23
1 Meke zama la koe Balaki se Belami, “Mu tavete maeni ka zuapa hope tani, mamu paleke maeni ka zuapa bulumakao kokoreo meke ka zuapa sipi kokoreo,” gua si asa.
2 Meke taveti tugo e Balaki sapu gua tozi nia e Belami pude taveti, meke hopeke va vukivukihi nia ri si keke bulumakao na sipi koari hopehopeke hope. 3 Beto asa si zama la koe Balaki se Belami, “Turu tani tata koari na mua vina vukivukihi va uququ, maqu la dogoria be tutuvau e Zihova babe lokari. Meke kote boka tozi nigo rau sapu gua kaqu va dogoro nau Sa koa rau.” Ke ene sage la telena pa batuna keke toqere si asa, 4 meke mae koasa vasina sa Tamasa. Meke zama la koasa se Belami, “Ka zuapa hope si ele taveti rau meke hopeke va vukivukihini rau sari ka zuapa bulumakao kokoreo meke ka zuapa sipi kokoreo,” gua si asa.
5 Meke tozia Zihova koe Belami gua sapu kote zama nia sa, meke garunu pule la nia Sa koe Balaki pude la tozi nia. 6 Ke pule la si asa meke la dogoria sa se Balaki meke sari doduru koimata tadi na tinoni Moabi saripu korapa turu kapae dia koari nana vina vukivukihi va uququ.
7 Zama vura nia Belami sa kinorokorotae hie:
“Na turaṉa mae nau e Balaki sa baṉara pa Moabi,
meke mae gua koari na toqere pa Siria pa kali gasa rimata si rau.
Meke zama si asa, ‘Mae, mamu leve nia sa butubutu te Zekopi, gua,
mamu zama ṉoṉovali sari na tinoni Izireli,’ gua.
8 Meke nanasa si rau: Na vegua ke kaqu boka leveni tu rau saripu lopu leveni e Zihova?
Meke na vegua ke kaqu boka zutui tu rau saripu lopu zutui e Zihova?
9 Koa pa batu patu pa toqere, meke doṉo gore lani rau,
koa panaulu, meke kopu totokoni rau si arini.
Na butubutu koa vata kaledi si arini,
meke gilania rini sapu na butubutu tamanaedi holani sari votiki butubutu.
10 Loke tie boka naei sari na sinokudi ri na tinoni te Zekopi,
na soku gua tugo na kavuru pa pepeso si arini.
Ke maqu va hokotia mo sa qua tinoa guari na tinoni te Tamasa,
maqu mate qua pa binule guari na tie toṉoto.”
11 Meke zama la koe Belami se Balaki, “Nasa si tavetia goi koa rau? Ura ele turaṉa mae nigo rau pude leveni sari na qua kana, ba loketoṉa si tavetia goi, ba manani tu goi si arini,” gua si asa.
12 Meke olaṉa si asa, “Kaqu zama nia mo rau sapu gua tozi nau e Zihova pude zama nia,” gua.
Sa Kinorokorotae Vina Rua te Belami
13 Beto asa si zama la koe Belami se Balaki, “Mae luliau, mada la pa keke vasina sapu kote boka dogori goi sari kaiqa tie Izireli. Mamu leve maeni mo vasina.” 14 Ke turaṉa la nia sa koasa inuma Zopimi pa batuna sa toqere Pisiqa si asa. Meke vasina si taveti sa si ka zuapa hope, meke va vukivukihi nia sa si keke bulumakao kokoreo meke keke sipi kokoreo, koa ri ka zuapa hope.
15 Meke zama la koe Balaki se Belami, “Turu kapae koari na mua vina vukivukihi va uququ, maqu la tutuvia sa Tamasa panahoi,” gua si asa.
16 Meke mae tutuvia e Zihova se Belami, meke tozi nia sapu gua kote zama nia sa, meke garunu pule la nia Sa koe Balaki pude tozi nia koasa sa inavoso. 17 Ke pule la dogoria sa se Balaki korapa turu kapae nana koari nana vina vukivukihi, somanae koari na koimata tadi na tinoni Moabi. Meke nanasa nia Balaki sapu gua zama nia e Zihova koasa. 18 Meke zama vura nia e Belami sa kinorokorotae hie:
“Balaki, tuna e Zipora,
mae mamu avosia sapu gua kote zama nia rau.
19 Sa Tamasa si lopu kekeṉoṉo guana tie sapu hoke kokoha.
Lopu guana tie toana si Asa sapu hoke hobehobea Sa sa Nana binalabala.
Gua sapu va tatara nia Sa si kaqu va gorevura ia tugo Sa,
Gua sapu zama nia Sa si kaqu tavetia tugo Sa.
20 Ele garunau Sa pude manani si arini.
Ele tamanae koe Tamasa si arini,
ke lopu kaqu boka hobea rau si asa.
21 Loke minalaṉa babe na tinasuna si kaqu ta evaṉa koari na tinoni Izireli.
E Zihova sa dia Tamasa si korapa koa koa rini,
meke korapa zama vura nia rini sapu Asa tugo sa dia Baṉara.
22 Ele turaṉa vurani Tamasa pa popoa Izipi si arini,
meke ṉiṉira guana bulumakao pinomona si arini.
23 Loke tinavete potana, meke loke ṉiniraṉira potana
sapu boka va kilasia sa butubutu Izireli.
Ura kote zamani rina tinoni sari na butubutu Izireli,
‘Dotu, dogoria goi sapu gua ele tavetia Tamasa koarini!’ gua
24 Sari na tinoni Izireli si ṉiṉira gua tugo na laione,
meke hoke gasa tekulu guana laione si arini,
meke lopu hoke eko magogoso osolae gani betoa sa sa nana boso
meke napoi sa eharadi sarini pu va matei sa,” gua si asa.
25 Beto asa si zama la se Balaki koe Belami, “Ego, be koromu leveni goi si mu lopu manani tugo.”
26 Ba olaṉa se Belami, “Vegua, lopu ele tozi nigo tu rau, sapu sari doduru gua pu zamani e Zihova si kaqu taveti tugo rau?”
Sa Kinorokorotae Vina Ṉeta te Belami
27 Beto asa si zama la koe Belami se Balaki, “Leana mae, maqu turaṉa lanigo pule pa keke vasina. Meke hokara vasina si kote qetu sa Tamasa meke boka va malumigo Sa pude leve maeni vasina si arini.” 28 Ke turaṉa sage la nia Balaki se Belami pa batuna sa toqere Peoro, sapu doṉo gore la gua koasa popoa qega. 29 Meke zama la koe Belami se Balaki, “Mu tavete maeni ka zuapa hope tani, mamu paleke maeni ka zuapa bulumakao kokoreo meke ka zuapa sipi kokoreo.” 30 Meke taveti tugo Balaki sapu gua garunu ni e Belami koasa, meke hopeke keke bulumakao kokoreo meke keke sipi kokoreo si ta vukivukihi koari ka zuapa hope.