18
Bilidadi
1 Meke olaṉa se Bilidadi, sa tie mae guana pa popoa Sua,
2 “Zobi, totoso sa kote beto zama si goi?
Be va avoso goi si kote boka vivinei igo gami si goi.
3 Na vegua ke balabala guni ni gami goi na bulumakao?
Na pekipeki mami si gami gua si goi?
4 Na korapa va sigiti pule nigo si goi koasa mua binugoro.
Vegua, kaqu taluarae si gami pa kasia popoa sina bugoro si goi?
Vegua, kote va rizui Tamasa sari na toqere pude va qetu igo?
5 Uve, sa zuke tadi na tie kaleadi si kote tava mate,
meke lopu kaqu tava huruṉu pule.* Zob 21:17
6 Sa kalalasa pa dia ipi si kaqu evaṉae huporo,
meke sa zuke pa kali dia si kote mate.
7 Sari dia inene bebeno si kote malohoro gore,
kote hoqa puleni teledia koari na dia binalabala kaleadi.
8 Sari nenedia kote turaṉa lani pa korapa vaqara,
meke kote ta tuqe vagi si arini.
9 Na sipata kote saputi nenedia,
meke kote tuqe vekoi.
10 Na aroso si tava nadoro pa siraṉa,
meke na sipata si tava tome pa pepeso.
11 Doduru varikali dia si variva matagutu beto mo,
meke tasuna ni rini pa doduru inene.
12 Na ovia si malohoro nia rini,
meke na tinasuna aqani pana hoqa rini.
13 Na minoho variva mate si gani luli kapudia,
meke va muzi i limadia na nenedia.
14 Ke ta daku palae koari na dia kinoa va leana pa dia ipi,
meke ta ririhi la pa minate variva holoqoruna.
15 Kamahire sa tie hiva la koa pa nana ipi si boka mo,
ba na ebana sa nai si kaqu tava vuvusu paki pa korapana pude va via ia.
16 Sari karosodi pa kauru pepeso si popa
meke sari lelaṉadi panaulu si harahara.
17 Sari inavosodi si hokoto mo pa kasia popoa,
meke loke tie balabala pule i pozadi.
18 Kaqu ta hadu vura taloa koasa popoa tadi na tie toadi,
hadu vura ni pa kalalasa, la pa hinuporo.
19 Kaqu loke tuti dia si koa,
loke tie sapu podoi rini si kaqu koa hola koari dia vasidi.
20 Ari tie pa kali lodu rimata si magasa nia sa minate tadirini,
meke ari pa gasa rimata si matagutu mate dia.
21 Gugua asa sa tinoa tadi na tie kaleadi,
sa tinoa tadi na tie pu lopu gilania sa Tamasa.”