41
Sa Hinarupu te Tamasa koari na Tie Izireli
1 “Mi lopu kulu pa Kenuqu, gamu na tie pa nunusa!
Va malumi sari na butubutu pude va vaqura pulei sari dia ṉiniraṉira!
Va sage mae i pude madi zama;
mada vari tutuvi pa vasina tana vinaripitui.
2 Esei na va gevuria sa tie mae guana pa kali gasa rimata,
sapu pa tinoṉoto si ta tioko mae si asa pude tavetavete ponia sa Tamasa?
Koa sa vala ni Tamasa sari na butubutu
meke va malumia Sa pude va kilasi sari na baṉara.
Pa nana vedara si iliri lani sa pa kavuru,
meke pa nana bokala va givusu taloa ni sa guana duduli popana.
3 Hadu luli sa, loke vasi kisakisana meke rizu nono la,
koasa siraṉa sapu asa ba lopu ele enea pukerane.
4 Esei taveti si gua arini, meke va gorevura i?
Esei tioko vagi sari hopeke sinage vaquradi pa pinodalaena?
Arau, e Zihova, si koa Qua pa pinodalaena,
meke kote koa Qua pa vinabetona. Arau si Asa.”
5 Sari nunusa ele dogoria meke matagutu;
sari hukihukirina sa popoa pepeso si neneqara.
Varigara si arini meke ene sage mae;
6 hopeke vari zukai teledia
meke vari zamai, “Koa va ṉiṉirae!”
7 Sa tie peqopeqo si zuka ia sa tie tavetavete pa qolo,
meke asa pu seke va memehia sa beku
si toka nia si asa pu poka vari hodana.
Zama si asa koasa tie va kolo aeana, “Asa si leana,” gua,
meke poka gore nia sa sa beku pude lopu hoqa.
8 Ba agoi, Izireli, sa Qua nabulu,
Zekopi, sapu Arau vizata igo,
gamu na tutina Ebarahami, sa Qua baere,*2 Koron 20:7; Zem 2:23
9 Arau vagi gamu koari hukihukirina sa popoa pepeso,
koari iiona sapu seu latu si tioko vagi gamu Arau.
Zama si Rau, “Agoi si na Qua nabulu,”
Arau ele vizata igo meke lopu ele kilu igo Arau.
10 Ke mu lopu matagutu, na korapa koa turaṉigo Rau;
mu lopu talotaṉa, ura Arau sa mua Tamasa.
Kote va ṉiṉira igo Arau meke toka nigo;
pa Lima mataoqu kote va ṉiṉira igo Rau.
11 “Doduru pu bugoro nigo
si hinokara kote kurekure;
arini pu kana igo,
si kote guana loketoṉa meke mate.
12 Be hata i goi sari mua kana,
si kote lopu dogori goi.
Arini pu atu rapata igo
si kote ta evaṉae loketoṉa dia mo.
13 Ura Arau e Zihova, sa mua Tamasa,
si tuqe vagi igo pa lima mataomu
meke zama koa goi, mu lopu matagutu;
Arau kote toka nigo.
14 Agoi Zekopi, mu lopu matagutu, agoi na nokinoki tunamu,
agoi Izireli hitekemu,
ura Arau telequ kote harupu igo,” zama vura gua se Zihova,
sa mua Hinarupu, si Asa pu Hopena pa Izireli.
15 “Doṉo la, kote tavetaveteni gamu Rau guana tiṉitoṉa va muzara umumu qaqaloto huiti si gamu,
sapu vaqura, ṉaru, meke soku livona.
Kote seke pani gamu sari na toqere meke huara gore ni,
meke ilasa gunini na qaqaloto huiti sari na toa.
16 Kote gona sage ni meke na givusu kote mae paleke taloani;
na givusu gevasa kote talahuara ni.
Ba gamu si kote koa qetu koe Zihova
meke vahesia si Asa pu Hopena pa Izireli.
17 Saripu malaṉa meke loke gedi si hata kolo,
ba loketoṉa si koa;
sari meadi si popa, na memeha.
Ba Arau se Zihova kote olaṉi si arini;
Arau, sa Tamasa pa Izireli, lopu kote veko pani.
18 Kote va tukele poni ovuku Rau koari na batu toqere vasina loke hudana,
meke sari na bukaha koari na lolomo.
Kote iliria Rau sa qega pude koa i na kopi kolo,
meke sari pepeso popadi si kote vura i na bukaha.
19 Kote letei Rau pa qega
sari huda sida, akesia, olive, meke metolo.
Kote lete huda paeni si Rau koari na pepeso kaleanadi,
meke na huda zunipa na saeparasi,
20 pude dogoria ri na tie meke tumae nia,
pude balabala ia meke gilania,
sapu sa limana e Zihova na tavetedi si hire,
sapu Asa pu Hopena pa Izireli si va podaki.”
Va Tia i Zihova sari Tamasa Kokohadi
21 “Ego, vurai sari mia binalabala,” gua se Zihova.
“Zama toketoke ni,” gua sa Baṉara te Zekopi.
22 “Paleke maeni sari doduru mia beku pude tozini gita
sapu sa si kote ta evaṉa.
Pude tozini gita sari ginugua sapu ta evaṉa pukerane,
pude mada viliti
meke tumae nia pae kote kamo la sari.
Babe tozi vura ni koa gita sari ginugua sapu kote kamo mae pule.
23 Tozini gami sa si kote ta evaṉa vugo repere,
pude boka gilania gita sapu hinokara na tamasa si gamu ba vea.
Taveti si kaiqa ginugua, be leana babe kaleana,
pude kote magasa si gami meke matagutu.
24 Ba hola nia loketoṉa si gamu na beku,
meke sari mia tinavete si loke laedi hokara;
asa pu vizata gamu si variva malederena.
25 Ele va gevuria Rau si keke tie pa kali gede*Kali gede be tia la pa kali gasa rimata., meke mae hie sia.
Keke pa kali gasa rimata pu tepa tinokae koa sa Pozaqu.
Neti nana sari na baṉara, guana neti Nana pa onone,
guana tie peqopeqo sapu neti koari na kesikesi huda.
26 Esei tozia si hie pa pinodalaena, pude mada tumae nia,
babe tozi va kenue nia, pude boka zama si gita, ‘Uve, na hinokarana’?
Loke tie tozia si hie,
loke tie tozi va kenue nia,
loke tie avosia keke zinama koa gamu.
27 Arau mo la tozi kenue nia pa Zaione, ‘Doṉo mae, hire si arini!’
Garunu la nia Rau pa Zerusalema sa tie sapu palekena sa inavoso leana.
28 Doṉo la si Arau ba loke beku tu si koa,
lopu keke koari kasa si boka zama,
lopu keke si boka olaṉa totoso nanasa si Rau.
29 Isa, na kokohadi beto, na beku bari!
Sari dia tinavete si lopu hite evaṉia keke toṉa;
doduru dia kineha si kokohadi guana givusu meke variva pupuhu,” gua se Zihova.