1 Meke zama si Asa koa rau, “Tuna na tie, hena ia sapu koa pa kenumu, mu hena ia sa pepa ta viqusuna hie; mamu la zama koasa butubutu Izireli”*Rev 10:9-10 2 Ke tukelia rau sa ṉuzuqu, meke va mae ia Sa sa pepa ta viqusuna pude hena ia rau.

3 Meke zama si asa koa rau, “Tuna na tie, hena ia sa pepa ta viqusuna sapu vatu nia Rau hie; mamu va deṉa ia sa tiamu koa sa.” Ke hena ia rau si asa, meke liṉiliṉi gua puta na zipale si asa pa ṉuzuqu.

4 Meke zama si Asa koa rau: “Tuna na tie, mu la kamahire koasa butubutu Izireli mamu zama lani koa rini sari Qua zinama. 5 Lopu ta garunu la si goi pa keke puku tie sapu tasuna dia vinekala meke votikaena dia zinama, ba koasa butubutu Izireli mo, 6 lopu koari soku ṉavulu tinoni sapu tasuna beto dia vinekala meke votikaedi dia zinama meke lopu boka ta gilana. Hinokara pude garunu la nigo Rau koa rini si kote avoso igo mo arini. 7 Ba sa butubutu Izireli si korodia pude va avoso atu koa goi sina koa Rau ba korodia tugo pude va avoso mae, ura sa doduruna sa butubutu Izireli si tasunadi hola meke va karikaridi. 8 Ba kote tavetigo Arau pude tasunamu tugo meke kote ṉiṉira hola sari mua binalabala gugua tugo arini. 9 Kote tavetia Rau sa raemu pude ṉiṉira hola guana patu ṉiṉirana, ṉiṉira hola nia sa patu daemani. Ke mu lopu matagutu ni babe holoqoru ni, be vea va karikari gua sa butubutu sana.”

10 Meke zama mae si Asa koa rau, “Tuna na tie, va avoso va leana, mamu vekoi pa bulomu sari doduru zinama pu zama atuni Arau koa goi. 11 Mu la kamahire koari na turaṉamu pu ta raovodi, mamu la zamai. Mu la zama guahe koa rini, ‘Hiera gua si zama nia e Zihova Baṉara,’ mu gua, be va avoso si arini babe lopu va avoso.”

12 Meke ovulu sage nau sa Maqomaqona Tamasa si arau, meke avosia rau pa mudiqu si keke mamalaiṉi nomana guana lulusu pa hebalana sapu zama, “Mani tavahesi sa tinolava te Zihova pa Nana vasina pa maṉauru!” gua. 13 Avosi rau sari tatapurudi rina kurukuru totoso vari nebei rini meke sa buruṉudi rina totopili pa kali dia, gua tugo na buruṉu niu nomana. 14 Ovulu sage nau sa Maqomaqona Tamasa si arau meke vagi taloa nau Sa. Sa maqomaqoqu si ta ṉaziri meke bugoro meke la si arau, ura sa lima ṉiṉirana te Zihova si koa koa rau. 15 Ke kamo la si arau koari tie ta raovodi pu koa pa Tele Abibi sapu pa taqele Ovuku Keba. Meke vasina pu koa ia arini, si habotu turaṉi arau si arini ka zuapa rane. Hodahodaka meke malohoro ni qua sapu dogori na avosi rau.

16 Pa vina betona ka zuapa rane si kamo mae sa zinama te Zihova koa rau: 17 Zama si Asa, “Tuna na tie, ele tavete igo Arau si agoi pude na tie kopu tanisa butubutu pa Izireli; ke mu avosi sari zinama sapu zama atu ni Rau; mamu la tozi ni koa rini sari Qua vina balau. 18 Pana zama la guahe si Rau koasa keke tie, ‘Hinokara kote mate si agoi,’ gua, meke lopu la va balau ia agoi si asa, babe zama la ia pude luara pani sa sari nana hahanana kaleadi pude ta harupu sa nana tinoa, si kote mate si asa koari nana sinea, ba kote zutu nia Rau koa goi sa nana minate. 19 Ba pana va balau ia goi sa tie kaleana asa meke lopu kekere si asa koari nana tinavete kaleadi babe koari nana hahanana seadi, si kote mate si asa koari nana sinea; ba agoi si kote harupu pule nigo.

20 Ego, be keke tie toṉotona si kekere koari nana tinoṉoto meke sari tinavete kaleadi si taveti sa, meke tutuvia sa si keke tinasuna sapu vekoa Arau pa nana siraṉa, si kote mate si asa. Ke kote mate si asa koari nana sinea sina lopu va balau ia goi. Sari lineana sapu taveti sa si lopu kote ta balabala, meke kote zutu nia Rau koa goi sa nana minate. 21 Ba be va balau ia goi sa tie toṉotona pude lopu tavete va sea meke avoso igo sa, meke lopu tavete va sea si asa, si hinokara kote toa si asa sina va tabe ia sa sa vina balau, meke agoi si kote harupu pule nigo.”

22 Sa limana e Zihova si koa vasina koa arau, meke zama si Asa koa rau, “Gasa turu, mamu vura la pa vasina pezarana, meke vasina kote zama atu si Arau koa goi.”

23 Ke gasa turu si rau meke vura la pa pezarana. Meke turu nana vasina sa tinolava ṉedalana te Zihova, gua puta sa tinolava sapu dogoria rau pa taqele Ovuku Keba. Hoqa oporapaha mo si rau pa pepeso. 24 Ba nuquru koa rau sa Maqomaqona Tamasa meke va gasa turu au Sa pa nenequ. Meke zama mae si Asa koa rau: “La mamu la tuku tamunu pule nigo pa mua vetu. 25 Meke agoi, na tuna na tie, si kote pusi nigo aroso arini; ke kote tasuna si goi pude vura la koari na tie pa sada. 26 Kote va napiti ia Arau sa meamu pa ṉuzumu pude lopu kulu si agoi meke lopu kote boka gegesi agoi si arini; ura na butubutu va karikaridi tugo bari. 27 Ba totoso va zama pule igo Arau, si kote tukelia Rau sa ṉuzumu meke kote zama la guahe si agoi koa rini, ‘Hiera gua si zama nia e Zihova Baṉara,’ gua. Asa pu va avoso si vekoa mani va avoso, meke asa pu korona si vekoa mani korona; ura na butubutu va karikaridi tugo bari.