21
Na Tinoa Minadi Tadi na Hiama
Zamaia e Zihova se Mosese, “Mu tozini sari na hiama, sari doduru tuna koreo Eroni: Pana mate si keke turaṉamu, loke tie koa gamu na hiama si kaqu ene tata koa keke tie matena babe va boni puleni gamu telemia. Be guana lopu na turaṉamu soti mo pa nana pinodo, na tinamu soti, tamamu, tumu koreo, tumu vineki, meke na tasimu koreo soti, babe keke tasimu vineki vaqurana pu koa pa mua kinopu pu lopu ele varihabana, arini pu tata sisigiti koari na dia pinodo, si boka tiqui goi, pude boka va boni puleni gamu telemia koasa hahanana minate. Ba lopu boka va boni puleni gamu koa rina tie matedi pu na turaṉamia pa vinarihaba.
Loke hiama si kaqu neri va pakaia sa batuna, babe neria sa hukihukiri gumina babe magu va bakoria tinina pude vata dogoro nia sa nana tinalotaṉana sa tie matena.* Liv 19:27-28; Diut 14:1 Kaqu koa via na madi si asa pa dinoṉo te Zihova, meke lopu kaqu va kaleania sa sa pozana sa Tamasa; kaqu koa madi na via si asa, sina va vukivukihi nia sa koe Zihova sari na vinariponi pa nika pude na ginani te Tamasa. Sa hiama si lopu kaqu haba ia si keke maqota, babe sa tie ta luluarana pa nana palabatu, sina kaqu koa via na madi koasa dia Tamasa si asa. Kaqu doṉo gilania ri na tie sapu na tie madina sa hiama, sina va vukivukihi nia sa koa Rau Zihova, sa vinariponi ginani. Madiqu na viaqu si Arau, ke kaqu va madi na va via i tugo Rau sari na Qua tie. Be ta evaṉae guana maqota sa tuna vineki sa hiama, si va kurekurea sa sa tamana; kaqu ta sulu va mate pa nika si asa.
10 Sa ṉati hiama kenukenue sapu ele ta vizatana koari na tasina meke ele ta zoropae oela vina madi sa batuna, meke va sagei sari na poko tana hiama si lopu kaqu besu nia sa sa tie matena babe rikati sa sari nana poko, ba kaqu suti sa sari na kaluna pude va dogoro nia sapu via si asa. 11-12 Be mate si keke tie gugua tugo na tamana babe na tinana soti, ba lopu kaqu nuquria sa sa vetu vasina pu koa sa tie matena, sina ele tava madina si asa koasa oela hopena te Tamasa. Lopu kaqu vura si asa koasa Ipi Hopena te Zihova pude va boni pule nia koasa hahanana minate. 13-14 Lopu kaqu haba ia sa sa vineki pu koa turaṉa tie, babe keke nabonaboko, babe keke barikaleqe ta luluarana, babe keke maqota. Kaqu haba ia mo sa sa vineki sapu lopu hite koa turaṉa tie sapu mae guana koasa nana butubutu soti. 15 Pude lopu kaqu tava boni pa dinoṉo te Zihova sari na tuna koari na tinavete kaleadi gugua arini. Ura Arau se Zihova sapu ele va madia si asa pude na ṉati hiama kenukenue.”
16 Zamaia e Zihova se Mosese, 17 “Mu tozi nia se Eroni, ‘Namu loke tie pa tutimu koari na sinage vugo na repere sapu koa ia binoni si kaqu paleke mae nia sa vinariponi ginani koa Rau. 18 Namu loke tie sapu koa ia boni si kaqu somana pa tinavete hiama, be na tie behuna, na ike, na tie koele, 19 babe bakora limana babe nenena, 20 babe na tie polosuri, na tie mamagoria, na tie kiqo matana, na minoho kaleana pa kapuna, babe na tie puzalana. 21 Namu loke tie pa tutina Eroni, sa hiama sapu koa ia na binoni si kaqu va vukivukihi mae nia koa Rau sa vinariponi ginani. 22 Sa tie gua asa si boka hena ia sa sa ginani sapu tava vukivukihi mae koa Rau, sari doduru ginani hopedi meke saripu hopedi hola pu va vukivukihi maeni rini, 23 ba koa gua sapu koa ia na boni si asa, ke lopu kaqu tata mae koasa poko goba pa Lose Hopena si asa, babe tata la ia mo sa sa hope vina vukivukihi. Namu lopu kaqu va boni sa sari na tiṉitoṉa hire. Arau se Zihova sapu va madi gamu pude na hiama.’ ”
24 Ke tozini e Mosese sari na zinama arini koe Eroni, sari na tuna koreo, meke koari doduru tinoni pa popoa Izireli.

*21:5 Liv 19:27-28; Diut 14:1