “Hiva nia rau se Tama sa tasina vineki sa tasiqu koreo karokarovo sapu se Abusalamu,” gua si asa.

5 Zama koasa se Zonadabi, “Mamu eko guana tie mohomu pa teqe. Totoso mae dogorigo sa tamamu si mamu zama guahe, ‘Mu tozi nia sa tasiqu vineki se Tama pude mae. Hiva nia rau pude mae vatana poni au ginani sa tani, vasina sapu boka dogoria rau, meke telena tugo kaqu va henahena au.’ ” 6 Ke eko guana tie mohona se Amanoni pa teqe. La dogoria sa baṉara Devita si asa, meke zama la koasa se Amanoni, “Mu va malumu mae ia se Tama pude mae taveti kaiqa keki tani koasa vasina sapu kote boka dogoria rau, meke telena tugo kaqu va henahena au.”

7 Ke va garunu inavoso la se Devita koe Tama pa vetu baṉara, “La pa vetu te Amanoni, mamu la tavete poni nia ginani.” 8 La si asa vasina meke la dogoria sa korapa eko pa nana teqe. Kaiqa palava si paleki sa, va tanai sa, meke taveti sa si kaiqa keki. 9 Meke va vurai sa koasa kinakinana pude henai sa gua, ba korona. “Garunu vura taloani sari doduru tie hire,” gua si asa, ke vura taloa beto si arini. 10 Meke tiqe zama la koe Tama si asa, “Paleke mae nia tani pa qua teqe sari na keki. Mamu telemu tugo poni au.” Paleki sa sari na keki, meke ene la koasa. 11 Sipu korapa ponia sa, si harupu vagia sa meke zama, “Mae eko turaṉau pa teqe.”

12 “Lokari, tasiqu! Lopu ososo nau pude tavetia sa tinavete vina goregoreiqu na variva kurekure. Mu lopu tavetia sa tinavete kaleana hie koa rau. 13 Lopu kaqu boka muliṉi nia rau kinurekurena meke kote ta ṉoṉovala si goi guana tie duviduvilimu pa popoa Izireli. Mu tepa koasa baṉara, rovea rau kote va malumau mo sa koa goi.” 14 Ba lopu hiva va avosia Amanoni, meke sina ṉiṉira hola nia sa sa vineki, ke va sea ia tu sa.

15 Mudina sapu gua asa si namu hakohako hola nia tu e Amanoni se Tama, hola nia tu sa tatasana, ke zama ia sa, “Mu vura taloa!” guni nia sa.

16 “Koroqu!” olaṉa gua si asa, “Pude garunu taloa guni nau goi he si kaleana hola nia gua sapu tiqe evaṉia goi koarau.” Ba lopu hiva va avosia sa si asa, 17 ke tioko nuquru puleni sa sa nana nabulu meke zama ia sa, “Turaṉa taloa nia pa kenuqu rau sa vineki hie. Va vura taloa ia, mamu tukua sa sasada!” 18 Turaṉa vura taloa nia sa nabulu meke tukua sa sa sasada. Keke poko gelena si va sage ia e Tama, meke gele limana, na hahanana pinokopoko tadi na tudia vineki rina baṉara, sapu lopu ele varihabadi koari na totoso arini. 19 Binu nia eba sa sa batuna, sira rikatia sa sa nana poko, meke va opo tamunia ola limana sa sa isumatana, meke ene kabokabo taloa nana. 20 Sipu dogoria sa tasina koreo se Abusalamu si asa, si nanasia sa, “Ṉoṉovaligo e Amanoni si goi? Mamu lopu koa talotaṉa sisigiti si goi. Na tasimu karokarovo mo si asa. Ke lopu tozia koa keke tie pule.” Ke koa pa vetu te Abusalamu se Tama, talotaṉa meke koa eke telena.

