23
Sa Zinama Vina Onomo
1 Pana habotu si goi pude henahena turaṉia sa baṉara,
si mu viliti sari ginani pa kenumu;
2 mamu vekoa sa magu pa leomu
pana keke tie ṉaṉaluta si agoi.
3 Lopu okoro ni sari gana ginani leleadi,
ura na sinekesekei koai sari ginani arini.
Sa Zinama Vina Zuapa
4 Lopu va sigiti pule nigo koasa hinatana sa tinagotago;
gilae mamu noso.
5 Mata puri mo goi si taloa dia mo sari tinagotago,
na kote ari tatapurudi
meke tapuru la dia pa galegalearane guana atata.
Sa Zinama Vina Vesu
6 Mu lopu hena sa ginani tanisa tie puhi,
mu lopu okoro ni sari gana ginani leleadi;
7 Ura arini sari tie sapu balabala sisigiti pa poata.
“Hena mamu napo,” kote guni nigo sa,
ba sa bulona si lopu gua tu asa.
8 Kote lua vura ni goi sari vasina hite pu ele henai goi,
meke loke laedi mo sari mua zinama leadi.
Sa Zinama Vina Sia
9 Lopu norea sa tie pekipeki,
na kote va sisire ni sa sari zinama ginilagilana tamugoi.
Sa Zinama Vina Manege Puta
10 Mu lopu va rizua sa patu voloso pukeranena
babe vagi pania sa pepeso tanisa pu loke tamana.
11 Ura Asa pu lavelave ni si ṉiṉirana;
meke Asa kote turaṉa la nigo pa vinari pitui.
Sa Zinama Vina Manege Eke
12 Va naqiti pa bulomu sari na tinarae
mamu va taliṉa la koari na zinama tumatumae.
Sa Zinama Vina Manege Rua
13 Mu lopu tuqe pule nia sa ginegese koasa koburu;
pana seke nia kolu goi, si lopu kaqu mate nia sa.
14 Mu seke nia kolu,
mamu harupia sa nana tinoa pa minate.
Sa Zinama Vina Manege Ṉeta
15 Tuqu, be gilae sa bulomu,
si kote qetu hola sa buloqu;
16 sa maqomaqoqu si kote qetu
pana zama va gotogoto sari na berumu.
Sa Zinama Vina Manege Made
17 Lopu va malumia sa bulomu pude va gulea i sari tie tavete va sea,
ba mu pamaṉa nia doduru totoso se Zihova.
18 Hinokara, koa nana sa lineana tamugoi vugo repere,
meke sa mua lineana asa si lopu kaqu ta kumata palae.
Sa Zinama Vina Manege Lima
19 Tuqu, va avoso mae, mamu koa gilae,
mamu kopu nia sa bulomu koasa siraṉa toṉotona.
20 Mu lopu somana ni si arini pu napo sisigiti vaeni,
babe inevaṉa turaṉi sari na tie mari henahenadi,
21 ura sari tie naponapo meke saripu mari henahenadi si kote kamo malaṉa,
meke sa puta si kote sage ni poko rikarikatadi rini.
Sa Zinama Vina Manege Onomo
22 Mu avosia sa tamamu pu ponigo sa tinoa,
meke lopu hakohako nia sa tinamu pana kaleqe si asa.
23 Mu holu vagia sa hinokara meke lopu holuholu pania;
vagia sa ginilagilana lohina, vina tumatumae, meke ginilae.
24 Sa tamana sa tie toṉoto si kote qetu hola;
qetu si asa pu tagoa si keke koburu gilaena.
25 Mani qetu sari tiatamamu;
mani qetu sa barikaleqe pu podo igo.
Sa Zinama Vina Manege Zuapa
26 Tuqu va mae ia sa bulomu,
meke sari matamu si mani doṉo luli sari qua hahanana.
27 Ura na maqota si na pou lohina,
meke na barikaleqe barabaratana si na berukehe variva mate.
28 Tome aqa guana tie hikohiko si asa,
meke va soku i sa sari na tie pu loke dia rinaṉeraṉe.
Sa Zinama Vina Manege Vesu
29 Esei si ta sigiti? Esei si talotaṉa?
Esei si tasuna? Esei si nominomi?
Esei si bakora hoboro? Esei si ziṉara matana?
30 Arini pu qetuqetu nia sa napo vaeni,
pu la podeki sari soku votivotiki vaeni.
31 Mu lopu doṉo totoa sa vaeni pana ziṉara si asa,
totoso pinoro sa pa korapa kapa,
meke totoso onolo gore sa.
32 Pa vina betona si kote garata guana noki
meke hilili guana kukuasa si asa.
33 Sari matamu si kote dogoro hoboro tiṉitoṉa variva pupuhudi,
meke kote zama ni ginugua bonidi pa bulomu.
34 Kote guana keke tie putamu pa lamana si goi,
puta panaulu koari na iku pa dedegere vaka tepetepe.
35 “Tupa au rini,” kote gua si goi; “ba lopu sigitau!
Komitau rini, ba lopu va nonoga ia rau!
Totoso sa si kote vaṉunu rau
pude qu hata pule napo?” kote gua.