4
Vinaravara Tinepa Tinokae pana Veluvelu
(Keke kinera te Devita)
1 Va tabeau pana varavara atu si rau,
ke, Tamasa pu harupau pa tinoṉoto.
Sipu koa pa tinasuna na tinalotaṉa si rau, si mae va sare au Goi,
tataru nau, mamu avosia sa qua vinaravara.
2 Ke gamu na tinoni, ve seunae gua si kaqu koromia pamaṉa nau gamu?
Ve seunae gua si kaqu okoroni gamu sari na ginugua hoborodi,
meke sari na tamasa kokohadi?
3 Ba mi gilania sapu ele vizata paqaha vagi e Zihova sari na tie toṉoto pude na Nana tie soti;
kaqu va avosau e Zihova pana tepa la koa Sa si rau.
4 Mu lopu va malumia sa mua binugoro pude turaṉa la nigo pa sinea.*Epi 4:26
Mamu balabala va lohi pa bulomu totoso eko magogoso pa mua teqe,
mamu koa noso!
5 Va vukivukihi ni sari na vina vukivukihi gotogotodi pa bulomia.
Mi va sotoa sa mia kinalavarae koe Zihova!
6 Sokudi tugo saripu nanasa guahe,
“Esei beka si boka va dogoro ni gami sa tinoa leana?
Ke Zihova, Mu ponini gami sa minana lavata!” gua.
7 Sa qinetuqetu sapu poni nau Goi
si noma hola nia gua sapu tagoi rini pa dia vuvua huiti na vaeni.
8 Maqu eko va bulebulei qua,
maqu puta gequ,
ura telemu Agoi Zihova si kaqu toketoke hukata nau.