1 Sipu varigara pa Mizipa sari na tinoni Izireli, si tavetia rini si keke vina tatara nabuna koe Zihova: “Namu loke tie koa gita si kaqu va malumia sa tuna vineki, pude haba la koari na tie Benisimane,” gua si arini. 2 La varigara pa Betolo sari na tinoni Izireli pa kenuna sa Tamasa vasina, osolae kamoa veluvelu kabo alili va ululae sisigiti si arini. 3 “Ke Zihova, Tamasa pa Izireli, na vegua ke ta evaṉa sapu guahe? Na vegua ke tata murimuri taloa, sa butubutu Benisimane, koasa butubutu Izireli?” gua si arini.

4 Pana munumununa sa koivugona, si tekulu sage sari na tinoni meke kuria rini si keke hope vasina. Meke va vukivukihi lani sari na vina vukivukihi va uququ meke sari na vina vukivukihi binaere vasina. 5 Nanasa si arini “Vegua, koa nana tugo si keke puku tie koasa doduruna sa butubutu Izireli, sapu lopu somana varigara pa kenuna e Zihova pa Mizipa?” gua si arini. Tavetia rini si keke vina tatara nabuna sapu zama guahe: Asa sapu lopu somana la pa Mizipa si kaqu tava mate, gua. 6 Talotaṉa sisigiti ni ri na tinoni Izireli sari na tie Benisimane tasidia meke zama, “Pa rane ṉinoroi si paqaha taloa si keke butubutu Izireli,” gua si arini. 7 “Nasa si kaqu tavetia gita, pude poni barikaleqe sari na tie Benisimane koa holadi? Na ele tavetia gita, si keke vina tatara nabuna koe Zihova sapu lopu kaqu poni nia gita koa rini, si keke rina tuda vineki,” gua.

8 Totoso nanasa hata nia rini sapu esei koari na butubutu Izireli sapu lopu somana pa vinarigara koasa butubutu Izireli pa Mizipa, gua, si hata vura nia rini sapu loke tie pa Zabesi pa popoa Qileadi si somana la. 9 Koasa totoso pu titioko pozapoza tadi na tie varipera, si loke tie mae guadi pa Zabesi si olaṉa. 10 Ke ta garunu koasa vinarigara, sari ka manege rua tina dia tie varane, meke zamai rini, “La mamu va mate betoi sari doduru tie pa Zabesi, sari na barikaleqe na koburu tugo. 11 Mi va matei sari doduru tie, gua tugo sari na barikaleqe saripu ele koa turaṉa loadia, ba lopu sari na vineki vaqura.” 12 Meke ari ka made gogoto vineki vaqura si ta vagi, koari na tinoni pa Zabesi, ke turaṉa maeni rini koasa vinarigara pa Saelo koasa popoa Kenani si arini.

13 Garunu la zinama sari na tie Izireli koari na tinoni Benisimane pa Patu Rimoni, pude va betoa sa vinari kanai, gua. 14 Ke pule mae sari na tinoni Benisimane, meke vala i rina tinoni Izireli koarini sari na vineki Zabesi saripu lopu tava mate. Ba lopu pada si arini koa rini. 15 Talotaṉa holani ri na tie Izireli sari na tie Benisimane, sina vata evaṉae nia Zihova keke popoa ivuluna pa korapadi rina butubutu Izireli. 16 Zama sari na koimata tanisa vinarigara, “Sa butubutu Benisimane si loketoṉa nana barikaleqe. Nasa si kaqu tavetia gita, pude poni barikaleqe sarini pu koa hola? 17 Lopu kaqu tava murimuri palae si keke koari ka manege rua butubutu tie Izireli. Kaqu hata ia gita sa siraṉa pude podo tudia sari na tie pa butubutu Benisimane, 18 ba lopu kaqu tava malumu koa gita pude habai rina tuda vineki sarini, ura ele va tatara va nabu nia gita sa tinalevei koasa tie sapu va malumia sa tie Benisimane pude haba ia si keke koari na tuda vineki,” gua si arini.

19 Ego, balabala ia rini, “Tata kamo si keke inevaṉa vinarigara te Zihova pa Saelo, sapu hoke ta tavete koari hopeke vuaheni pa Saelo,” gua si arini. Be guana koa pa popoa Betolo meke tia la pa kali gasa rimata, Saelo si koa pa kali gede, meke na inevaṉa si pa kali gasa rimata koasa siraṉa sapu taluarae pa Betolo meke gore la pa Sekemi sipu lopu ele kamo pa Lebona. 20 Zamai rini sari na tie Benisimane, “La mamu tome koari na inuma vaeni, 21 mamu kopu. Pana vura mae pekapeka sari na vineki Saelo koasa inevaṉa, si kaqu vura mae si gamu koari na inuma vaeni. Hopeke gamu doduru, si kaqu la saputu vagi vineki pude na mia barikaleqe; mamu turaṉa lani koasa mia kali popoa pa Benisimane. 22 Be mae zama koa gamu sari na tamadia babe tasidia koreo si mamu tozini, ‘Va malumu gami pude habai si arini, ura lopu vagi gami koa gamu pa vinaripera pude habai. Meke koa gua, sapu lopu gamu ponini gami si arini, si lopu sekea gamu sa mia vina tatara,’ kote gua si gamu,” gua si arini.

23 Tavetia tugo ri na tie Benisimane sapu gua asa. Hopeke vizati rini sari na dia barikaleqe koari na vineki saripu pekapeka pa Saelo meke turaṉa taloani. Pule la si arini koari na dia kali popoa soti, meke kuri pulei sari na dia vasileana nomadi meke koa vasina. 24 Pa mudina sa vinaripera meke sa vinarigara pa Betolo si pule la sari na tie Izireli koari hopeke dia butubutu soti, na tatamana, meke koari dia tinago soti.

25 Loke ṉati baṉara si pa popoa Izireli koasa totoso asa. Doduru tie si hopeke tavetia mo gua sapu leana pa nana binalabala soti.*Zaz 17:6