2
Sa Vinakilasa Tadirini pu Ṉoṉovali sari Tie Malaṉa
1 Madi talotaṉa si arini pu roverove hata kinaleana,
koa rini pu kuhana pa dia teqe!
Pana kalalasa mae sa munumunu si tavete vura nia mo rini
sina ari dia ṉiniraṉira pude tavetia.
2 Totoso hivani rini sari na inuma si tuqe vagi mo rini;
meke totoso okoroni rini sari na vetu si sekesekei ni rini pude dia.
Pa hahanana gua asa si vatasuna i rini sari tie
meke sari turaṉadia pude loke dia.
3 Gua ke, zama se Zihova:
“Na tinahuara si va nama ia Rau pude tavete atu nia koa gamu,
sapu lopu kote boka harupu pule ni gamu si gamu.
Lopu kote ene va titie pule si gamu,
ura na totoso tasuna si kote kamo koa gamu.
4 Pa rane asa si kote va sisire ni gamu rina tie si gamu;
kote ṉoṉovala gamu rini koasa kera lukalukana hie:
‘Ta huara hokara sa nada popoa;
sari tinago pepeso tadi na tinoni Izireli si vari hia ni ri na kana.
E Tamasa tu vagi pania!
Na hia la nia Sa koari nada kana,’ gua.”
5 Gua ke loke tie pa tuti mia gamu
si kote koa koasa vinarigara te Zihova
pude vagi hinia koa sa pepeso.
6 “Lopu korokorotae,” gua sari dia poropita.
“Lopu korokorotae ni sari tiṉitoṉa gua arini;
na lopu kote kamo gami na kinurekure si gami,” gua.
7 Vea, leana pude ta zamae la koasa butubutu te Zekopi si guahe:
“Vea, bugoro sa Maqomaqo te Zihova?
Hoke boka taveti Sa sapu gua arini?”
“Vea, lopu tavete va leana tu sari Qua zinama
la koa sa pu toṉoto nana hahanana?”
8 Ba olaṉa se Zihova koa gamu: “Hoke gasa vura si gamu guana keke kana.
Saputu vagi gamu sari poko arilaedi tadi na Qua tinoni pu ene hola,
arini pu raṉe gamu si gamu,
kekeṉoṉo gua sa totoso sapu pule mae sari tie pa vinaripera,
meke balabalaia rini sapu loke kana boka raza i.
9 Hadu vurani gamu sari naboko tadi Qua tinoni
koari dia vetu leleadi.
Meke vagi pani gamu sari pepeso pu hiva poni lani Rau
koari dia koburu pude na dia tinago ninae rane.
10 Gasa turu, mamu taloa!
Ura lopu na mia magomagogosoana sa popoa hie,
na ele tava boni si asa,
ele ta ṉovala, hola nia sapu kote boka tava leana pule,” gua.
11 Be na tie kokoha meke sekesekei si mae meke zama,
“Kote korokorotae poni gamu rau pude ari mia soku vaeni meke bia,” gua,
si kote asa hokara sa poropita sapu garodi koa gamu na tie hire!
12 Zama se Zihova, “Kei Zekopi, na kote hinokara varigara puleni gamu Rau;
gamu ka visavisa mia pa Izireli pu koa hola mia si kote hinokara varigara puleni gamu Rau.
Kote vagi varigara ni gamu Rau guana sipi pa bara,
guana rovana sipi pa pezara duduli;
sa popoa tamugamu si kote siṉi pule ia na tie.”
13 Zihova pu ene vura kekenu kote turaṉi si arini;
kote tukele pania rini sa sasada tadi kana meke vura taloa dia koari na popoa pa seu.
E Zihova sa dia Baṉara si kote ene gua pa kenudia.