5
Sa Kinera tadi Debora e Beraki
1 Koasa rane sana si kera nia ri Debora e Beraki sa tuna e Abinoami sa kinera hie sapu zama guahe:
2 “Mani ta vahesi se Zihova!
Sari na tinoni Izireli si lopu ruriti sari na dia tinoa,
ba malumu qetuqetu lani rini pude varipera.
3 Va avoso mae gamu na baṉara.
Mi va avoso gamu na qavuna.
Kaqu kera na mikemike la si rau koe Zihova sa Tamasa tadi na tie Izireli.
4 Ke Zihova, pana taluarae si Goi koari na toqere pa Seira,
meke vura mae koasa popoa pa Edomu d,
si niu sa pepeso, meke hoqa gore mae pa galegalearane sa ruku.
Uve, titisi gore mae gua tugo koari na lei sa kolo.
5 Sari na toqere si niniu pa kenuna e Zihova sa Tamasa tanisa toqere Saenai.
Niniu si arini pa kenuna e Zihova sa Tamasa tadi pa Izireli.* Ekd 19:18
6 Koari na rane te Samuqa tuna koreo e Anati,
meke koari na rane te Zaeli,
sari na tie holuholu si lopu paleke tiṉitoṉa pa siraṉa nomana,
ba ene gua tu koa rina siraṉa hitehite.
7 Debora, sari na vasivasileana nomadi pa Izireli si ta veko palae;
osolae mae si goi guana tinana Izireli.
8 Sipu vahesi rini sari na tamasa vaqura,
si ta evaṉa sari na vinaripera nomadi pa popoa meke raza la koari na baradi rina vasileana lavata,
meke lopu keke lave babe na hopere
si ta dogoro koari ka made ṉavulu puta tina tinoni pa Izireli.
9 Sa buloqu si somana koari na koimata varipera tadi na tinoni Izireli,
meke gua tugo koari na tinoni pu lopu ruritia dia tinoa pa vinaripera.
Mi vahesia se Zihova.
10 Gamu na palabatu pu hake koari na doṉ'ki kekeoro,
meke gamu na tie tagotago mia pu habotu koari na habohabotuana arilaedi koari na doṉ'ki,
meke gamu pu ene pa siraṉa, mi va avoso mae.
11 Mamu va avosi sari na tie kerakera koari na berukehe,
sapu tozi vurani sari na minataqara te Zihova,
sari na minataqara tadi na tinoni Izireli.
Meke ene va tokele taluarae gore koari na dia vasileana lavata sari na tinoni te Zihova.
12 Aria Debora! Aria!
Aria! Kerania sa kinera! Aria!
Ene la, Beraki tuna koreo e Abinoami,
turaṉa taloani sari na mia tie ta raovodi d.
13 Sari na tie ṉoṉodi si gore mae koa gami na ṉati koimata,
meke sari na tie te Zihova si mae koa rau somanae sari na tie varane.
14 Na mae guadi pa butubutu Iparemi vasina koa sari na tie Amaleki pukerane,
meke luli mae guadi pa butubutu te Benisimane meke sari nana tinoni si arini.
Meke sari na koimata pa vinaripera si gore mae guadi pa butubutu te Manase pa tutina e Maki;
meke sari na palabatu nomadi si mae guadi pa butubutu Zeboloni.
15 Sari na koimata varipera pa butubutu te Isaka si luli koe Debora;
uve, sa butubutu te Isaka meke se Beraki ba mae tugo,
meke luli la ia rini si asa pa korapana sa lolomo.
Ba sari na tinoni koasa butubutu te Rubeni si paqaha;
ura lopu boka vizatia rini pude somana mae.
16 Na vegua ke koa turaṉa hola i rini sari na sipi?
Pude avavosi sari na sepati titioki sari na dia rovana sipi?
Uve, paqaha sa butubutu te Rubeni meke lopu boka vizatia rini pude mae.
17 Sa butubutu te Qadi si koa pa kali gasa rimata koasa Ovuku Zodani.
Meke sari na tinoni pa butubutu te Dani,
si koa hola dia kapae koari na vaka.
Meke sa butubutu te Asa si koa pa raratana masa tata pa kolo hokara.
18 Ba sari na tinoni pa butubutu te Zeboloni meke Napitalai si lopu ruriti dia tinoa meke somana pa vinaripera.
19 Sari na baṉara si mae meke varipera.
Pa totoso asa si varipera sari na baṉara Kenani pa Tanaka tata koasa kolo pa Meqido,
ba lopu vagi taloani rini sari na siliva na tinagotago tadi na tinoni Izireli.
20 Sipu ene vari karovi sari na pinopino pa galegalearane si varipera si arini.* Sa ginuana sa vesi hie si lopu bakala. Sari na mateana si varitokae meke va kilasia se Sisera, babe sa Tamasa si va kilasia koasa galegalearane, paka maṉauru, na ruku na gua.
Meke raza ia rini se Sisera.
21 Meke paleke taloani na naqe pa Ovuku Kisoni si arini,
meke kaqu ene varane, ene latu pa ṉiniraṉira si rau!
22 Beto asa si ene hola la sari na hose;
puzapuza pa pepeso sari na nenedia.
23 ‘Leve nia gana sa vasileana nomana pa Merozi,’ zama gua sa mateana te Zihova.
‘Leveni, leveni gedi sarini pu koa vasina.
Na korodia mae toka nia rini se Zihova,
mae guari na tie varipera pude toka nia si Asa.’
24 Sa barikaleqe tamanaena hola koari na barikaleqe si e Zaeli,
sa barikaleqe te Hebere pa Kenaiti.
Holani sari na barikaleqe saripu koa koari na ipi.
25 Meke sipu tepa kolo napo se Sisera si ponia meleke e Zaeli si asa;
meke ponia meleke tugo sa koa keke baolo tolavaena si asa.
26 Meke vagia sa si keke tupili ipi pa kali limana,
meke keke hama tanisa tie tavetavete pa keke kali limana,
meke poka nuquru nia sa pa batuna.
27 Meke mate si asa, meke eko lopu niu pa nenena sa barikaleqe.
Hoqa pa pepeso meke mate si asa.
28 Meke doṉo vura pa vuida sa tinana e Sisera
meke kabo va ululae pa mudina sa gobagoba poko,
meke nanasa vura, ‘Na vegua ke lopu tuturei pule mae sa totopili varipera te Sisera?
Meke na vegua sari nana hose, ke lopu tuture pule mae? gua.’
29 Meke olaṉa la ia ri na barikaleqe tumatumaedi hola si asa;
ba zama pilipule telena si asa,
30 ‘Na korapa hata likakalae pude zau vagi,’ gua si arini.
‘Meke variva hiani, keke babe karua vineki koari hopeke tie varipera.
Sari na poko leleadi si pude te Sisera,
meke sari na kukuru pinitipiti poko,
si pude tana pakupaku pa ruaqu. Ta zau vagi beto si hire pa vinaripera.’
31 Kei Zihova, madi mate beto gua asa sari na mia kana,
ba madi ṉedala guana rimata gasana sari na mua baere,
pana gasa sage pa nana ṉiniraṉira si asa!”
Meke pa mudina asa si ta evaṉa sa binule koari ka made ṉavulu puta vuaheni.
*5:20 Sa ginuana sa vesi hie si lopu bakala. Sari na mateana si varitokae meke va kilasia se Sisera, babe sa Tamasa si va kilasia koasa galegalearane, paka maṉauru, na ruku na gua.