54
Zerusalema sa Barikaleqe Tigena
1 “Mu kera, agoi sa barikaleqe sapu tige,* Qal 4:27
agoi pu lopu ele podoa si keke koburu;
poraka vura pa kinera, mamu kukili pa qinetuqetu,
agoi pu lopu ele hite ta sigiti pa pinodopodo;
ura kaqu soku sari koburu tanisa barikaleqe sapu ta luarana
hola nia sa barikaleqe pu koa turaṉa loana,” gua se Zihova.
2 Va noma ia sa mua ipi,
repahi sari na gobana,
mu lopu tuqe pule,
ba va gelei sari mua iku,
mamu va nabui sari tupili.
3 Ura na kote repaha la pa kali matao meke pa kali gede si agoi;
na sari tutimu si kote va rizu palae i sari votiki butubutu,
meke koa hobei sari dia vasileana lavata.
4 “Ke mu lopu matagutu; lopu kaqu tava kurekure si goi.
Lopu kote doṉo va gore gamu arini.
Kote muliṉi nia goi sa kinurekure pa totoso vinekimu pu lopu koa noso pa vetu,
mu lopu balabala pulea sa tinalotaṉa pa mua kinoa naboko.
5 Ura sa mua Tie Kurikuri, Asa sa mua palabatu,
e Zihova Tadi na Qeto Minate sa Pozana,
Asa pu Hopena pa Izireli sa mua Hinarupu;
sapu ta pozae Tamasa pa doduruna sa popoa pepeso.
6 E Zihova kote tioko pule nigo
guana barikaleqe ta luarana meke talotaṉa pa maqomaqona,
guana barikaleqe sapu vaqura meke varihaba,
beto asa si ta kilu mo,” zama gua sa mua Tamasa.
7 “Pa totoso papakana mo, si luara pani igo Rau,
ba pa korapa tataru lohina si kote turaṉa pule nigo Rau.
8 Pa binugoro va hodaka
ke tomea Rau, pa totoso hite, sa isumataqu koa goi,
ba pa tataru loke vina betona
si kote tataru nigo Rau si agoi,”
zama gua se Zihova sa mua Hinarupu.
9 “Koa Rau, sa totoso hie si gua rina rane te Noa,
totoso va tatara nia Rau sapu sa naqe te Noa si lopu kaqu sage pule pa popoa pepeso.* Zen 9:8-17
Ke kamahire si va tatara si Rau sapu lopu kaqu bugoro pule nigo Arau si agoi,
lopu kaqu hokara va kilasa pule igo Arau.
10 Be kamoi niu sari na toqere
meke tava rizu sari na toa,
ba sa Qua tataru nabuna si lopu kaqu niu
meke sa Qua vinariva egoi pa binule si lopu kaqu tava rizu,”
gua se Zihova, sapu tataru nigo si agoi.
Sa Vugo Repere te Zerusalema
11 “Agoi na vasileana ta sigitimu, ta huara koari na raneboṉi meke lopu tava manoto,* Rev 21:18-21
kote kuri pule igo Rau pa patu buma arilaedi,
meke kote podalae pule nigo Rau koari na patu buma guana lamana peava sapu ta pozae sapira.
12 Sari mua vetu hakehakei ululudi si kote na patu ziṉara tavete ni Rau,
sari mua sasada si koari na patu pinopinoro ṉedaladi,
meke doduru mua gobagoba si kote na patu arilaedi.
13 Doduru tumu koreo si kote tava tumatumae koe Zihova,
meke kote noma hola sa binule tadi na mua koburu.* Zn 6:45
14 Pa tinoṉoto si kote tava ṉiṉira si goi:
Sari na ṉinovaṉovala tadi na mua kana si kote koa va seu koa goi; ke lopu kaqu matagutu si goi.
Kote koa si goi pa binule;
sari tinasuna si lopu kote tata mae koa goi.
15 Be atu rapata sari kaiqa, si lopu Arau tavetia si asa;
ba asa pu rapata igo si kote tava kilasa mo koa goi.
16 Doṉo la, Arau na kuri ia sa tie tavetavete pa aeana,
pu nebe va toa ia sa nika koari na patu leradi
meke tavetia sa sa nana tiṉitoṉa varipera.
Meke Arau tugo na kuri ia sa tie huhuara pude huhuara va ilasa,
17 ba loke tiṉitoṉa varipera sapu taliri atu koa goi si kote bokaboka,
meke doduru zinama sapu zutu igo, si kote va mokomoko i goi.
Asa sa minataqara tadi na nabulu te Zihova,
sapu mae guana koa Rau,”
zama vura gua se Zihova.