1 Koanana pa Qiliqali si keke tie kaleana, pozana sa si e Siba, na tuna koreo e Bikiri, pa butubutu te Benisimane. Ivua sa sa buki, meke zama vura, “Luara veko pania se Devita! Koroda lulia si asa! Tiena sa popoa Izireli, aria mada pule la pa nada popoa!”*1 Baṉ 12:16; 2 Koron 10:16 2 Ke luara veko pania rina tinoni Izireli se Devita meke lulia rini se Siba, ba sari na tinoni Ziuda si koa hola na luli va pepekae ia rini se Devita, podalae sipu taluarae tu pa Ovuku Zodani meke kamo la gua tu pa Zerusalema.

3 Sipu kamo se Devita, koasa nana vetu baṉara pa Zerusalema, si vagi sa sari ka manege puta nana nabulu barikaleqe saripu va koa hola i sa pude kopu nia sa vetu baṉara, meke vekoi sa pa kinopu tadi na tie kopu, meke kopuni sa si arini. Poniponi ginani e Devita ba lopu eko turaṉi sa si arini. Doduruna sa dia kinoa si koa ta kopue guana barikaleqe nabonabokodi mo vasina si arini.*2 Samuela 16:22

4 Zama la koe Amasa sa baṉara, “Tioko varigarani sari na tinoni Ziuda, mamu kamo pule mae tani si gamu pa koivugona.” 5 Topue la se Amasa pude la tioki, ba lopu kamo pule mae si asa koasa totoso gua sapu hiva nia sa baṉara. 6 Ke zama la koe Abisai sa baṉara “Kote noma hola nia sa tinasuna te Abusalamu va mae ia e Siba koa gita. Vagi sari qua tie, mamu hadu lulia. Kote gua meke tuqe vagi sa si kaiqa vasileana lavata pu ta baradi meke tasuna pude vagia gita.” 7 Ke sari na tie te Zoabi, na tie kopu tanisa baṉara, meke sari doduru koasa qeto minate si taluara somanae koe Abisai pa Zerusalema pude hadu lulia se Siba. 8 Sipu kamoa rini sa patu lavata pa Qibione, si tutuvi e Amasa si arini. Va sage poko varipera se Zoabi, voi nana pa nana vovoina sa nana magu varipera meke soto nana koasa nana belete. Sipu rizu vura sa si hoqa vura sa magu varipera. 9 Zama la koe Amasa se Zoabi, “Vegua si goi ta qua baere?” guni nia sa. Tuqe vagi nia lima mataona sa sa gumina pude aho ia. 10 Lopu kopu nia Amasa sa magu varipera sapu tuqea e Zoabi pa kali limana, meke hova ia Zoabi sa tiana si asa, ke titisae pa pepeso sari laguna. Lopu sana hinoqa mate, ke lopu seke pulea e Zoabi si asa.

Ke taluarae meke luli la ia e Zoabi meke Abisai sa tasina se Siba. 11 Keke tie te Zoabi si turu kapae nana koasa tinina e Amasa meke velavela vura, “Doduru tie sapu te Zoabi meke e Devita si lulia se Zoabi!” 12 Tale eharana meke eko nana pa kokorapa siraṉa sa tinina e Amasa. Dogoria sa tie te Zoabi sapu noso beto sari doduru tie, ke ririhi vura nia sa pa siraṉa meke la nobi nia baleqete sa pa kali hiqohiqoana. 13 Mudina tava rizu sa tinina pa siraṉa, si lulia ri doduru se Zoabi koasa hinaduna e Siba.

14 Nuquru hola gua koasa kali popoa tadi na tinoni Izireli se Siba, meke mae koasa vasileana lavata pa Ebolo Beti Ma'aka, meke varigara sa doduruna sa butubutu te Bikiri meke nuquru luli turaṉia rini koasa vasileana lavata. 15 Avoso nia rina tie te Zoabi sapu koa vasina se Siba gua, ke mae vari likohae nia rini sa vasileana lavata. Tavetia rini si keke buturu pa kali goba pude rapata na haele sage pa gobana sa vasileana lavata, pude boka ta huara meke boka nuquria rini sa vasileana asa, gua. 16 Koanana si keke barikaleqe tumatumaena koasa vasileana lavata sapu kukili vura gore mae koasa goba, “Va avoso mae! Va avoso mae! Tozi nia se Zoabi pude mae gua tani. Hiva vivinei koasa si rau.” 17 La se Zoabi, meke nanasia sa, “Agoi se Zoabi?”

“Uve, arau,” gua se Zoabi.

“Va avoso au qua baṉara” gua sa barikaleqe,

“Korapa va avoso atu si rau,” olaṉa gua se Zoabi.

18 Meke tiqe zama sa barikaleqe, “Pukerane si zama si arini, ‘La mamu vagia sa mua inolaṉa koasa vasileana lavata pa Ebolo,’ gua hokara mo asa si hoke tavetia rini. 19 Nomana lavata sa vasileana tamigami; keke vasileana sapu bulebulena hola meke ṉoṉona pa Izireli si asa. Na venagua tu ke hiva huaria tu goi? Hiva ṉovalia goi sa vasileana lavata te Zihova?”

20 “Lokari hokara!” gua se Zoabi. “Lopu kaqu ṉovalia babe huaria rau sa mia vasileana lavata! 21 Lopu asa sa mami binalabala. Keke tie pozana e Siba sa tuna koreo e Bikiri, sapu mae guana pa toqere pa Iparemi, si podalae nia sa vinagugue la koe Devita sa baṉara. Tuqe mae nia sa tie asa, meke kote rizu taloa mo koasa vasileana lavata si rau.”

“Kote oki karovo atunia gami sa batuna koa goi pa gobagoba,” gua sa barikaleqe. 22 Meke la tozia sa barikaleqe koari tiena sa vasileana lavata sa nana binalabala, meke kupa ia rini sa batuna e Siba meke oki karovo la nia rini pa gobagoba koe Zoabi. Ivua sa sa buki na vina gilagila koari nana tie pude taluarae koasa vasileana lavata, meke pule pa dia popoa si arini, meke pule la koasa baṉara pa Zerusalema se Zoabi.

23 Koimata ni e Zoabi sari doduru koasa qeto minate pa Izireli. Benaea tuna koreo e Zehoiada si ṉati hiniva koari na tie kopu te Devita. 24 Adoniramu si ṉati hiniva koari na tie ta zukuru tinavete ṉiṉiradi. Zehosapati tuna koreo e Ahiludi si ṉati hiniva koari na kinopudi rina kinubekubere. 25 Seva si na tie kubekubere koasa vetu varipitui. Zedoki meke e Abiata sina hiama, 26 meke e Ira pa vasileana nomana pa Zaea ba keke hiama soti tugo te Devita.