31
Tamasa Kaqu Lavelave nia sa Popoa Zerusalema
1 Madi talotaṉa sarini pu la hata tinokae koari pa Izipi,
pu kalavarae koari na hose pa vinaripera,
pu raṉei sari soku tina totopili varipera tadi kasa
meke sa ṉiniraṉira tadi na dia tie koi hose,
meke lopu doṉo la koasa Tamasa Hopena pa Izireli,
babe hata ia sa tinokae te Zihova.
2 Ba na gilae tugo si Asa meke boka va kamo tinasuna tugo si Asa;
meke lopu hite va pulei Sa sari Nana zinama.
Kote gasa turu varipera ni Sa sari tie kaleadi,
sarini pu zukai sari tie tavete va kaleana.
3 Ba sari pa Izipi si na tie mo meke lopu Tamasa;
sari dia hose si na masa mo meke lopu maqomaqo.
Pana repaha vura ni e Zihova sari limana,
si asa pu vari tokae si kote ta tubarae nia,
meke asa pu ta tokae si kote hoqa;
ari karua beto si kote kaleadi varigara.
4 Hiera gua si zama nia e Zihova koa rau,
“Pana kurumu sa laione,
sa laione nomana, totoso va matea sa sa gana ginani,
meke be vea soku gua sari sepati
pu varigara pude va govete ia,
ba lopu kote matagutu ni sa sari na kukili
babe ta sosoara ni sari na vevehe.
Kote gua tugo se Zihova Tadi na Qeto Minate pu kote gore mae
pude mae varipera pa Toqere Zaione.
5 Kekeṉoṉo gua rina kurukuru tapuru sapu alale dia panaulu,
se Zihova Tadi na Qeto Minate si kote lavelave nia sa popoa Zerusalema;
kote lavelave nia Sa meke va sare ia Sa,
kote ene hola nia Sa meke harupia Sa.”
6 Izireli, mi kekere pule la koa Sa,
ele sea tugo si gamu meke va karikari la koa Sa.
7 Ura koasa rane asa
si kote kilui gamu doduru sari mia beku siliva meke qolo,
sari pu taveti gamu pa lima mia, sari lima kaleadi sara.
8 “Sa popoa Asiria si kote hoqa mate pa vedara sapu lopu tana tie;
na vedara te Tamasa kote va mate i.
9 Sa dia ṉati vasileana ṉiṉirana si kote hoqa pa minatagutu;
totoso dogoria mo rina koimata tadi pa Asiria sa ṉiniraṉira tanisa qeto minate varipera tadi kana si kote ta duaṉa si arini,”
gua si zama vura nia e Zihova,
Asa pu koa Nana nika pa Zaione,
Asa pu halala Nana nika lerana pa Zerusalema.*Ais 30:27-30