2 Ego, kamahire maqu tozi va hinokara nigo: Ka ṉeta baṉara si kote vura mae gua pa Pesia, meke sa vina made si kote vura mae sapu tagotago holani sari doduru. Totoso vagia sa sa ṉiniraṉira koasa nana tinagotago, si kote va gevuru i sa sari doduru pude kana ia sa binaṉara pa Qurisi. 3 Meke kote vura mae si keke baṉara ṉiṉirana sapu kote baṉara ni sa pa ṉiniraṉira nomana meke tavetia gua sapu hiva nia mo sa. 4 Mudina sapu vura mae si asa, si sa nana butubutu baṉara si kote vari paqahi meke ta hia made la koari ka made givusu. Lopu kote la koari na tutina, babe kote tago ia rini pu hobena sa ṉiniraṉira sapu tanisa, sina sa nana binaṉara si kote ta rabutu sage meke ta poni la koari kaiqa tu.

5 Sa baṉara pa kali matao si kote ṉiṉirana, ba keke ari nana palabatu varipera si kote ṉiṉirana hola la tu meke kote baṉara nia sa sa nana butubutu baṉara telena pa ṉiniraṉira lavata. 6 Hola kaiqa vuaheni si kote baere si arini. Sa tuna vineki sa baṉara pa kali matao si kote la koasa baṉara pa kali gede pude haba ia meke tavetia si keke vinariva egoi, ba sa ṉiniraṉira tanisa vinariva egoi hie si lopu kote koa seunae meke sa ṉiniraṉira tanisa baṉara pa kali gede ba lopu kote koa hola. Koari rane arini si kote va matea ri na kana sa vineki, sa tamana, sari na nabulu pu luli koa sa, meke arini pu zukana sa.

7 Ba keke arini pa tuti tanisa vineki si kote turu sage meke vagi hobe ia sa nana tuturuana binaṉara. Asa kote raza ia sa qeto minate tanisa baṉara pa kali gede*Kali gede be tia la pa kali gasa rimata. meke nuquru koasa nana vasileana ta gobana; kote raza ia sa meke va kilasia sa. 8 Kote zau vagi tugo sa sari dia tamasa, dia beku ta tavetedi pa aeana meke sari dia likakalae arilaedi sapu ta tavetedi pa qolo meke siliva meke paleke taloa lani pa Izipi. Meke pa kaiqa vuaheni si kote lopu voriti pule la ia sa sa baṉara pa kali gede. 9 Beto si kote la rapata pa Izipi sa baṉara pa kali gede ba si kote pule la nana pa nana popoa soti.

10 Ba sari tuna sa baṉara pa kali gede si kote varigara nia si keke qeto minate lavata, sapu kote qeto la guana keke naqe meke la rapata kamo latu koari na vasileana ta gobadi tadi dia kana. 11 Meke kote ta ṉaziri sa baṉara pa kali matao meke qeto vura la meke raza ia sa baṉara pa kali gede, sapu kote varigara nia si keke qeto minate lavata, ba sapu kote tava kilasa mo si asa. 12 Totoso ta vagi taloa sa qeto minate asa, si kote siṉi ia na vinahesi pule sa baṉara pa kali matao meke kote va mate i sa sari soku tina ari nana kana, ba lopu kote koa va mataqara seunae si asa. 13 Sina sa baṉara pa kali gede si kote varigara pule nia si keke qeto minate lavata pule, hola nia sapu kekenuna; meke hola kaiqa vuaheni si kote topue vura si asa meke sa qeto minate lavata, hopeke paleke va leana tiṉitoṉa varipera.

14 Koari na totoso arini, soku tie si kote kana la ia sa baṉara pa kali matao. Sari tie varipera koari na mua butubutu Izireli si kote la raza ia tugo si asa, pude va gorevura ia tugo sa dinogodogorae, ba kote lopu boka si arini. 15 Meke kote qeto mae sa baṉara pa kali gede*Kali gede be tia la pa kali gasa rimata. meke tomotomo lania sa pepeso pa kali goba pude haele nuquru pa korapana sa vasileana lavata ta gobana meke tuqe vagia. Sari qeto minate tadi pa kali matao si lopu kote garo pude va noso ia; sari dia puku tie varipera bokabokadi ba kote lopu boka turu va tia ia si asa. 16 Sa baṉara pa kali gede si kote tavetia gua sapu hiva tavetia sa; loke tie kote boka raza ia. Kote sokirae pule nia si asa koasa Popoa Tolavaena meke kote tagoa sa sa ṉiniraṉira pude huara ia.

