5
Na Vinaravara Tinepa Tinaleosae
1 Kei Zihova, Mu balabala ia sapu ta evaṉa koa gami;
doṉo mae, Mamu dogoria sa kinurekure tamigami.
2 Sapu tagoa gami si ta vala koari votiki tie,
sari mami vetu si koa i ri na tie karovodi.
3 Gami si eapa meke loke tamamami,
sari tinamami si guana naboko tu.
4 Na kolo sapu napoa gami si kaqu holua tu gami;
sari mami huda rararo si koa i na hinolu.
5 Sarini pu hadu gami si pa mudi mami mo;
mabo si gami ba lopu boka magogoso.
6 La todoṉo si gami koari pa Izipi meke Asiria pude vagi vasi bereti.
7 Ari tamamami si va sea, ba ele mate beto si arini;
meke gami palekia sa vina kilasa tadi kasa.
8 Sari mami pinausu si kamahire si na mami palabatu,
meke loke tie si koa pude rupaha gami pa limadia.
9 Tata mate si gami totoso hata bereti gami
sina sa vedara si koa mo pa qega.
10 Sa kapu mami si ṉada guana motu,
maṉini pa inovia.
11 Sari barikaleqe Zaione si ta tuqe vagi meke ta eko turaṉa,
gua tugo sari vineki vaqura pa vasileana Ziuda.
12 Sari koburu koreo tavia si ta huqi pa limadia;
sari palabatu si lopu ta pamaṉae.
13 Sari tie vaqura si mabo pa munamunalana palava;
sari koreo vaqura si sigiti mudidi pa paleke huda.
14 Sari palabatu si lopu vura binalabala pa varivarigarana pa vasileana;
sari tie vaqura si lopu kerakera pule.
15 Sa qinetuqetu si rizu taloa pa bulomami;
sari mami pinekapeka si iliri la pa tinalotaṉa.
16 Sa binaṉara si loke mami.
Mami talotaṉa si gami, ura na ele sea si gami.
17 Gua asa ke malohoro sari bulomami,
gua asa ke rida sari matamami,
18 ura sa toqere Zaione si ta huara meke ivulu,
na vasina tadi na siki pinomo.
19 Kei Zihova, sa Mua binaṉara si koa hola;
sa Mua habohabotuana baṉara si kamo pa doduru sinage.
20 Na vea ke koba muliṉini gami Goi?
Na vea ke seunae hola tu veko pani gami Goi?
21 Kei Zihova, harupu vagi pule ni gami, pude mami pule atu koa Goi;
va vaqura pulei sari mami rane gugua pukerane,
22 be guana lopu kilu pani gami Goi si gami,
be lopu sapu loke kokoina sa Mua tinaṉaziri koa gami.