12
Nanasia Zeremaea se Zihova
1 Zihova, Agoi si toṉotomu lamo,
pana vari tokei nia arau si keke ginugua koa Goi.
Ba maqu zama nia koa Goi sa Mua vinilasa toṉotona.
Na vegua ke tagotago sari tie kaleadi?
Na vegua ke bokaboka sarini pu lopu raṉe Igo si Agoi?
2 Agoi mo letei, meke va gore karoso si arini.
Toqolo si arini meke vua si arini,
meke Agoi mo si koba koa pa berudia
ba seu pa bulodia.
3 Zihova, ba Agoi gilanau si arau;
dogoro au Goi meke podeki Goi sari qua binalabala pa guguamu Agoi.
Mu ririhi taloani si arini pude hovai guana sipi!
Veko vata kale i pude aqa nia sa rane pude tava mate!
4 Ve seunae gua kaqu koa popa eko sa popoa,
meke sari na duduli koari na doduru vasidi si harahara?
Sina kaleadi sari na tie pu koadi pa korapana,
ke mate sari na kurukuru ṉame na kurukuru tapuru.
Ba sari tie si korapa zama guahe,
“Lopu kote dogoria na tie sapu sa si kote ta evaṉa koa gita,” gua.
5 Olaṉa se Zihova, “Be haqala varivose turaṉi agoi sari tie
meke va mabo igo rini si agoi,
si vegua meke kote varivose turaṉi goi sari na hose?
Be tubarae nigo si goi pa pezara kalalasana,
si vegua meke kote boka ia goi sa raqo pa Zodani?
6 Sari tasimu koreo pa mua tatamana soti,
arini mo qoraqora nigo si agoi;
arini si vevehe va noma, zamazama nigo si agoi.
Mu lopu raṉei,
be vegua zama va leana gua si arini koa goi,” gua.
Talotaṉa ni Zihova sari Nana Tinoni
7 Zama pule guahe se Zihova, “Kote veko pania Rau sa qua butubutu,
sa Qua tinago si kote etulu pania Rau;
kote variponi nia Rau si asa pu tataru nia Rau
la koari na limadi ri nana kana.
8 Sa Qua tinago si ele taliri pule mae Au
guana laione pa soloso.
Kurumu mae Au sa,
ke kana ia Rau.
9 Sa Qua tinago si guana kurukuru tapuru,
sapu vari likoho nia ri kurukuru hena tie matedi.
La mamu varigara mae ni sari doduru kurukuru ṉame nomadi;
va mae i pude madi gani va beto pani.
10 Soku votiki sepati kote ṉovalia sa Qua inuma vaeni,
meke neti va ṉovalia sa Qua inuma;
kote iliri ia rini sa Qua inuma
la pa pepeso popana meke ta huarana.
11 Kote na pepeso ta huarana meke ta kiluna,
popa meke ivulu pa kenuqu Rau;
sa doduruna sa popoa si kote ta evaṉae qega
sina loke tie si tataru nia.
12 Kote mae gua sari tie huhuara koari doduru toqere loke hudadi pa qega,
ura sa vedara te Zihova si kote va mate tie
podalae pa keke kalina sa popoa kamo la pa keke kalina;
loke tie si kote boka govete.
13 Kote lete huiti si arini ba kote pakete hilibubuku;
kote tavetavete ṉiṉira ba loke lineana si gorevura.
Ke mi paketia sa kinurekure
koa gua koasa tinaṉaziri te Zihova.”
Sa Vina Tatara La koari na Butubutu pa Vari Kalina Izireli
14 Hiera gua si zama nia e Zihova: “Ari butubutu kaleanadi pu tuqe vagia sa pepeso sapu vala nia Rau koari Qua tinoni pa Izireli, si kote rabutu pani Rau koari dia pepeso si arini kekeṉoṉo gua sapu kote saputu vagi pule nia Rau sa butubutu Ziuda pa vari korapa dia. 15 Ba mudina sapu rabutu pani Rau si arini si kote tataru pule ni Rau, meke turaṉa pule lani pa dia hopeke pepeso pu tagoi rini, pule la pa hopeke dia popoa. 16 Meke be tumae va leana nia rini sa vinahesiqu meke tokotokoro pa Pozaqu meke zama guahe, ‘Gua sapu toana gua se Zihova,’ kekeṉoṉo gua mo sapu va tumatumae i rini sari Qua tinoni pude tokotokoro pa pozana Beolo, si kote tava poni lolomo si arini pude koa somana koari Qua tinoni. 17 Ba be keke butubutu si lopu hiva va avoso, si kaqu la Rau meke rabutu pani hokara nia, meke huara pania,” zama vura gua se Zihova.