8
1 Esei si guana tie gilagilana?
Esei tumae va bakali sari ginugua?
Na ginilagilana va komolo ia tugo sa isumatana sa tie
meke va komolia sa kenuna.
Va Tabea sa Baṉara
2 Mu va tabea sa ginarunu tanisa baṉara, gua si rau, sina va tokotokoro si goi pa kenuna sa Tamasa. 3 Lopu bebeno vura taloa pa kenuna sa baṉara. Lopu turu turaṉi sarini pu tavete va kaleana, ura sa baṉara boka tavetia mo gua sapu hiva nia sa. 4 Sina sa zinama tanisa baṉara si koa ia ṉiniraṉira,
esei boka tozi nia si asa, “Na sa si tavetia goi?” gua.
5 Asa pu va tabei sari nana ginarunu si lopu kaqu tava kilasa,
meke saripu gilae pa bulodia si kote tumae nia sa totoso gotona meke sa hahanana.
6 Ura koa dia sari totoso gotodi meke hahanana tadi doduru ginugua,
be vea mamata gua sari tinasuna tana tie.
7 Sina loke tie si tumae nia sa totoso vugo na repere,
esei boka tozia sa si korapa mae?
8 Loke tie tagoa sa ṉiniraṉira pude lalae nia sa givusu;
ke loke tie tugo tagoa sa ṉiniraṉira pude va nosoa sa nana rane mate.
Gua sapu loke tie si tava malumu pude pule pa totoso varipera,
sa kinaleana tugo ba lopu vata rupahi sarini pu tavetavete koasa.
Na Tie Duviduvili meke na Tie Toṉoto
9 Doduru hire si dogori rau totoso balabala la i rau sari doduru ginugua pu evaṉa pa kauruna sa rimata. Koa nana sa totoso sapu lalae ni sa tie sari kaiqa, meke ta sigiti ni sa. 10 Meke dogori tugo rau sari tie kaleadi ta pomunae, arini pu pilipule koasa Zelepade meke vagi vinahesi pa vasileana vasina hoke ṉoṉovali arini sari na tie. Hie tugo si loketoṉa laena.
11 Totoso lopu tuturei ta kilasa sa tie koasa kinaleana tavetia sa, si sari bulodi rina tie si siṉi na hiniva pude tavete va kaleana. 12 Na tie kaleana si kote boka tavete va sea keke gogoto totoso meke toa va gelenae nana, ba gilania rau sapu sarini pu pamaṉa nia sa Tamasa si kote bokaboka hola la tu. 13 Ba sina sa tie kaleana si lopu pamaṉa nia sa Tamasa, ke lopu kote bokaboka si asa, meke sari nana rane si lopu kote gele.
14 Koa nana pule sapu loke laena pa popoa pepeso: Sari na tie toṉoto sapu vagia sa vina kilasa tadi na tie kaleadi, meke sari na tie kaleadi sapu vagi sari na lineana tadi na tie toṉoto. Hie tugo si loke laena, guni nia arau.
15 Ke arau va egoa sa kinoa qetuqetu, sina loketoṉa si leana pa tie pa kauruna sa rimata ba sapu hena, napo meke koa qetuqetu mo. Meke kote lulia qinetu si asa koari nana tinavete koari doduru rane pa nana tinoa pu ponia sa Tamasa pa kauruna sa rimata.
16 Totoso hiva tumae nia rau sa ginilagilana meke dogori rau sari na tinavete na minabo tanisa tie pa popoa pepeso, sapu lopu va puta i sari matana boṉi na rane, 17 si tiqe dogori rau sari doduru pu evaṉi sa Tamasa. Loke tie kote boka tumae nia sa si korapa ta evaṉa pa kauruna sa rimata. Vea voriti gua sa tie pude hata vura nia, ba lopu kote boka dogoro vagi ia tugo sa sa laena. Sa tie gilagilana kote tozia sapu tumae nia sa gua, ba lokari, lopu dogoria tugo sa sa laena.