17 Kote podekia sa pude turaṉa mae nia sa doduruna sa ṉiniraṉira tanisa nana butubutu baṉara meke kote tavetia sa si keke vinariva egoi koasa baṉara pa kali matao. Meke kote vala nia sa sa tuna vineki pude haba ia sa baṉara pa kali matao pude va hoqa ia sa nana butubutu baṉara, gua, ba sa binalabala tomena asa si lopu boka gorevura. 18 Beto si kote taliri si asa meke rapati sa sari na popoa koasa raratana meke kote soku si vagi sa, ba keke koimata pa keke popoa seuna kote va noso ia sa nana vinahesi pule meke tavetavete nia sa nana vinahesi pule pude va kilasa ia. 19 Mudina asa si kote kekere pule la si asa koari nana vasileana ta gobadi pa nana popoa, ba kote ta tubarae nia meke hoqa, meke lopu ta dogoro pule hokara.

20 Sa tie sapu baṉara hobena si kote garunu la tie pude vagi takisi koari na tiena sa butubutu pude va ṉiṉira ia sa tinolava tanisa binaṉara. Ba hola kaiqa vuaheni si kote tava mate si asa, lopu pa kinukiti babe pa vinaripera.

21 Kote ta hobe si asa pa binaṉara koasa keke tie kaleana sapu lopu podo maena pa tuti baṉara. Kote saputu vagi ia sa sa binaṉara totoso lopu va nonoga sari tie, meke kote vagi ia sa pa sinekesekei. 22 Keke qeto minate lavata si kote va kilasa ia sa; meke kote tava mate tugo si keke ṉati hiama kenukenue. 23 Beto tavetia sa si keke vinariva egoi koari votiki butubutu, si hoke kokoha i pule sa. Gua meke ṉiṉira nono la si asa, ba hitekena mo sa nana butubutu baṉara. 24 Totoso koa muliuṉu sari na pinaqaha popoa tagotagodi si kote rapati sa si arini meke kote bokaboka si asa, holani gua sapu ele boka i ri tamana meke tamadia ri na tamana. Sari na vinagi pa vinaripera meke sari na likakalae sapu hikoi sa, meke tinagotago sapu zau vagi sa si kote hia lani sa koa rini pu zukana si asa. Kote taveti sa sari binalabala pude rapati sari na vasileana ta gobadi, ba sa nana totoso si kote tata kamo.

25 Na qeto minate lavata si varigara nia sa, ke kote kepoto si asa pude raza ia sa baṉara pa kali matao. Sa baṉara pa kali matao si kote vura la tugo pude varipera sina nomana meke ṉiṉirana hola sa nana qeto minate, ba lopu kote boka si asa, na ari kaiqa na kote qoraqora nia si asa. 26 Arini mo sapu henahena pa tevolo tanisa baṉara si kote va hoqana si asa; sa nana qeto minate si kote eoṉo, na soku si kote mate pa vinaripera. 27 Sari karua baṉara si kote habotu pa keke tevolo meke vari kohai; na sari dia hiniva tomedi si kaleanadi. Loketoṉa si kote boka variva egoi nia ri karua sina sa vina betona si kote kamo pa nana totoso. 28 Sa baṉara pa kali gede si kote palekia sa sa nana tinagotago nomana meke pule pa nana popoa, ba sa hiniva ṉiṉirana pa bulona si pude huara ia sa Vinariva Egoi Hopena te Tamasa. Kote tavete la nia sa gua sapu hiva tavetia sa, beto si kote pule la nana pa nana popoa.

29 Pa totoso ta mutina si kote la rapata pule si asa koasa butubutu baṉara pa kali matao, ba kamahire si lopu kote gugua totoso la he si kote ta evaṉa. 30 Sari vaka pa kali lodu rimata koasa raratana si kote raza ia si asa, meke kote matagutu si asa. Ke kote kekere si asa meke va gore la nia sa sa nana tinaṉaziri koa sa Vinariva Egoi Hopena te Tamasa. Kote pule la vasina meke tokani sa si arini pu luara pania sa Vinariva Egoi te Tamasa.

