26
Sa Vinaravara tanisa Keke Tie Leana
(Keke kinera te Devita)
1 Kei Zihova, Mu tozia sapu loke qua sinea, gua,
sina evaṉia rau gua sapu toṉoto,
meke raṉe zoṉazoṉa Igo rau si Goi.
2 Podeke au, Mamu gilanau ba Zihova,
Mamu viliti sari na qua inokoro na qua binalabala golomodi.
3 Ura doduru totoso si gilania rau sa Mua tataru nabuna,
meke kopu ni Goi sari na Mua zinama,
ke koa soto koa Goi si rau.
4 Lopu somana si rau koari na tie kokohadi,
meke namu loke qua ginugua hokara koari na tie sekesekeidi si rau.
5 Hakohako hola ni rau sari na tie va sesea,
meke va ilolo pule nau koarini si rau.
6 Kei Zihova, ṉuzapi rau sari limaqu pude vata dogoro nia sapu lopu tavete va sea si rau.
Meke kera vari likohae nia rau sa Mua hope pa vinahesimu Goi!
7 Kera zama leana atu koa Goi si rau,
meke tozi vura ni rau sari doduru Mua tinavete variva magasadi.
8 Kei Zihova, qetu nia rau sa Mua Zelepade hope,
vasina pu koa sa Mua ṉinedala.
9 Mu lopu va mate turaṉa nau koari na tie kaleadi,
ba va sare ia sa qua tinoa koasa ṉinovaṉovala tadi na tie variva mate,
10 pu tavete va kaleana doduru totoso,
meke hoke ade vagi rini sari na tinabaradi ri na dia tinavete kaleadi.
11 Ba arau he si evaṉia gua sapu toṉoto,
ke Mu tataru nau, Mamu harupau.
12 Tava sare si rau koari doduru tinasuna,
ke maqu vahesia rau se Zihova pa vinarigaraedi ri Nana tinoni!