1 Sipu avoso nia Sanibalati sapu korapa kuri pulea gami na tie Ziu sa goba, si ta ṉaziri hola si asa, meke podalae va sisireni gami na ṉoṉovala gami sa si gami. 2 Pa kenudia ri nana baere, meke sari na tie varipera pa Sameria si zama si asa, “Nasa si korapa hiva tavetia ri na tie Ziu malomalohorodi hire? Vegua, kote boka kuri pulea rini sa goba? Vegua, kote boka vukivukihi sari? Boka va hokotia rini sia pa keke rane? Kaqu boka kurikuri pule ni rini sari patu sapu ele ta suludi meke ele koa koari na remoremo?”

3 Se Tobaia sapu turu kapaena pa kalina Sanibalati si zama guahe, “Na sa si korapa kuria rini? Be na pokese*Sa pokese si noma guana pusi. ene lulia pana uluna ba kote huara mo sa goba.”

4 Ke varavara si rau, “Kei mami Tamasa, Mu avoso mae gami. Va tia pule lani sari dia ṉinovaṉovala pa batudia teledia. Madi ta raovo si arini la pa votiki popoa. 5 Lopu va paere i sari kinaleana sapu taveti rini, lopu muliṉi ni sari dia sinea, ura ele zama ṉoṉovala gami rini si gami pu korapa tavetavete.”

6 Ke kurikuri pule si gami koasa goba osolae kamoa gami kukuruna sa ululuna sa goba, sina tavetavete ṉaliṉali hola sari na tinoni.

7 Ba sipu avoso nia ri Sanibalati, e Tobaia, sari na tinoni pa Arebia, na Amoni, meke Asidodi, sapu korapa latu sa kinurina sa goba pa Zerusalema, meke sari na lolomo pa goba si ta tuvaka tuku, si ta ṉaziri hola dia. 8 Vari vivinei sari kasa doduru meke kuhana nia arini pude mae raza ia sa popoa Zerusalema, pude va nunala gami, gua. 9 Ba varavara la si gami koasa mami Tamasa, meke veko tie pude kopu koari na kana, rane na boṉi.

10 Ba koa nana pa Ziuda si keke kinera kebokebo sapu zama gua hie,

11 Meke zama tugo sari mami kana, “Kote lopu nonoga ia rini si ele pa vari korapadia tu si gita meke seke va matei, meke va noso pania sa tinavete,” gua. 12 Meke sari na tie Ziu, saripu koa tatadi koari na mami kana si mae pilipule meke va balau gami, “Mi luara pania sa popoa Zerusalema, mamu pule mae pa vasileana,” gua. 13 Ke veko tie si rau koari na vasidi pepekadi koasa goba pude ta dogoro si arini. Veko tie luli gua koari dia puku tatamana si arau, tuqei na dia vedara, hopere na bokala.

14 Doṉo viliti si arau meke gasa turu meke zama koari na palabatu, koimata meke sari doduru tie, “Lopu matagutu ni sari tie hire. Mi balabala ia sa Baṉara lavata sapu variva holoqoruna; mamu varipera poni sari na tasimia, mia koburu koreo na vineki, mia barikaleqe, meke mia kinoa tatamana.” 15 Totoso avoso nia rina mami kana sapu ele tumae nia gami sa dia kinuhana, meke sapu ele huara pani Tamasa sari na dia hiniva tomedi, si pule beto la koasa goba si gami, hopeke la koari na mami tinavete.

16 Podalae koa sa rane asa si kukuruna sa qua tie si tavetavete meke kukuruna si turu kopu, sagei na dia poko varipera meke tuqe hopere, lave meke na bokala. Ari na koimata si zukai sari na tie Ziuda 17 pu korapa kurikuri pa goba. Arini pu palepaleke mae ginerigeri, si palepaleke pa kali lima, meke kali limadia si tuqei rini sari na tiṉitoṉa varipera. 18 Doduru tie tavetavete si dikuru nia pa kali kopetedia sa magu varipera. Ba sa tie ivu buki si koa mo pa kaliqu rau.

19 Zamai rau sari na palabatu na koimata meke sari na tinoni, “Noma hola sa tinavete meke koa vari seui sisigiti si gita koasa goba. 20 Ke pana avosia gamu vasina kabo sa buki, si mi varigara mae koa gami vasina. Sa nada Tamasa kote varipera poni gita.” 21 Ke doduru rane, podalae munumunu vaqavaqasa kamo sapu vura sari pinopino pana boṉi, si kaiqa ri na tinoni si tavetavete koasa goba, meke kaiqa si taṉini hopere meke turu kopu.

22 Pa totoso asa si tozi ni rau sari na palabatu pa tinavete, sapu arini meke sari dia tie tavetavete si kaqu koa hola mo pa Zerusalema pana boṉi, pude boka kopu nia rini sa vasileana nomana pana boṉi, meke pana rane si kote tavetavete si arini. 23 Arau si pana boṉi ba lopu hite va gorei rau sari qua poko, meke gua tugo sari na turaṉaqu, qua nabulu, meke qua tie kopu tini. Meke doduru gami si taṉini beto tiṉitoṉa varipera doduru totoso.