1 Pa rane vina ṉeta koasa nana kinoa madi, si va sagei e Esita sari nana poko kalaho, meke taluarae la si asa, meke turu pa pavasa pa korapana sa vetu baṉara. Turu tia la ia sa sa lose sapu koa ia sa habohabotuana baṉara. Habotu sa baṉara pa nana habotuana baṉara, tia la ia sa sa sasadana sa nuqunuquruana. 2 Totoso dogoria sa se Esita sa kalaho turu pa pavasa, si qetu nia sa pude va malumia pude nuquru la koasa. Ke taṉinia sa pa limana sa kolu qolo meke huhuku la nia sa koasa. Meke ene sage la se Esita, meke tiqua sa sa batuna hokara sa kolu qolo tanisa baṉara. 3 “Kalaho Esita, na sa si guahe?” gua sa baṉara. “Tozi nau na sa si hiva nia goi pude kaqu poni igo rau, be sa kukuruna sa qua binaṉara ba kote poni nigo tugo rau.”

4 Olaṉa se Esita sa kalaho, “Qua baṉara, be guana qetu nia agoi, hiva nigo rau si agoi meke se Hamani pude mae koasa qua inevaṉa. Kohite boṉi sa inevaṉa asa pu tava namanama pude somana nia gamu kara.”

5 Tozi nia se Hamani sa baṉara pude tuturei mae pude somana koasa inevaṉa sapu tava namanama. Ke mae somana nia sa baṉara meke Hamani sa inevaṉa te Esita sa kalaho. 6 Totoso korapa napo vaeni sarini, si nanasia sa baṉara se Esita sa kalaho, “Tozi nau na sa si hiva nia agoi, meke gua sapu tepa ia goi koa arau si kaqu vagia goi. Be hiva nia goi sa kukuruna sa qua binaṉara ba kote poni nigo tugo arau koa agoi,” gua sa baṉara.

7 Olaṉa sa kalaho, “Sa qua tinepa na inokoro si hie: 8 Be guana koa sa tataru koasa mua binaṉara si mamu olaṉia sa qua tinepa. Hiva nia rau, agoi meke se Hamani pude mae koasa qua inevaṉa vugo, meke pa totosona asa kaqu tozi vura nia rau gua sapu hiva nia rau.”

9 Qetuqetu hola se Hamani sipu beto sa hinenahena pa inevaṉa. Ba sipu vura si asa meke dogoria sa se Modekae pa sasadana sa vetu baṉara, si bugoro sisigiti si asa sina lopu ta pamaṉae si asa koe Modekae. 10 Ba tuqe pule nia se Hamani koasa ginugua asa, meke la kamo si asa pa nana vetu. Sipu la kamo si asa pa nana vetu si tioko vagi sa sari na nana baere, meke sa nana barikaleqe e Zeresi pude somana koasa binaere hie. 11 Vahesi pule nia Hamani koa ri na nana baere, sapu na tie tagotagona sisigiti si asa, soku nana koburu koreo, meke gua tugo sapu ele ta vizata si asa koasa baṉara koasa tuturuana sapu koa ia sa, meke na tie arilaena si asa hola beto ni sa sari na tie tavetavete tanisa baṉara. 12 Meke zama se Hamani, “Meke lopu arini mo, ba ele ruvata gami Esita sa kalaho si gami kara baṉara Zekisi, meke ele la somana nia gami sa nana inevaṉa, meke keke inevaṉa pule si kote la somana nia gami kara vugo. 13 Ba sari doduru tiṉitoṉa hire si guana loke guguadi koa rau, koa gua sapu dogoria rau se Modekae pa sasadana sa nuqunuquruana pa vetu baṉara.”

14 Ke mae sa binalabala tanisa nana barikaleqe meke sari na nana baere meke tozia rini si guahe: “Vegua be tavetia goi si keke vasina tana huqihuqi tie? Sa vasina asa si padana manege rua ṉava*Hiokona rua mita. ululuna. Meke vugo mamu tepa ia sa baṉara pude kaqu tava huqi se Modekae koasa vasina huqihuqiana tie, meke tiqe kote boka qetuqetu si agoi totoso la si goi koasa inevaṉa.” Balabala ia Hamani sa binalabala hie si leana hola, ke va turua sa sa vasina huqihuqiana tie.