21 Sipu avoso nia e Devita sa baṉara sapu gua ta evaṉa si ta ṉaziri hola si asa. 22 Hakohako hola nia e Abusalamu se Amanoni koasa ṉinovaṉovalana e Tama, sa tasina vineki, meke lopu hiva zama hokaria sa.

23 Hola karua vuaheni si vagi tie kotokoto sipi se Abusalamu pa Beolo Hazo, tata koasa vasileana nomana pa Iparemi, meke ruvati sa sari doduru tuna koreo sa baṉara pude la vasina. 24 La si asa koe Devita sa baṉara meke zama, “Baṉara hivani gamu rau pude mae somana koasa qua inevaṉa, agoi meke sari mua palabatu. Na koto sipi si rau.” 25 “Lokari, tuqu!” olaṉa gua sa baṉara. “Pude atu beto gami si kote noma hola sa mua tinupiti.” Ososo nia tugo Abusalamu, ba lopu hiva sa baṉara, meke tozi nia sa se Abusalamu pude taloa. 26 Ba zama se Abusalamu, “Ego, pude guana lopu hiva goi, si va malumu mae ia sa tasiqu se Amanoni pude mae.” “Na vegua tu ke kote luli si asa?” nanasa gua sa baṉara. 27 Ba tepa ososo nia e Abusalamu, ke va malumia e Devita se Amanoni, meke sari doduru tuna koreo pude luli koe Abusalamu. Va namanama ia e Abusalamu sa hinenahena lavata padadi rina baṉara. 28 Meke zamai sa sari nana nabulu, “Dogoria pude guana napo va viviri se Amanoni, meke pana tozini gamu rau sa totoso, si mamu va matea. Lopu matagutu. Arau kote vagia sa tinazutuna sa.” 29 Ke lulia ri nana nabulu sa zinama te Abusalamu meke va matea rini se Amanoni. Sari doduru tuna koreo pule te Devita si koi pa dia miulu meke govete taloa.

30 Koasa dia inene pule rini, kaiqa tie tozi nia se Devita, “Va mate betoi e Abusalamu sari doduru tumu koreo. Lopu keke si koa hola,” gua. 31 Turu sage sa baṉara, daku rikati sa sari nana poko pa tinalotaṉa, meke hoqa eke la pa pepeso. Saripu koa turaṉae koasa ba sira rikati tugo rini sari na dia poko. 32 Ba se Zonadabi sa tuna koreo e Simea sapu sa tasina e Devita si zama, “Baṉara, lopu va mate betoi rini sari na tumu koreo. Telena mo e Amanoni si mate. Boka tumae nia mo goi sa binalabala te Abusalamu sapu na kukiti nia sa podalaena tu koasa totoso ṉoṉovalia sa sa tasina se Tama. 33 Ke lopu va hinokaria sa inavoso sapu tava mate beto sari na tumu koreo. Telena mo e Amanoni si tava mate.”

34 Koasa totoso asa si ele govete taloa tu se Abusalamu.

Meke lopu sana doṉo vagia sa tie kopu sa puku tie gore mae gua tu koasa toqere koasa siraṉa pa Horonaimi. La si asa koasa baṉara meke tozia gua sapu dogoria sa. 35 Zama la koe Devita se Zonadabi, “Dotu, sari na tumu koreo si korapa mae hiroi, gua sapu zama nia rau si ta evaṉa.” 36 Meke lopu sana, si kamo mae mo sari na tuna koreo e Devita. Podalae kabo mo si arini, meke somana kabo va sisigitae tugo se Devita, meke sari nana palabatu nomadi.

37-38 Govete taloa meke la koa nana se Abusalamu koe Talamai sa baṉara pa Qesura, sapu sa tuna koreo e Amihudi, meke koa vasina ka ṉeta vuaheni si asa. Gelena sa totoso sapu kaboa Devita se Amanoni sa tuna koreo.* 2 Samuela 3:3 39 Ba sipu va hola ia sa sa tinalotaṉana sa minate te Amanoni, si saivi hola ia pule sa se Abusalamu sa tuna koreo.