31 Sa nana qeto minate si kote la va boni ia sa Zelepade meke va noso i sari vinukivukihi ta tavete pa hopeke rane. Kote va turu ia sa si keke beku variva malederena sapu vata kamoa sa tinahuara nomana.*Dan 9:27, 12:11; Mt 24:15; Mk 13:14 32 Koari na zinama lomolomosodi si kote vagi karovi sa sari tie Ziu sapu ele sekea sa Vinariva Egoi, ba arini pu gilania sa dia Tamasa si kote soto va nabu koa sa vinahesina Sa. 33 Sarini pu gilae si kote va tumatumae i sari sokudi, ba pa totoso hite si kote hoqa si arini koasa vedara, babe ta sulu pa nika, babe ta veko pa vetu varipusi, babe ta hiko sari dia likakalae. 34 Pa totoso sapu tava kilasa si arini si lopu kote kamo la sari tinokae, ba soku sapu somana koarini si lopu kote pa hinokara. 35 Kaiqa ari tie gilaedi si kote ta tubarae ni, pude di tava via, ṉoṉo, meke loke bonidi osolae kamo sa totoso tava gorevura sa kinorokorotae, ura na kote kamo mae sia pa nana totoso ta mutina.

36 Kote taveti sa baṉara gua sapu hiva taveti sa. Kote va ululu meke va lavata pule nia si asa, ululu holani sari doduru tamasa, meke kote zamani sa sari kaiqa zinama, sapu lopu hoke ta avosodi, la koasa Tamasa tadi na tamasa. Kote bokaboka si asa osolae tava kilasa si asa koasa binugoro te Tamasa, ura sari ginugua pu tava egodi si kaqu tava gorevura.*2 Tes 2:3-4; Rev 13:5-6 37 Lopu kote galagala ni sa sari tamasa tadi na tamana babe gua sapu hiva nia ari na barikaleqe, babe sari kaiqa tamasa pule, na telena mo va lavata pule nia si asa, hola ni sari doduru pule. 38 Ba, kote va lavatia sa sa tamasa tadi na goba vasileana; keke tamasa sapu lopu ta gilanana koari na tamana. Kote va lavata nia qolo, siliva, meke na patu arilaedi sa meke na vinariponi sapu noma laedi. 39 Kote rapati sa sari na vasileana ta gobadi sapu ṉiṉiradi hola koasa tinokae tanisa keke tamasa karovona, meke kote va arilaena i sa sarini pu va tabe ia si asa. Kote poni tuturuana sa pa butubutu pude kopu soku ṉavulu tie meke hia poni pepeso sa guana dia pinia.

40 Totoso tava gorevura sa kinorokorotae si kote la rapata ia sa baṉara pa kali matao si asa, meke kote qeto vura la sa baṉara pa kali gede pude raza ia, turaṉi sari nana totopili varipera, tie koi hose, meke soku vaka. Soku popoa si kote la raza i sa meke vagi i, na kote ene nuquri sa meke hola taloa guana naqe. 41 Sa Popoa Tolavaena ba kote raza ia sa. Soku popoa si kote hoqa, ba sari popoa pa Moabi, Edomu, meke sari koimata pa Amoni si kote ta harupu dia pa limana sa. 42 Sa nana binaṉara si kote hoda kamo la koari soku popoa pu rapati sa; Izipi si keke. 43 Kote vagi sa sari na qolo, siliva, meke doduru tinagotago pa Izipi, meke sari pa Libia meke pa Itiopia si kote nabulu la koa sa. 44 Ba sari inavoso mae guadi pa kali gasa rimata meke pa kali gede si kote va matagutuna si asa, meke kote ta ṉazirina meke topue vura pude huari pule sari soku popoa. 45 Kote va turu i sa sari ipi tana baṉara pa vari kokorapana sa kolo Meditareniani meke sa toqere hopena meke tolavaena. Ba kote kokoi sa nana tinoa, meke loke tie kote toka nia.