18
Sa Tie Tavetavete Raro
1 Hiera sa zinama te Zihova sapu kamo la koe Zeremaea: 2 “Gore la koa sa vetu tanisa tie tavetavete raro, meke vasina kote vatu nia Arau sa Qua inavoso.” 3 Ke gore la si arau koasa vetu tanisa tie tavetavete raro, meke dogoria rau sapu korapa tavetavete si asa koasa nana totopili tavete raro. 4 Ba sa raro sapu korapa va vura nia kineha sa si keha sea pa limana; ke huara ia sa sa pepeso bupara meke tavete pule ia sa si keke kineha raro pule, keha pule guni nia sa sapu goto pa nana binalabala.
5 Meke kamo mae sa zinama te Zihova koa rau meke 6 zama vura gua se Zihova: “Gamu pa butubutu Izireli, vegua lopu pada tavete guni ni gamu Rau gua sapu tavetia sa tie tavete raro hie? Gua sa pepeso bupara pa limana sa tie tavete raro, si gua tugo asa si gamu na butubutu Izireli pa Limaqu Arau. 7 Be tozi vura nia Rau, pa totoso sapu hiva nia Rau, sapu kote keke butubutu babe na binaṉara si kote tava rabutu, tava gore palae, babe ta huara, 8 ba be sa butubutu sapu va balau ia Rau si kekere pa nana hahanana, si kote hobe binalabala si Rau meke lopu va kamo la nia sa tinahuara sapu ele hiva tavete la nia Rau koa sa. 9 Meke be pa keke totoso pule si tozi vura nia Rau sapu keke butubutu babe na binaṉara si kote kuri ia babe podalae nia Rau, 10 ba pana tavete va sea si asa pa Kenuqu Rau meke lopu va tabe Au sa, si lopu kaqu va gorevura ia Rau sa hiniva leanana sapu hiva tavete la nia Rau koa sa.
11 Ego kamahire mamu la zama i sari na tinoni pa Ziuda meke arini pu koa pa Zerusalema sapu, ‘Hiera gua si zama nia e Zihova: Dotu! Arau korapa va nama ni gamu si keke tinasuna meke korapa balabala ia si keke hiniva kaleana pude va razani gamu. Ke mi kekere koari mia hahanana kaleadi, mi hobei sari mia hahanana meke tinavetavete. Hopeke gamu si kaqu luara pani sari na mia sinea.’ 12 Ba kote olaṉa si arini, ‘Lopu boka si gami. Kote luli mo gami sari mami binalabala; kote hopeke luli gami sari bulo tasunadi meke kaleanadi tamigami.’ ”
13 Gua ke, hiera gua si zama nia e Zihova:
“La nanasi sari na butubutu:
Esei ele avoso nia keke toṉa gugua hie pukerane?
Keke tiṉitoṉa kaleanana sapu variva magasa si tavetia sa Tuqu vineki ta pinirovetuna, se Izireli. La vahesi votiki tamasa tu si asa.
14 Vegua, sa sinou pa toqere Lebanoni
si hite murimuri palae koari na patu pa batu toqere?
Vegua hoke noso sari leana ibudi sapu mae guadi pa toqere seuna asa?
15 Lokari, ba sari Qua tinoni si ele muliṉi Nau rini si Arau;
va uququ oto huda humaṉa lea la si arini koari na beku loke laedi,
sapu va tubarae ni koari na dia hahanana
meke lopu ene luli sari siraṉa koadi.
Va ene i rini pa vale siraṉa
meke koari na siraṉa lopu ta gilanadi.
16 Sa dia popoa si kote ta huara meke kote ivulu,
kote doṉo gorea ri na tie pu dogoria;
doduru pu ene hola si kote magasa
meke kote hiruhiru batu.
17 Guana givusu pa kali gasa rimata,
si kote talahuarae ni Rau pana govete ni rini sari na dia kana;
kote sa Mudiqu si kote va dogoro ni Rau meke lopu sa Isumataqu
koasa rane pana kamo sa tinasuna nomana koarini.”
Sa Kinuhanana e Zeremaea
18 Zama si arini, “Mae mada va hoqa ia se Zeremaea; ura sari vina tumatumae koasa tinarae te Tamasa tadi na hiama si lopu kaqu noso, babe sari vinari tokae tadi tie gilae, babe sari zinama tadi na poropita. Ke mae, mada la rapatia pa zinama meke koroda va taliṉa i sapu tozi sa.”
19 Zihova va avoso mae au;
Avosi saripu zama ni ri qua kana!
20 Vegua, kaqu ta pia kinaleana tu sa lineana?
Ura korapa geli nau pou arini si arau.
Mu balabala ia sapu arau si turu pa kenumu Agoi
meke zama poni si arini
pude va taliri va seu ia koarini sa Mua tinaṉaziri.
21 Ke va kamo ni soṉe sari dia koburu;
va kamo lani koasa ṉiniraṉira tanisa vedara.
Sari dia barikaleqe si lopu va tago ni koburu, Mu va naboko i;
sari dia palabatu si madi tava mate,
meke dia tie vaqura si madi mate pa vedara pa vinaripera.
22 Mani ta avoso sa kinabo koari dia vetu
totoso va kamo va hodaka ni tie varane Agoi si arini,
ura ele geli nau pou rini si arau
meke tome nia sipata rini sari nenequ.
23 Zihova, ura Agoi ele gilani Mua,
sari doduru dia kinuhana pude va mate au.
Mu lopu taleoso ni sari dia tinavete sea
babe vulasa pani sari dia sinea pa Mua dinogodogorae.
Madi tava mate pa Kenumu Goi si arini;
va kilasi sipu korapa bugoro si Agoi.