24
Sa Baṉara Lavata
(Keke kinera te Devita)
1 Sa popoa pepeso meke sari doduru likakalae vasina si te Zihova,
sa kasia popoa meke sari doduru pu koa vasina si Tanisa tugo.
2 Ura ele sokirae nia Sa si asa koasa kolo lamana,
meke ele kuria sa si asa koasa lamana peava.
3 Esei si garo pude sage la koasa toqere te Zihova?
Esei si kaqu nuquru pa Nana Zelepade hope?
4 Asa mo sapu lopu tavete va sea pa limana meke via bulona,* Mt 5:8
lopu vahesi beku sa meke lopu sekea sa sa nana vina tatara.
5 Kaqu mana nia e Zihova si asa meke harupia,
meke sa Tamasa kaqu poza nia, tie pu lopu tavete va sea.
6 Gua asa si arini pu hata ia si Asa,
arini pu hiva nia sa minana ke mae si arini pa kenuna sa Tamasa te Zekopi.
7 Mi tukele gamu na sasada,
mi tukele va noma gamu na tukutuku koamia pukerane,
pude Mani nuquru mae sa Baṉara lavata ṉiṉirana.
8 Esei sa Baṉara lavata ṉiṉirana?
E Zihova tu sa Baṉara lavata ṉiṉirana,
E Zihova sapu mataqara pa vinaripera!
9 Mi tukele gamu na sasadana sa bara pa vasileana,
mi tukele va noma gamu na sasada koa mia pukerane,
pude mani nuquru mae sa Baṉara lavata ṉiṉirana. 10 Esei sa Baṉara Lavata Asa?
E Zihova Tadi na Qeto Minate si Asa,
Asa sa Baṉara Lavata ṉiṉirana!