4
Zutui Zihova sari pa Izireli
1 Mi avosia sa zinama te Zihova, gamu pa Izireli,
sina na zinutu si tozi mae nia e Zihova
atu koa gamu pu koa koasa popoa:
“Loke tie si soto va nabu pa vinahesina sa Tamasa loke tie si tataru Nia,
loke tie si pamaṉa Nia.
2 Na tale lineveleve si tozi rina tie, kokoha, meke vari seke matei,
na hiko meke barabarata;
doduru tinarae si ta seke beto,
meke lamo sa seke variva matei.
3 Koa sa ginugua hie si kuliusu sa popoa,
meke doduru pu koa vasina si matemate palae;
sari kurukuru pinomo pa pezara, meke sari kurukuru pa galegalearane
meke sari igana pa kolo si korapa matemate palae.”
Zutui sa Baṉara sari na Hiama
4 “Madi lopu paleke mae zinutu sari tie,
lopu kote zutu ia keke tie si keke tie pule,
ura sari mua tinoni si gugua arini
pu zutu i sari na hiama.
5 Ta tubarae si gamu boṉi na rane,
meke sari poropita si somana ta tubarae luli koa gamu.
Ke kote huara ia Rau sa tinamia, sa popoa Izireli.
6 Sari na Qua tinoni si mate sina lopu tava tumatumae si arini koasa Tinarae te Tamasa.
Sina kilu ia gamu sa tinumatumae,
ke kilu gamu tugo Arau pude na Qua hiama;
sina doṉo pania gamu sa tinarae tanisa mia Tamasa,
ke kote doṉo pani tugo Arau sari mia koburu.
7 Totoso soku sari na hiama,
si soku nono la sari sinea tavete maeni arini koa Rau;
hobe la nia rini sa Qua tinolava ṉedalana
pa beku variva kurekuredi.
8 Deṉa si arini koari na sinea tadi Qua tinoni
meke qetu ni rini sari dia kinaleana.
9 Meke kote guahe: sapu taveti ri na hiama, si kote taveti ri na tinoni.
Kote tava kilasa beto sari karua koari dia hahanana
meke tava lipulipu koari dia tinavete kaleadi.
10 Kote henahena si arini ba lopu deṉa;
kote somana koari na maqota pude va masuru, ba loke koburu kote podoa,
sina veko pania rini se Zihova
meke vala pule ni 11 koari na hahanana maqota.
Naponapo si arini pa vaeni koana meke vaqurana,
sapu vagi pani sari ginilagilana tadi na Qua tinoni.
Hakohako ni sa Tamasa sari na Vinahesi Huporodi
12 Kote nanasia rini sa beku huda
meke ta olaṉa koasa kolu huda.
Na lulia rini sa hahanana tana maqota na ta turaṉa va seu;
meke sekea rini sa vinariva egoi koasa dia Tamasa.
13 Vukivukihi si arini koari na batu toqere
meke va uququ humaṉa lea koari na toa,
pa kauru huda oaku, huda popola meke terebiniti,
vasina sapu aqoro va ibibu lea.
Ke sari tumia vineki si evaṉae na maqota
meke sari barikaleqe roroto maedi si barabarata.
14 Lopu kote va kilasi Arau sari tumia vineki
pana kekere si arini pude na maqota,
gua tugo sari barikaleqe roroto maedi
pana barabarata si arini,
sina sari tie mo teledia ba hata i sari na tuturue
meke va vukivukihi turaṉi sari na maqota koari na beku.
Na tinoni sapu loketoṉa gilania si kote kamo ta huara!
15 Agoi Izireli si hinokara barabarata tugo
ba e Ziuda mani lopu keha lulia si asa pude lopu ta zutu.
Gamu pa Ziuda, lopu la pa Qiliqali;
lopu sage la pa Beti Aveni*Beti Aveni ginuana si vetu tana tinavete kaleadi. Na keke pozapoza pule te Betolo..
Meke lopu tokotokoro guahe, ‘Gua sapu toana se Zihova!’ gua.
16 Sari tie Izireli si tasuna hola, korodia rizu,
gua tugo na bulumakao totoso korona rizu.
Vea meke kote boka pausu i e Zihova sarini
pude guana lami pa inuma duduli?
17 E Iparemi si ele va pupuhia na vinahesi beku
ke mada vekoa nana!
18 Totoso paho sari napo,
ba hoda lamo sa tinavete maqota tadi kasa;
leana hola koari na koimata sari hahanana variva kurekuredi.
19 Na vivirua kote sara pani,
meke kote kurekure ni rini sari dia vinukivukihi la pa beku.