6
Lopu Hinokara sa Kinekere Tadi pa Izireli
Zama sari na tinoni, “Mae, aria mada pule la koe Zihova.
Ele daku rikata va umumu gita Sa
ba kote salaṉa gita Sa;
ele va bakora gita Sa
ba kote hade i Sa sari tubuda.
Hola karua rane si kote va magogoso gita Sa;
koasa vina ṉeta rane si kote va siṉo pule gita Sa
pude boka koa si gita pa vasina sapu koa si Asa.
Aria mada lulia na pamaṉa nia se Zihova;
mada zukuru nono la pude mada tumae nia si Asa.
Gua sapu hinokara kote gasa pule sa rimata,
si kote kamo mae mo si Asa;
kote mae si Asa koa gita gua sa ruku pa totoso ibu,
guana ruku sapu mae pude va bobosia sa pepeso.”
Ba zama se Zihova, “Nasa kote boka tavete nigo Arau si agoi, Iparemi?
Nasa kote boka tavete nigo Arau si agoi, Ziuda?
Sa mia tataru si guana rovu pana munumunu,
guana puni sapu murimuri kekenu taloa.
Gua ke magu va umumu gamu Rau koari na Qua poropita,
va mate gamu Rau koari na zinama pa Ṉuzuqu;
sari Qua vinilasa si malakapi guana kapi koa gamu.
Ura na tataru si okoro nia Rau, lopu na vinukivukihi,
meke pude lulia na pamaṉa nia gamu sa Tamasa, gua, lopu na vinukivukihi vina uququ.*Mt 9:13,12:7
Gua e Adama, si ele sekea rini sa vinariva egoi,
sekea rini sa Qua vinariva egoi koa rini.
Qileadi si na vasileana lavata tadi tie kaleadi,
na tie variva mate si koadi vasina.
Gua sari tie hikohiko sapu opo aqa nia sa tie,
si gua tugo sari puku hiama;
va mate tie si arini koasa siraṉa la pa Sekemi;
taveti rini sari tinavete kaleadi sapu variva kurekuredi.
10 Ele dogoria Rau si keke tiṉitoṉa sapu kaleana hola pa korapana sa butubutu Izireli.
Se Izireli si vala pulenia pa tinavete maqota,
meke tava boni si asa.
11 Gua tugo koa agoi Ziuda,
na vinari pitui korapa aqa nigo.

*6:6 Mt 9:13,12:7