1 Mi va tabei na kopu valeana ni gamu sari na tinarae saripu ponini gamu rau pa rane ṉinoroi, pude mi toa valeana meke podopodo va soku si gamu, meke kaqu koa ia gamu sa popoa sapu ele va tatara nia e Zihova koari na tiatamamia pukerane. 2 Mi balabala ia sa tinuraṉa te Zihova sa mia Tamasa koasa inene gelena hie koari ka made ṉavulu puta vuaheni hire pa korapa popoa qega, meke va tutuvuni gamu tinasuna Sa pude podeke gamu, meke pude mi gilania sapu nasa si hiva tavetia gamu be guana va tabei gamu sari Nana tinarae. 3 Ele va ovia gamu Sa; beto asa si ponini gamu mana Sa pude mi hena ia gamu sa ginani sapu lopu hite hena ia gamu meke sari na tiatamamia pukerane. Evaṉia Sa sapu gua asa pude va gilanani gamu sapu sa tie si lopu tale toa pa bereti mo, ba koari doduru zinama pu zama ni Tamasa.*Mt 4:4; Lk 4:4 4 Koari ka made ṉavulu puta vuaheni arini si lopu hite lulutu na popozu sari na mia poko, meke lopu hite ozoṉo tugo sari na nenemia. 5 Mi gilania sapu se Zihova sa mia Tamasa si hoke va toṉoto gamu na va kilasa gamu, kekeṉoṉo gua tugo sapu va toṉoti sa tamadia sari nana koburu. 6 Gua asa, ke mi va tabea si Asa. Mi taveti gua sapu zamani e Zihova koa gamu; mi toa koari Nana tinarae. 7 Se Zihova sa mia Tamasa si turaṉa lani gamu koasa popoa masuruna, sa popoa sapu koa ia soku leana na bukaha na kolo pa kauru pepeso sapu totolo vura koari na lolomo na toqere. 8 Meke na popoa sapu toqoli na huiti na bale, meke na vaeni, piqi, pomeqaraneti, olive, meke gua tugo na zipale. 9 Namu lopu kaqu ovia na qaga nia gamu si keketoṉa vasina. Sari na patu si koai na aeana, meke kote boka gelia gamu sa kopa koari na toqere. 10 Pana henahena meke deṉa si gamu, si mi vahesia se Zihova sa mia Tamasa koasa pepeso masuruna sapu ponini gamu Sa.

11 Mi kopu nia gamu pude lopu muliṉi nia se Zihova sa mia Tamasa; kaqu va tabei gamu sari Nana tinarae sapu ponini gamu rau pa rane hie.*Hoz 13:5-6 12 Pana ari gemi gamu, meke kuri mia vetu leadi pude koa, 13 meke pana soku lala dia sari na mia bulumakao na sipi meke sari na mia poata na qolo, meke sari doduru mia likakalae ba soku laladia tugo, 14 si mi lopu vahesi puleni gamu na muliṉi nia se Zihova sa mia Tamasa sapu harupu gamu pa popoa Izipi, vasina pu koa pinausu si gamu. 15 Meke ele turaṉa gamu Sa koasa qega lavata meke tasunana, sapu koa ia na noki variva mate meke sari na nenege. Meke koasa popoa popana sapu loke kolona si va titisi vura poni gamu Sa sa kolo koasa patu lavata. 16 Meke pa korapa qega si poni gamu Sa sa mana pude hena ia, sa ginani sapu lopu hite ele henai ri na tiatamamia pukerane. Meke va atui Sa sari na tinasuna pude podeke gamu, pude pa vinabetona si kaqu va tamanaeni gamu likakalae leadi Sa si gamu. 17 Pude namu lopu kaqu balabala ia gamu sapu mia vina gavorodi telemia pa mia ṉiniraṉira soti si arini. 18 Mi balabala ia sapu e Zihova sa mia Tamasa si ponini gamu sa ṉiniraṉira pude boka tagotago. Evaṉia Sa sapu gua asa, sina lopu hobea Sa sa vinariva egoi sapu tavetia Sa koari na tiatamamia pukerane osolae kamoa pa rane ṉinoroi. 19 Lopu kaqu muliṉi nia gamu se Zihova sa mia Tamasa babe luli na vahesi gamu sari kaiqa tamasa, meke nabulu ni si arini. Ba va balau gamu rau pa rane ṉinoroi, sapu kaqu mate beto si gamu be tavetia gamu sapu gua asa. 20 Meke be lopu va tabea gamu se Zihova si kaqu tava mate beto si gamu, kekeṉoṉo gua ri na butubutu sapu kaqu va matei tugo Sa sipu rapata la si gamu.