3
Vina Kilasa, Pinulepaho, meke na Rinoverove
1 Arau sa tie sapu dogoro soti ia sa vina kilasa
koasa kolu tinaṉaziri te Zihova.
2 Hadu taloa nau Sa meke va ene au Sa
pa hinuporo, lopu pa kalalasa.
3 Hinokara, na seke lamo au Sa
pa limana, doduruna mo sa rane.
4 Sari kapuqu meke masaqu si va barogoso i Sa
meke moku i Sa sari susuriqu.
5 Mae raza au Sa meke vari likohae nau Sa
turaṉae tinasigiti na minamata.
6 Va koa au Sa pa hinuporo
gua ari kasa pu matedi pukerane.
7 Goba vari likohae nau Sa pude lopu boka govete;
va mamata nau seni Sa.
8 Pana titioko vura babe kabo hata tinokae rau,
si korona avosi Sa sari qua vinaravara.
9 Bara hukata nia patu nomadi Sa sa qua siraṉa;
vasina hoke ene gua rau si va koqi ia Sa.
10 Guana kurukuru bea sapu kopu aqa,
na laione sapu tome aqa,
11 si ririhi pani au Sa koasa siraṉa meke garata va kaleana au Sa
beto si veko pani au mo Sa.
12 Ṉavea Sa sa nana bokala
meke veko au Sa pude Nana gonagonana tupi.
13 Suvulu pa buloqu
sari tupi koadi pa Nana vovoina tupi.
14 Na dia hegehegereana mo ari na tie si arau;
pa dia kinera si va sisire nau rini doduruna sa rane.
15 Koari na qua tinasigiti si va napo nau elelo pasadi Sa.
16 Va hena nau zalekoro Sa meke va pakoi livoqu;
beto si neti va gore au sa pa pepeso.
17 Sa binule si heki nia Sa koa rau;
ele muliṉi nia rau vea gugua sa tinagotago.
18 Ke zama si rau, “Sa qua tinolava si ele taloa
meke gua tugo sapu rovea rau kote vagia koe Zihova.”
19 Balabala i arau sari qua tinasigiti meke kinoa eapa,
sapu pasa meke lopu bakala.
20 Na lopu kote muliṉi nia rau,
meke balabala mamata sa maqomaqoqu.
21 Ba hiera si koa pa qua binalabala
gua ke tumae nia rau sa lineana si kote kamo.
22 Koa gua sa tataru nabuna te Zihova si lopu makudo;
sa Nana tataru variva taleosaena si loke kokoina.
23 Na vaqura si arini doduru munumunu;
lohina sa kinopu Tanisa.
24 Tozi pule nau si arau, “E Zihova sa qua hinia;
gua ke kote aqa nia rau si Asa.”
25 Se Zihova si leana la koa rini pu raṉe ia si Asa,
koa rini pu hata ia si Asa;
26 na leana tu si pude aqa va ṉoṉo
nia sa hinarupu te Zihova.
27 Na leana tugo si pude koa nabulu guana paleke ioki
sipu korapa vaqura si asa.
28 Vekoa mani habotu lopu kulu,
ura e Zihova tu va paleke nia koasa bisa.
29 Vekoa mani todoṉo gore nia isumatana pa kavuru,
ura hokara korapa mae sa lineana.
30 Mani va malumia sa paparana pude ta pohara,
mani koa kurekure.
31 Ura sa tie si lopu kote ta veko palae
ninae rane koe Zihova.
32 Be va kamo tinalotaṉa Sa, ba kote tataru si Asa,
na noma hola sa Nana tataru nabuna.
33 Ura lopu qetu nia Sa pude va kamo ni tinasigiti
babe na tinalotaṉa sari koburu tadi na tie.
34 Pude neti goreni pa kauru nene
sari doduru tie ta pusidi pa popoa,
35 pude lopu ponia koasa tie gua sapu toṉoto
pa kenuna sa Tamasa Ululuna Hola,
36 pude heki nia koasa tie sa vinilasa va toṉoto,
si vea lopu kote dogoria e Zihova sapu gugua arini?
37 Esei si boka zama meke vata evaṉia
be lopu ele tozi kenu nia e Zihova?
38 Lopu koasa ṉuzuna tu sa Tamasa Ululuna Hola
si mae gua sari tinasuna meke sari lineana?
39 Vea ke kaqu nominomi tu sa tie
totoso tava kilasa si asa koari nana sinea?
40 Mada viliti sari nada hahanana, mada dogori,
mada pule la koe Zihova.
41 Mada ovulu sageni sari buloda meke limada
la koasa Tamasa pa Maṉauru, mada zama guahe:
42 “Gami si ele sea meke va gugue atu koa Goi
meke Agoi lopu taleosoni gami.
43 Nobi pule nigo si Agoi pa tinaṉaziri meke hadu luli gami;
loke Mua tataru koa gami meke seke va mate gami Agoi.
44 Nobi pule nigo si Agoi pa lei
pude lopu kamo atu sari mami vinaravara.
45 Na boni meke na remoremo taveteni gami Goi pa korapadi rina butubutu.
46 Doduru mami kana si ele tukele ṉaṉara maeni ṉuzudia koa gami.
47 Ta ene nia gami sa minatagutu meke sari na sipata,
sa kinaleana meke tinahuara.”
48 Totolo gore guana ovuku sa kolomata pa mataqu
sina ta huara sari qua tinoni.
49 Sa zoloro pa mataqu si kote loke vina betona,
lopu kote magogoso,
50 osolae tiro gore se Zihova
pa maṉauru meke dodogorae.
51 Talotaṉa sa maqomaqoqu sipu dogoria rau
sa tinoa tadi na barikaleqe pa qua vasileana.
52 Sarini pu kana hoboro au
si hukue guni nau na kurukuru tapuru.
53 Podekia rini pude va mate au pa pou
meke gona nau patu rini;
54 sa kolo si sage ululu hola nia sa batuqu,
meke balabala si rau sapu mate mo si rau, gua.
55 Kei Zihova, kukili vura nia rau sa Pozamu,
pa korapana sa pou lohina.
56 Avosia Mua sa qua kinabo: “Mu lopu tukui sari Taliṉamu
koasa qua tinepa pude harupau.”
57 Tata mae si Agoi totoso tioko hata Igo arau,
meke zama si Goi, “Mu lopu matagutu,” gua.
58 Ke Zihova, ele va sare au Agoi pa tinasuna,
harupia Agoi sa qua tinoa.
59 Zihova, ele dogoria Mua sa sinea ta tavete koa rau.
Mu poni au sa vinaripitui toṉotona.
60 Ele dogori Mua sari doduru dia tinubehe,
meke sari dia kinuhana mae koa rau.
61 Kei Zihova, avosi Mua sari dia zinama kaleadi,
meke sari doduru dia kinuhana mae koa rau,
62 saripu manamanasa nau na qumiqumi nau ri na qua kana doduruna sa rane.
63 Doṉo la i! Habotu babe turudi,
ba arau mo si va sisire nau rini koari na dia kinera.
64 Kei Zihova, Mu tavete lani koa rini gua sapu garodi,
gua sapu taveti rini pa limadia.
65 Va paere nia poko sari bulodia,
Mamu va paleke ni lineveleve gedi!
66 Pa tinaṉaziri Mamu hadu luli, Mamu va mate pani gedi
pa kauruna sa Mua maṉauru Agoi Zihova.