41
1 Boka riqihi nia vinetuṉu goi sa leviatani,* Sam 74:14, 104:26; Ais 27:1
babe pusi nia iku goi meana si asa?
2 Boka va nuquru nia iku goi sa isuna
babe rita nia vinetuṉu sa asena?
3 Vea, kote tepa sisigiti igo sa pude tataru nia, gua?
Kote zama va memehe atu igo sa si agoi?
4 Vea kote hiva tavete vinariva egoi si asa koa goi,
pude na nabulu tamugoi si asa ninae rane, gua?
5 Boka pausia goi si asa guana kurukuru tapuru,
babe pusia nenena pude na lopilopiana tadi na mua nabulu vineki?
6 Kote hiva vari hobe nia tugo ri na tie habu sia?
Kote hiva magumagua ri na tie holuholu sia meke vari hia nia?
7 Boka gona nia soloro goi sa tinina
babe goto va soku nia hopere sa batuna?
8 Pana tiqu la nia lima goi,
si lopu kaqu muliṉi nia goi sa vinariperai pa mudina asa.
9 Sa binalabala pude saputu vagia si kokoha;
na dinogorona mo sa ba mabubulu mo sa tie.
10 Pude loke tie boka soara ia si asa,
si esei kote hiva turu va tia Au si Arau?
11 Koe sei si kaiqa Qua gale pude kaqu lipui Arau?
Nake, doduru likakalae pa kauruna sa maṉauru si Qua beto mo Arau.
12 Arau boka vivinei nia mo sa tinina sa leviatani* Mi tiro ta pa hubina ele pepa sa vina bakala pa Zobi hinia ṉeta vesi vesu.,
sa nana ṉiniraṉira meke sa rinizu tanisa.
13 Esei boka daku pania sa kapuna sapu ṉiṉira guana aeana,
Esei kote boka gona nia tupi sa kapu moatana?
14 Esei kote boka kakele tukelia sa ṉuzuna sapu gua ri na sasada ṉiṉiradi,
ura, sari livona si variva matagutu pa vari kalina?
15 Sa mudina si na tokele vinari hakei lave,
saripu napiti varigara meke ṉiṉira gua tugo na patu.
16 Sari lave si vari kapae sisigiti
ke sa givusu si lopu boka ene pa vari korapadi.
17 Nabu toa sari vinari hodai tadirini;
na vari sotoi si arini meke lopu boka ta paqaha.
18 Totoso tihe sa si vura ia na kapi si asa,
meke sari matana si guana gonana sa kalalasa pana vaqavaqasa.
19 Na vura ia na nika sa ṉuzuna,
meke pidaladi na kapi si tapuru vura.
20 Vura i na tuṉaha sari qoqoro isuna
guana duduli huruṉudi pa kauru raro qototona.
21 Sa siniṉo tanisa si va huruṉu motete,
sa nika si huruṉu vura pa ṉuzuna.
22 Pa ruana koa sa nana ṉiniraṉira,
meke minatagutu mo si koa pa doduru vasina pu la sa.
23 Sa masana si ṉiṉira meke nabu;
loketoṉa boka nuquru la ia.
24 Sa raqaraqana si ṉiṉira guana patu,
ṉiṉira guana patu tana munamunala kiko huiti.
25 Pana tekulu sage sa si matagutu mo sarini pu ṉiṉiradi;
togolo mo si arini na lopu boka.
26 Sari na vedara pu kamo la si loketoṉa evaṉia;
meke gua tugo sari na hopere, tupi, na dive.
27 Na aeana si na duduli guni nia sa,
meke sa boronizi si guana huda popozuna.
28 Na tupi si lopu boka va rizuna sa;
patu pa kurukuru paqala si guana elelo sapu palekia givusu.
29 Na vedara si guana elo duduli koasa, meke hegere si asa pana hopere nia soloro ari tie.
30 Sa tiana sa si guana vinarigara umumu qelasi ṉarudi,
gelia sa sa pepeso totoso ṉame karovia sa sa nelaka.
31 Evulu ia sa sa kolo lamana guana raro qototona,
meke nikinakili sa kolo guana raro oela ṉohara.
32 Pana hola sa si vosusu sa kolo,
meke keoro kaluna sa lamana kote gua si arini.
33 Loketoṉa pa kasia popoa si boka tava padapada la koasa;
na kurukuru sapu lopu matagutu nia keketoṉa.
34 Doṉo va gore betoi sa sari doduru pu vahesi puleni;
na baṉara ni sa sari doduru kurukuru pinomo.”
*41:1 Sam 74:14, 104:26; Ais 27:1
*41:12 Mi tiro ta pa hubina ele pepa sa vina bakala pa Zobi hinia ṉeta vesi vesu.