64
1 Kei, be teuru pania mo Goi sa maṉauru meke gore mae,
pude madi niu pa minatagutu pa kenumu Agoi sari na toqere!
2 Kekeṉoṉo gua sa totoso huruṉu pa nika sari rerequtu
meke va qototo ia sa sa kolo,
Mu gore mae pude vata gilana nia sa Pozamu koari na Mua kana
meke pude neneqara sari na butubutu pa kenumu Agoi.
3 Ura totoso taveti Goi sari na ginugua variva magasadi
sapu lopu balabala kamo i gami,
si gore mae si Goi, meke niu sari toqere pa kenumu.
4 Podalae pukerane si loke tie hite avoso nia,
loke taliṉa hite avoso gilania,
loke mata ele dogoria si keke Tamasa pule ba Agoi mo,
sapu tavetavete toka ni saripu aqa nia si Asa.* 1 Kor 2:9
5 Mae si Agoi pude tokani sarini pu malumu tavete va leana,
sarini pu korapa balabala i sari Mua tinarae.
Ba totoso seani gami si arini si bugoro ni gami Goi.
Vea meke kote boka ta harupu si gami?
6 Doduru gami si kekeṉoṉo gua asa pu lopu via,
meke doduru mami tinavete leadi si gua rina kukuru poko bureṉedi;
harahara guana elelo si gami doduru,
meke sari mami sinea mo sara pani gami guana givusu.
7 Loke tie si tepatepa atu pa Pozamu
babe voriti hata pude vagi Igo si Agoi;
ura na tome ia Agoi koa gami sa Isumatamu
meke va mate tatasa pani gami Goi koa gua koari mami sinea.
8 Zihova, gua ba Agoi tugo mo sa Tamamami.
Gami si na pepeso bupara meke Agoi sa tie tavete raro patu;
gami sari doduru tinavete pa Limamu Agoi.
9 Zihova, Mu lopu bugoro va hola;
Mu lopu balabala veko i ninae rane sari mami sinea.
Ke tepa si gami pude Mu doṉo mae koa gami,
ura gami doduru sari na Mua tinoni.
10 Sari Mua vasileana hopedi si evaṉae qega;
sa vasileana Zaione ba qega tugo, se Zerusalema si ivulu toa.
11 Sa mami Zelepade hopena meke tolavaena, vasina vahesi Igo ari tamamami si Agoi,
si ta sulu pa nika,
meke doduru pu va arilaena i gami si ta huara beto.
12 Zihova, pa mudidi doduru hire, si vea, kaqu koromu hiva tokani gami tu Goi?
Kaqu lopu kulu meke va kilasa nono gami tu Agoi?