30
1 Ba kamahire si va sisire nau rini, sari tie mudidi koa rau,
ba sari tamadia si lopu pada pude haqala turaṉi sari qua siki pude varitokae kopu sipi.
2 Na sa laedi koa rau sari tie gua arini?
Ele malohoro meke loke tinavete boka tavetia rini
3 Doṉo ovia meke malaṉa si arini,
ene lamae ia rini sa pepeso popana,
pana boṉi enea rini sa pepeso vasina loketoṉa boka toa ia.
4 Pa qega si hata ginani na kupi vagi elo huda,
meke hena karoso sapu pasa hola koasa huda ta pozae huda sasara.
5 Hitu taloa ni rina turaṉadia pa kinoa tie,
kukili ni rini guana tie hikohiko.
6 Hata vasina pude puta koari na taqele ovuku popadi,
koari na bae pa kali toqere, na pou pa pepeso.
7 Kabokabo guana kurukuru pinomo,
meke nunuzikae pa korapa hiqohiqo raqoraqona.
8 Sari na tie arini si gua sapu loke pozadi meke lopu ta gilanadi!
Na tie ta hitu vuradi si arini pa popoa.
9 Ba kamahire si kera va sisire nau ari tudia,
meke arau si na dia ṉoṉovalana mo.
10 Maledere nau rini meke lopu boka tata mae,
meke lopu matagutu loroa rini sa isumataqu.
11 Kamahire sapu vagi pania Tamasa sa qua ṉiniraṉira meke va malohorau Sa,
si kana au meke ṉoṉovala au, lopu pamaṉa nau rini.
12 Pa kali mataoqu si raza mae sari tie vaqura;
veko sipata si arini pa siraṉa sapu enea rau,
meke edi hiva va mate hola au rini.
13 Tukua rini sa qua siraṉa ke lopu boka govete si rau,
loke tie si tokani totoso podekia rini pude ṉovalau,
na gilania dia sapu loke tie kote hiva toka nau.
14 Raza koa rau guana qeto minate nuquru gua pa goba ta huarana pa vasileana,
meke hoqa mae au rina patu pa goba totoso haqala mae gua si arini koa rau.
15 Koa mo pa minatagutu si rau,
sa laequ rau si paleke taloa nia na givusu,
meke sari qua tinagotago si murimuri guana lei.
16 Kamahire si goregore hikare sa qua tinoa,
loke sinalaṉana sa qua minoho.
17 Pana boṉi si sigiti beto susuriqu,
meke loke kokoina sa tinasigiti pa tiniqu.
18 Pa lima ṉiṉirana te Tamasa si tuqe vagia sa ruaqu,
meke liloho vagia Sa sa kolana sa qua poko.
19 Gona gore lani au sa Tamasa pa nelaka,
meke guana kavuru na eba mo si rau.
20 Kabo atu si rau koa goi Tamasa, ba lopu olaṉa si Goi,
turu atu pa Kenumu si rau ba lopu liṉana mae au Goi.
21 Kamahire vata sigitau tu Goi si arau,
sa lima ṉiṉirana Tamugoi si va raza nau Goi.
22 Saputu vagi au Goi meke va paleke nau pa givusu,
meke hiru lamae nau Goi koari na raneboṉi.
23 Gilania rau sapu pa minate paleke lani au Goi,
vasina ta huhuku nia ari na tie toadi.
24 Hokara, loke tie hoke raza ia sa tie pu ele koa pa tinasuna,
sipu korapa kabo hata tinokae si asa.
25 Vea, lopu hoke kabo turaṉi tu rau sarini pu tasuna?
meke tataru ni sarini pu habahuala?
26 Ba totoso hata ia rau sa lineana si kinaleana tu si mae,
totoso hata ia rau sa kalalasa si hinuporo tu si kamo mae.
27 Sa buloqu si tasuna meke lopu boka magogoso,
doduru rane si tasigiti mo si rau.
28 Koa pa hinuporo si rau, loke rimata pude hite kalalasa;
turu si rau pa vinarigara meke tepa tinokae.
29 Sa mamalaiṉiqu si kuliusu meke talotaṉa,
guana kabodi ri na kurukuru nae na omehe.
30 Sa kapuqu si ta iliri muho, na kore palae,
sa tiniqu si maṉini, na moho.
31 Sa qua mike si koba kera talotaṉadi mo si lopi ni sa,
meke sa qua ivivu si turaṉi sa sarini pu taruqoqo.