8
1 Zama vura pule se Zihova, “Koasa totoso asa, sari susuridi ri na baṉara pa Ziuda, sari susuridi rina koimata, sari susuridi rina hiama, sari susuridi rina poropita, meke sari susuridi rina tie pu koadi pa Zerusalema si kote ta vagi vura koari na dia lovu. 2 Kote ta ipiapaṉae si arini pa pepeso pude vata dogoro ni koari na rimata na sidara meke pinopino, arini sari na tamasa kokohadi pu vahesi na tataru ni rina Qua tinoni. Lopu kaqu ta varigarae si arini ba kote koa gua na ebasa pa pepeso. 3 Meke sari visavisa tiena sa butubutu kaleana hie pu boka toa holadi koari na vasidi pu vekoni Rau pa tinaraovo, si kote na minate si okoro nia rini meke lopu na tinoa, Arau Zihova Tadi na Qeto Minate si zama vura ni sari na zinama hire.”
Na Sinea meke na Vina Kilasa
4 Zama vura pule guahe se Zihova koe Zeremaea, “Kote zama si agoi koa rini:
Totoso hoqa sa tie, si vegua, lopu kote turu pule nana mo sia?
Totoso paza sea taloa sa, si lopu kote kekere pule mae mo sia?
5 Na vegua ke paza taloa sari tie hire meke lopu kekere pule hokara mae tu?
Ba tuqe va nabu dia tu pa sinekesekei tadina dia beku,
meke korodia kekere pule mae koa Rau.
6 Ele va avosi Rau sari dia vivinei,
meke lopu hinokaradi sari dia zinama;
lopu keke tie si talotaṉa ni sari nana sinea,
meke zama, ‘Kei, na kinaleana tugo si taveti arau,’ gua.
Doduru si kekere la pa hopeke dia siraṉa,
guana hose sapu haqala totoro la pa vinaripera.
7 Sari na kurukuru tapuru ba gilania mo sa totoso pude kekere pule si arini,
sari na omehe, na kakia meke na kara,
ba gilania tugo sa totoso pude kekere pule pa vori si arini.
Ba lopu gua tu sari Qua tinoni!
Namu lopu tumae nia tu rini sari tinarae te Zihova.
8 Vegua meke boka zama guahe si gamu, ‘Gilae mami si gami,
meke sa Tinarae te Zihova si koa nana koa gami,’ gua?
Ba dotu, sari tinarae si ta hobe koari mia tie kubekubere
meke ta iliri la tu pa kinohakoha.
9 Sari mia tie gilae si kote tava kurekure,
kote nunala si arini meke hoqa la pa dia sipata teledia.
Ura dotu, ele kilua rini sa zinama te Zihova,
meke na ginilagilana lohina d savana si koa koa rini?
10 Gua ke, kote valani Rau sari dia barikaleqe koari kaiqa
meke sari dia inuma si kote tagoi rina votiki tie.
Podalae koari tie hitekedi meke kamo koari tie nomadi
si hata sisigiti ia sa poata pa hahanana sinekesekei;
podalae koari poropita meke kamo koari na hiama,
doduru si tavete kokoha mo koari na tie.*Zer 6:12-15
11 Salaṉa hake ulue i mo rini sari bakora tadi Qua tinoni,
lopu va noma nia binalabala rini,
meke zama, ‘Bule, bule,’ gua si arini,
totoso loke binule si koa.*Izk 13:10
12 Vegua, kurekure tugo si arini koa ri na totoso sapu taveti rini sari hahanana variva malederedi?
Lokari, namu lopu hite kurekure hokara si arini;
lopu tumae nia rini na sa sa kurekure.
Gua ke kaqu hoqa turaṉi rini saripu ele ta seke va matedi;
pana va kilasa i Arau, si kote asa tugo sa vina betodi,”
zama vura gua se Zihova.
13 Zama guahe pule se Zihova, “Totoso hiva la si Arau pude vagi varigara ni sari Qua tinoni,
si sari na tie si guana huda piqi d na huda vaeni sapu loke vuadi;
sari elelo ba harahara tu.
Gua ke sa pepeso poni ni Rau
si ele vala nia Rau koari votiki tinoni.”
14 Sari tinoni te Tamasa si zama guahe: “Na vegua ke habotu noso eko mo si gita?
Aria mada varigara!
Mada nuquru la koari na vasileana sapu ta gobadi,
mada la mate vasina!
Ura e Zihova sa nada Tamasa si ele tozi vura nia sa minate tadigita,
meke ponini gita napo Sa sapu koa ia poizini pude napoa,
sina ele tavete va sea si gita koe Zihova.
15 Hata binule si gita,
ba loke lineana si mae,
hata ia sa totoso pude ta salaṉa gua,
ba dotu sapu variva matagutu mo si koa.
16 Na baroṉodi ri dia hose si ta avoso mae gua pa Dani;
koasa vevehena sa kabodi rina dia hose varipera
si neneqara beto sa doduru popoa.
Mae si arini pude huara ia sa popoa
meke doduru pa korapana sa,
sa vasileana lavata meke sari tiena.”
17 Zama vura se Zihova, “Doṉo mae, sari na noki variva matedi si garunu atu ni Arau koa gamu,
noki saripu lopu boka tava manavasa,
meke na kote garata gamu rini,”
zama gua se Zihova.
Talotaṉa ni Zeremaea sari Turaṉana
18 Zama se Zeremaea, “Kei sa qua tinalotaṉa si lopu boka ta salaṉa,
ta sigiti hola sa buloqu.
19 Va avoso! Kabo vura sari na qua tinoni,
ta avoso mae gua pa popoa seu:
‘Vegua, lopu koa tu pa Zaione se Zihova?
Vegua, ke sa nana Baṉara si lopu koa tu vasina?’ ”
Zama se Zihova koe Zeremaea, “Na vegua ke va gevuru Au rini pude bugoro ni sari dia beku,
meke sari dia tamasa karovodi na loke laedi?”
20 Zama pule sari tinoni, “Sa totoso pakepakete si ele hola,
sa totoso maṉini si beto mo,
meke lopu ta harupu mo si gita,” gua sari tie.
21 Zama pule sa poropita, “Bakora sa buloqu sina bakora sari na qua tinoni;
kabo si rau pa tinalotaṉa, na kuliusu hola si arau.
22 Vegua, loke meresena si koa pa Qileadi?
Vegua, loke tie salaṉa si koa vasina?
Na vegua ke sa bakora tadi qua tinoni
si lopu ta salaṉa?